कनान देस् के हक ने करतोर
11
हासोर चो राजा जाबीन ए खबर सुनुन, मादोन चो राजा जोबाब आउर सिमरोन आउर अकसाफ चो राजामन 2 आउर बेर-उदिया डेबरी बाट चो डोंगरी परघन चो राजामन आउर किनेरेत चो बेर-उदिया उजा बाटे अराबा चो राजामन आउर डोंगरी खाले चो राजामन आउर दोर सहर चो बेर-बुड़ती बाटे चो राजामन 3 आउर जरदन नंदी चो बेर-उदिया आउर बेर-बुड़ती दुनो बाटे रतो कनानीमन, एमोरीमन, हित्तीमन, परिज्जीमन आउर डोंगरी परघन ने रतो जबूसीमन आउर मिसपा परघन चो हेरमोन डोंगरी कटा रतो हिव्वीमन लगे बले दूत पठालो। 4 तेबे हुनमन आपलाहान सेना संगे निकरुन ईला, जोनमन समदूर कटा चो बारु असन खुबे रओत। हुनमन लगे खुबे घोड़ा आउर रथमन बले रये। 5 तेबे सपाय राजामन गोटोक सोर होउन इसराएलिमन चो बिरुद जुद करतो काजे मेरोम तरई कटा तमु गाड़ला।6 तेबे जहोवा, जहोसू के बललो, “हुनमन के नी डर, कसनबलले काली के इदलीदांय मय हुनमन सपाय के इसराएल चो हक ने करुन मोरायंदे। तुय हुनमन चो घोड़ामन चो मांडी चो नंद के कटाव आउर हुनमन चो रथ के डसाउन देस।” 7 तेबे जहोसू सपाय बीरमन संगे मेरोम तरई कटा उधापड़े अमरुन हुनमन के मारुक मुरियालो। 8 जहोवा हुनमन के, इसराएलिमन चो हक ने करुन दिलो। तेबे इसराएलिमन हुनमन के बड़े सहर सीदोन आउर मिसरपोत-मईम लगले आउर बेर-उदिया बाटे मिसपे भाटा लगले खेदुन नेउन मारला आउर हुनमन ले गोटोक के बले जीव नी छांडला। 9 तेबे जहोवा चो हुकुम हिसाब ले जहोसू, हुनमन संगे करलो बललोने, हुनमन चो घोड़ामन चो मांडी चो नंद के कटालो आउर हुनमन चो रथ के डसाउन दिलो।
10 हुदलदांय जहोसू हुताले बोहड़ुन एउन हासोर के जीतलो जोन हुता चो सपाय राजमन उपरे हक संगाते रये। जहोसू, हासोर चो राजा के खांडा ले मारलो 11 आउर हुता रतो सपाय लोग के खांडा ले मारुन नास करलो आउर हासोर सहर के डसाउन लाकड़ी उलटालो। 12 जहोसू हुन सपाय राजामन के आउर हुनमन चो सहरमन के जीतलो आउर जहोवा चो कमेया मोसा चो हुकुम असन हुनमन के खांडा ले मारुन नास करलो। 13 मानतर इसराएलिमन, जहोसू डसालो हासोर सहर के छांडुन आउर डोंगरी परघन चो कोनी सहर के नी डसाला। 14 एई सहरमन ले झीका-उड़मा करलो सपाय तीजमन आउर जनावरमन के इसराएलिमन आपलो काजे धरला। मानतर सपाय लोगमन के खांडा ले मारुन सत्यानास करला, एकलो के बले जीव नी छांडला। 15 जहोवा आपलो कमेया मोसा के हुकुम देउन रये, आउर मोसा, जहोसू के हुनी हुकुम दिलो आउर जहोसू उसनेची करलो। जोन-जोन हुकुम जहोवा मोसा के देउ रये; जहोसू हुनमन के पुरा करलो नोहलोर नी छांडलो।
जहोसू जीतलो परघनमन
16 तेबे जहोसू, डोंगरी परघन, बेर-उदिया उजा बाट चो परघन, सपाय गोसेन परघन आउर हुन डोंगरी खाले चो परघन, अराबा, इसराएल चो डोंगरी परघन आउर हुन डोंगरी खाले चो परघन 17 आउर सेईर चेगानी बाटे हालक डोंगरी ले धरुन हेरमोन डोंगरी कटा चो लबानोन कड़की चो बाल-गाद लग ले सपाय परघनमन के जीतलो आउर हुता चो सपाय राजामन के धरुन मोरते मारलो। 18 हुन सपाय राजामन चो बिरुद जुद करुन जीततो काजे जहोसू के खुबे दिन लागली। 19 गिबोन ने रतो हिव्वीमन के छांडुन आउर कोनी सहर चो लोगमन इसराएलिमन संगे मिला-मिसा नी होला। इसराएलिमन हुनमन सपाय के लड़ुन-लड़ुन जीतला। 20 जहोवा हुनमन चो मन के असन कटुर करलो कि हुनमन इसराएलिमन चो बिरुद जुद करुक निकरला, जेचोले हुनमन के इसराएलिमन सत्यानास करला। कसनबलले जहोवा चो मन-इछा रये आउर हुन, मोसा के असन हुकुम देउ रये, हुनमन के मुरे दया नी कर, मानतर सत्यानास कर।
21 हुदलदांय जहोसू डोंगरी परघन ने एउन, हेबरोन, दबीर, अनाब, आउर जहूदा चो डोंगरी परघन ने आउर इसराएल चो डोंगरी परघन ने रतो सपाय अनाकीमन के, हुनमन चो सहरमन संगे सत्यानास करलो। 22 इसराएलिमन चो देस् ने कोनी अनाकीमन* नी बाचला; मानतर गाजा, गत आउर असदोद ने कोनी-कोनी बाचला। 23 जसन जहोवा, मोसा के बलु रये, उसनेची जहोसू सपाय देस् के आपलो हक ने करलो; आउर हुन देस् के इसराएलिमन काजे हुनमन चो बंस हिसाब ले बाटुन दिलो। असन बरन ले इसराएलिमन के जुद ले अस्तिर मिरली।