जरदन नंदी चो बेर-बुड़ती बाट चो भुंय बाटतोर
14
इसराएलिमन के हुनमन चो कुटुम हिसाब ले कनान देस् ने मिरलो भुंय-बाटा एई आय, जेके एलीआजर पुजारी, नून चो बेटा जहोसू आउर इसराएल बंसमन चो कुटुम-मुखियामन बाटुन दिला। 2 जहोवा, मोसा बाटले दिलो हुकुम हिसाब ले, हुनमन चिटी पकाउन इसराएलिमन चो साढ़े नव बंस काजे भुंय-बाटा दिला। 3 मोसा ढाई बंस चो बाटा जरदन नंदी चो हुन पाट देउन रये। मानतर लेवीमन के हुनमन चो मंजी काई बाटा नी देउन रये। 4 जूसुफ ले मनस्से आउर एपरेम, दुय बंस निकरु रये, आउर कनान देस् ने लेवीमन के काई बाटा नी दिला। सोजे रतो काजे सहर, आउर जनावरमन काजे चरातो-भाटा मिरली। 5 जहोवा, मोसा के दिलो हुकुम असन इसराएलिमन, देस् के बाटुन दिला।कालेब के हेबरोन सहर देतोर
6 तेबे जहूदा बंस चो लोगमन, जहोसू लगे गिलगाल ने ईला आउर कनजी कुटुम चो जपुन्ने चो बेटा कालेब जहोसू के बललो, “तुय जानीस होती जहोवा, कादेस-बरने ने महापरभु चो कमेया मोसा ले मोचो आउर तुचो बारे ने काय बलु रये। 7 जहोवा चो कमेया मोसा, मोके देस् चो भेद जानतो काजे कादेस-बरने ले पठाउ रये, हुदलदांय मय चालीस बरक चो रयें, आउर मय सत-मन ले हुनचो लगे खबर आनले। 8 मोचो संगे गेलो लोगमन चो मन ने डर चेपाली आउर जीव उड़लो असन लागली, मानतर मय आपलो जहोवा महापरभु उपरे पक्का भोरसा करले। 9 तेबे हुन दिने मोसा किरिया खाउन मोके बललो, ‘तुय तो महापरभु उपरे पक्का भोरसा करलीस, एईकाजे जोन भुंय-भाटामन ले तुय हिंडुन ईलीसीस हुन अमदेया काजे तुचो आउर तुचो थर-लर चो निज-बाटा होयदे’। 10 एदांय दख, जिदलदांय ले जहोवा, मोसा के ए बचन बलु रये, हुदलदांय ले इसराएलिमन टंग-टंगा भाटा ने बुलते जाते दुय कोड़ी पांच बरक होली आउर जहोवा आपलो बललो असन मोके जीव संगालो। एदांय मय चार कोड़ी पांच बरक चो होलेसे। 11 मोसा मोके पठालो दिने, जुद करतोने नोहले इआर-जाहार होतो ने, मोके जितलो सकत रये उतलेई सकत एबे बले आसे। 12 एईकाजे एदांय हुन डोंगरी परघन मोके देस, जेचो बारे ने जहोवा हुन दिने बलु रये। तुय तो हुन दिने सुनलीस होती हुता अनाकीमन* रउ आत आउर बड़े-बड़े भाड़ा-बिती सहरमन बले आसे। मानतर कोन जाने, जहोवा मोचो संग रयदे, आउर हुन बललो असन मय हुनमन के हुन थान ले निकराउन देयंदे।”
13 तेबे जहोसू हुनके बर दिलो, आउर हेबरोन सहर के जपुन्ने चो बेटा कालेब चो निज-बाटा करुन दिलो। 14 एईकाजे हेबरोन, कनजी जपुन्ने चो बेटा कालेब चो निज-बाटा आजी बले आसे। कसनबलले हुन इसराएलिमन चो जहोवा महापरभु उपरे पक्का भोरसा करते रये। 15 आगे हेबरोन चो नाव किरयत-अरबा रये। अरबा, अनाकीमन ले सबु ले बड़े बल बीता रये। असन बरन ले हुन देस् के जुद ले अस्तिर मिरली।