इसराएलिमन पाछे जीतलो परघनमन
13
जहोसू खुबे उमर चो डोकरा होउ रये; तेबे जहोवा हुनके बललो, “तुय खुबे उमर चो डोकरा होलिसीस आउर एबे बले खुबे परघनमन, इसराएल चो हक ने होतोर बाचलीसे 2 बललोने, पलिस्तीमन आउर गसूरीमन चो सपाय परघनमन 3 (मिसर देस् चो बेर-उदिया बाट चो सीहोर नंदी ले धरुन बेर-उदिया डेबरी बाटे एकरोन संद लग ले रतो सपाय के कनानीमन बलुआत; पलिस्तीमन चो पांचझन राजामन चो राजमन ए आत: गाजा, असदोद, असकलोन, गत, आउर एकरोन) आउर बेर-उदिया उजा बाटे चो अव्वीमन चो राजमन, 4 फेर एमोरीमन चो संद अपेक लग ले बेर-उदिया उजा बाटे कनानीमन चो सपाय राज आउर सीदोनीमन चो माराह राज 5 आउर गबालीमन चो परघन; बेर-उदिया बाटे बड़े-बड़े डोंगरी हेरमोन कटा चो बाल-गाद सहर ले धरुन लबानोन डोंगरीमन मंजी चो हमात कड़की लग ले, 6 फेर लबानोन चो डोंगरी परघन ले धरुन मिसरपोत-मईम लग ले रतो सपाय सीदोनीमन के बले मय इसराएलिमन चो पुरे ले निकराउन देयंदे; मानतर मोचो हुकुम असन ए राजमन के तुय इसराएलिमन चो हक ने करुन देस। 7 एईकाजे एदांय इसराएल चो नव बंसमन के आउर आदो मनस्से बंस चो लोग के निज-बाटा होतो काजे तुय ए भुंय के बाटुन देस।”जरदन नंदी चो बेर-उदिया बाटे चो भुंय के बाटतोर
8 जहोवा चो कमेया मोसा, मनस्से बंस चो आदो लोग संगे रूबेनीमन आउर गादीमन के बले जरदन चो बेर-उदिया बाटे बाटा देउन रलो 9 बललोने, अरनोन झोड़ी चो कड़की कटा अरोएर सहर ले धरुन, हुनी कड़की चो मंजी चो सहर आउर दीबोन सहर लग ले मेदबा लग चो सपाय सम-भुंय, 10 आउर अम्मोनीमन चो संद लग ले हेसबोन ने राज करतो एमोरीमन चो राजा सीहोन चो सपाय सहर 11 आउर गिलाद, गसूरीमन आउर माकातीमन चो परघनमन चो सपाय हेरमोन डोंगरी, आउर सलका लग ले सपाय बासान परघन। 12 असतारोत आउर एदरेई ने राज करतो बासान चो राजा ओग के (रपाईमन ले एकलाय ओग राजा बाचुन रये) मोसा एईमन के हराउन आपलो राजमन ले खेदलो। 13 मानतर इसराएलिमन, गसूरीमन आउर माकातीमन के हुनमन चो परघनमन ले नी निकराला; एईकाजे गसूरीमन आउर माकातीमन एबतले इसराएलिमन चो मंजी रयसोत।
14 लेवी बंस के मोसा काई बाटा नी दिलो; कसनबलले इसराएल चो जहोवा महापरभु चो बचन हिसाब ले, जहोवा महापरभु काजे चेगालो होम-जतरामन हुनमन चो बाटा होओ।
रूबेन बंस के दिलो भुंय-बाटा
15 मोसा, रूबेन बंस के हुनमन चो कुटुम हिसाब ले बाटा दिलो। 16 बललोने, अरनोन झोड़ी चो कड़की कटा चो अरोएर सहर ले धरुन आउर हुनी कड़की मंजी चो सहर आउर मेदबा लगे चो सपाय सम-भुंय 17 फेर हेसबोन आउर सम-भुंय चो सपाय सहरमन; दीबोन, बामोतबाल, बेत-बाल-मोन, 18 जहसा, कदेमोत, मेपात, 19 किरयातेम, सिबमा आउर जरदन कड़की चो डोंगरी उपर चो सेरेत-सहर, 20 बेत-पओर, पिसगा उतरानी आउर बेत-जसीमोत, 21 बललोने, सम-भुंय चो सपाय सहरमन, आउर हेसबोन ने राज करतो एमोरीमन चो राजा सीहोन चो सपाय राजमन। मोसा, सीहोन राजा के आउर मिदयान राज चो मुखियामन: एवी, रेकेम, सूर, हूर, आउर रेबा के मारु रये। हुनमन सीहोन चो राजपालमन रला आउर हुनी राज ने रते रला। 22 हुनमन संगे इसराएलिमन, जादु-टोनहा बोर चो बेटा बिलाम के बले खांडा ले मारला। 23 आउर रूबेनीमन चो संद जरदन नंदी कटा ले होली। रूबेनीमन चो बाटा, हुनमन चो कुटुम हिसाब ले एई सहरमन आउर गांवमन होली।
गाद बंस के दिलो भुंय-बाटा
24 फेर मोसा, गाद बंस के बले हुनमन चो कुटुम हिसाब ले बाटा देउन रलो 25 जाजेर सहर आउर गिलाद चो सपाय सहरमन, आउर अम्मोनीमन चो आदो परघन: अरोएर सहर जोन रब्बा सहर चो बेर-उदिया बाटे आसे 26 आउर हेसबोन ले रामत-मिसपे आउर बतोनीम, आउर महनेम लग ले धरुन दबीर संद ले, 27 आउर जरदन कड़की चो बेतहारम, बेतनिमरा, सुक्कोत, आउर सापोन आउर हेसबोन चो राजा सीहोन चो राज चो बाचलो भाग, आउर जरदन नंदी चो हुन पाट बेर-उदिया बाटे किनेरेत समूंद कटा अमरतले। 28 गादीमन चो बाटा हुनमन चो कुटुम हिसाब ले एई सहरमन आउर गांवमन होली।
मनस्से चो आदो बंस के दिलो भुंय-बाटा
29 फेर मनस्से चो आदो बंस के मोसा देउन रलो बाटा, हुनमन चो कुटुम हिसाब ले आदो मनस्सेमन चो बाटा होली। 30 बललोने, महनेम ले धरुन बासान चो ओग राजा चो सपाय राज आउर बासान ने बसलो जाईर परघन चो तीन कोड़ी सहरमन 31 आउर गिलाद चो आदो भाग, आउर असतारोत आउर एदरेई, जोन बासान चो राजा ओग चो राज चो सहरमन रये। ए सहरमन, हुनमन चो कुटुम हिसाब ले मनस्से चो बेटा माकीर चो आदो थर-लर चो निज बाटा होली।