बेर-बुड़ती बाटे मनस्से बंस चो भुंय-बाटा
17
जूसुफ चो बड़े बेटा मनस्से रये। मनस्से चो पईलात बेटा माकीर गोटोक बड़े बीर रये आउर माकीर, गिलाद चो बुआ रये। मनस्से बंस के बले बाटा मिरली; हुनमन चो बाटा गिलाद आउर बासान† होली। कसनबलले हुनमन बीरमन रला 2 एईकाजे बाचलो आदो मनस्से बंस चो बाटा हुनमन चो कुटुम हिसाब ले अबीएजेर, हेलेक, असरीएल, सकेम, हेपेर आउर समीदा के मिरली। एमन जूसुफ चो बड़े बेटा मनस्से चो थर-लर आत।3 मनस्से चो पर-पुती, माकीर चो पुती, गिलाद चो नाती आउर हेपेर चो बेटा सलोफाद के बेटामन नी रला मानतर बेटीमन ची रला। हुन लेकीमन चो नाव महला, नोआ, होगला, मिलका, आउर तिरसा आय। 4 तेबे हुनमन, एलीआजर पुजारी, नून चो बेटा जहोसू आउर मुखियामन लगे जाउन बलुक मुरियाला, “जहोवा, मोसा के हुकुम देउ रये कि हुन आमचो कुटुम-भाईमन चो मंजी आमके बाटा देओ।” तेबे जहोसू, जहोवा चो हुकुम हिसाब ले हुनमन चो काकामन चो मंजी हुनमन के बाटा दिलो। 5 असने मनस्से बंस के जरदन नंदी हुन पाट गिलाद आउर बासान परघनमन संगे आउर दस बाटा मिरली। 6 कसनबलले मनस्से चो बेटामन संगे हुनचो बेटीमन के बले बाटा मिरली। आउर आदो मनस्सेमन के गिलाद परघन मिरली।
7 मनस्से चो भुंय-बाटा, आसेर ले धरुन सकेम चो बेर-उदिया बाट चो मिकमतात लग ले होली। फेर हुन संद बेर-उदिया उजा बाटे एन-तपूह ने रतो लोगमन लगे अमरली। 8 तपूह चो भुंय तो मनस्सेमन के मिरली, मानतर मनस्से चो संद ने बसलो तपूह सहर एपरेमीमन के मिरली। 9-10 फेर हुन संद काना नाव चो बाहार चो बेर-उदिया डेबरी बाट ले जाउन महासमदूर ने टेकली। काना बाहार चो बेर-उदिया डेबरी बाट चो भुंय मनस्से के मिरली। मानतर हुन बाहार चो बेर-उदिया उजा बाट चो सहरमन मनस्से चो भुंय-बाटा मंजारे रले बले एपरेमीमन चो होली आउर महासमदूर हुनमन दुनो चो बेर-बुड़ती बाटे चो संद होली। मनस्सेमन चो संद बेर-उदिया डेबरी बाटे आसेर ने आउर बेर-उदिया बाटे इसाकार ने मिसली। 11 इसाकार आउर आसेर के मिरलो भुंय-बाटा मंजी मनस्से बंस के, ए सहरमन मिरली: बेतसान, जिबलाम, दोर (जेके नापेत बले बलुआत), एनदोर, तानाक, मगिदो आउर हुन सहरमन चो सपाय गांवमन मिरली। 12 मानतर मनस्से बंस चो लोगमन, हुन सहरमन के आपलो हक ने करुन हुता रतो कनानीमन के निकराउक नी सकला, एईकाजे कनानीमन, हुनमन चो भुंय ने रते रओत। 13 इसराएलिमन खुबे सकत बीतामन होउन बले कनानीमन के नी निकराला मानतर हुनमन के आपलो कमेया बनाला।
एपरेम आउर मनस्से बंसमन आगर भुंय-बाटा मांगतोर
14 जूसुफ बंस चो लोगमन जहोसू के बलला, “जहोवा आमके बर दिलोसे, आउर आमी गनती ने खुबे आगर आंसु। फेर तुय काय काजे आमके गोटकीचे बाटा दिलीस?” 15 जहोसू हुनमन के बललो, “तुमी गनती ने खुबे लोग आसास आउर एपरेम चो डोंगरी परघन तुमचो काजे कम पड़ेसे जाले, तुमी परिज्जी आउर रपाईमन चो परघन चो राने जाउन रान-मारा, आउर आपलो काजे रतो ठानमन बनाहा।” 16 जूसुफ बंस बलला, “डोंगरी परघन तो आमचो काजे कम पड़ेसे। मानतर बेतसान ने रतो लोग, जिजरेल उतरानी ने रतो लोग आउर जितलो कनानीमन कड़की ने रयसोत, हुनमन सपाय लगे लोहा चो रथमन आसे।” 17 फेर जहोसू, जूसुफ चो थर चो एपरेमीमन आउर मनस्सेमन के बललो, “तुमी गनती ने खुबे आसास आउर तुमके खुबे सकत आसे, एईकाजे तुमके गोटकी ची बाटा नाई, 18 मानतर डोंगरी परघन तुमचो होयदे। हुन रान होले बले हुता रान-मारलास जाले, हुन आली-पाली चो भुंय बले तुमचो होयदे। कनानीमन लगे लोहा चो रथमन होले बले हुन सकत बीतामन के तुमी निकराउक सकासे।”