इसराएलिमन, महापरभु चो साहरा ले एमोरीमन के हरातोर
10
जिदलदांय जरूसलेम चो राजा अदोनी-सेदक सुनलो कि जहोसू, एय सहर के जीतुन सपाय के सत्यानास करलो आउर जसन जरीहो आउर हुनचो राजा के करु रये, उसनेची एय सहर आउर हुनचो राजा के बले करलो आउर कसन ने गिबोनीमन, इसराएलिमन संगे मिला-मिसा होउन हुनमन चो मंजी रयसोत। 2 तेबे हुन आउर हुनचो लोगमन खुबे डरला कसनबलले गिबोन सहर, गोटोक खुबे बड़े राज-सहर असन रये आउर एय सहर ले बले बड़े रये। हुता रतो सपाय मनुकमन बीर रओत। 3 एईकाजे जरूसलेम चो राजा अदोनी-सेदक, हेबरोन चो राजा होहाम, जरमूत चो राजा पिराम, लाकीस चो राजा जापी आउर एगलोन चो राजा दबीर लगे ए खबर पठालो, 4 “मोचो लगे एउन मोचो साहरा करा आउर गिबोन चो लोग के मारुक जो, कसनबलले हुनमन जहोसू आउर इसराएलिमन संगे मिला-मिसा होलासे।” 5 एईकाजे ए पांचझन एमोरी राजामन बललोने, जरूसलेम, हेबरोन, जरमूत, लाकीस आउर एगलोन चो राजामन आपलाहान सेनामन के रूंडाला आउर गिबोन चो पुरे डेरा धरुन हुनचो बिरुद जुद करला।6 तेबे गिबोन चो लोग, गिलगाल चो तमु-भाटा ने जहोसू लगे खबर पठाला, “आपलो कमेयामन के नी छांड; झटके एउन आमचो साहरा हो आउर आमके बचाव। कसनबलले डोंगरी परघन ने रतो एमोरीमन चो सपाय राजामन आमचो बिरुद रूंडलासे।” 7 एईकाजे जहोसू आपलो सेना आउर सपाय बीरमन के धरुन गिलगाल ले निकरलो। 8 तेबे जहोवा, जहोसू के बललो, “हुनमन के नी डर, कसनबलले मय हुनमन के तुचो हक ने करुन दिलेसे। हुनमन ले गोटोक बले तुचो पुरे उबा रउक नी सकदे।” 9 तेबे जहोसू आपलो सेना संगे गिलगाल ले गुलाय राती हिंडुन गेलो आउर उधापड़े हुनमन ले लड़लो। 10 आउर जहोवा, हुनमन चो मने इसराएलिमन किरता डर उबजालो आउर इसराएलिमन, गिबोन लगे हुनमन के मोरते मारला आउर बेत-होरोन चो चेगानी ले खेदुन नेउन अजेका आउर मक्केदा अमरतले हुनमन के मोरते मारला। 11 फेर हुनमन इसराएलिमन चो पुरे ले पराउन बेत-होरोन चो उतरानी ने ईला, तेबे अजेका अमरतले, जहोवा बादरी ले बड़े-बड़े करा पकनामन घसराउन हुनमन के मोरालो; आउर जितरो लोग करा पकनामन ले मोरला, हुनमन चो गनती इसराएलिमन चो खांडा ले मोरलोमन ले आगर रये।
12 जोन दिने जहोवा, एमोरीमन के इसराएलिमन चो हक ने करुन दिलो, हुनी दिने जहोसू, इसराएलिमन चो पुरे जहोवा के बललो:
“ए बेर, तुय गिबोन उपरे,
आउर ए जोन, तुय अयालोन चो कड़की उपरे ठेबुन रा।”
13 इसराएलिमन आपलो बयरीमन ले पलटा धरतले
बेर आउर जोन हुताय ठेबुन रये।
ए गोट जासार नाव चो किताप ने लिखलोर आसे। सते, बेर बादरी मंजारे ठेबुन रये आउर गोटोक दिन पुरोतले नी बुड़ली। 14 एचोले आगे आउर एचोले पाछे केबई असन दिन नी होली, जोन दिने जहोवा कोनी मनुक चो गोट के धरलो। कसनबलले जहोवा इसराएलिमन काजे लड़ते रये।
15 तेबे जहोसू सपाय इसराएलिमन संगे गिलगाल चो तमु-भाटा ने बोहड़लो।
एमोरीमन चो पांचझन राजामन के मोरते मारतोर
16 हुन पांचझन राजामन पराउन मक्केदा चो करपन ने लुकला। 17 तेबे कोनी एउन जहोसू के खबर दिला: “आमी पांचझन राजामन के मक्केदा चो करपन ने लुकलोर दखलुसे।” 18 जहोसू बललो, “बड़े-बड़े पकनामन के उलटाउन करपन ने ओलतो बाट के ढाका आउर हुता लोगमन के राखा संगाहा। 19 मानतर तुमी हुता नी ठेबा, तुमचो बयरीमन के खेदुन नेउन मोरते मारा, आउर हुनमन के आपलाहान सहरे ओलुक नी दियास। कसनबलले तुमचो जहोवा महापरभु हुनमन के तुमचो हक ने करुन दिलोसे।” 20 जहोसू आउर इसराएलिमन हुनमन के मोरते मारला। मानतर हुनमन ले कोनी-कोनी बाचुन भाड़ा बिती सहर ने ओलला। 21 तेबे सपाय इसराएलिमन मक्केदा चो तमु-भाटा ने जहोसू लगे अस्तिर ले बोहड़ुन ईला आउर इसराएलिमन चो बिरुद ने कोनी बले काई गोटेयाउक नी सकला।
22 तेबे जहोसू हुकुम दिलो, “करपन बाट चो पकनामन के गुचाउन हुन पांचझन राजामन के निकराउन मोचो पुरे आना।” 23 हुनमन असनी करला, जरूसलेम, हेबरोन, जरमूत, लाकीस आउर एगलोन चो राजामन के करपन ले निकराउन हुनचो पुरे आनला। 24 जिदलदांय हुन राजामन के जहोसू लगे आनला, तेबे जहोसू इसराएल चो सपाय मनुकमन के हागदिलो। हुन आपलो संगे लड़ुक गेलो बीरमन चो मुखियामन के बललो, “लगे एउन ए राजामन चो टोडरा ने आपलाहान पांय मंडाहा।” तेबे हुनमन, लगे जाउन राजामन चो टोडरा ने पांय मंडाला। 25 आउर जहोसू हुनमन के बललो, “नी डरा, आउर तुमचो मन कुट-कुट नी होओ। ढाढ़ुस करा आउर चमकट राहा, कसनबलले जहोवा तुमचो सपाय बयरीमन के जेचो संगे तुमी लड़ासे, असने ची करेदे।” 26 एचो पाछे, जहोसू हुन राजामन के मोरते मारुन पांच ठन रूक ने ओराउन दिलो। सांज होओतले हुनमन के हुताय ओराउन रओत। 27 बेर बुड़तोदांय जहोसू हुकुम देतोके, हुनमन के रूक ले उतराउन हुनी करपन ने पकाउन दिला, जोन थाने हुनमन लुकुन रओत; आउर हुन करपन चो बाट के बड़े-बड़े पकनामन ले ढाकला। हुन एबतले असने आसे।
आउर खुबे एमोरी राजमन के जीततोर
28 हुनी दिने जहोसू, मक्केदा सहर के जीतुन नास करलो, आउर हुनचो राजा के आउर हुता रतो सपाय लोग के खांडा ले मोरते मारलो; हुन कोकेई जीव नी छांडलो। आउर जसन जरीहो सहर चो राजा के करुन रये, उसने ची मक्केदा सहर चो राजा के बले करलो।
29 तेबे जहोसू सपाय इसराएलिमन संगे मक्केदा ले निकरुन लिबना सहर बाटे गेलो आउर लिबना सहर चो बिरुद जुद करलो। 30 जहोवा लिबना सहर के बले हुनचो राजा संगे इसराएलिमन चो हक ने करुन दिलो। जहोसू हुता रतो सपाय लोग के खांडा ले मोरते मारलो; हुन कोकेई जीव नी छांडलो; आउर हुता चो राजा के बले उसने ची करलो जसन जरीहो चो राजा के करुन रये।
31 फेर जहोसू सपाय इसराएलिमन संगे लिबना ले निकरुन लाकीस सहर ने गेलो आउर सहर चो भोंवरक बेड़ुन जुद करलो। 32 जहोवा, लाकीस के इसराएल चो हक ने करुन दिलो। दुसर दिने हुनमन, हुनके जीतला। जसन लिबना चो सपाय लोगमन के खांडा ले मारुन रये उसने लाकीस सहर चो लोग के बले मारलो।
33 तेबे गेजेर चो राजा होराम, लाकीस सहर चो लोग के साहरा करतो काजे ईलो, आउर जहोसू, बीरमन संगे हुनमन के असन मारलो कि कोनी बले बाचुक नी सकला।
34 फेर जहोसू सपाय इसराएलिमन संगे लाकीस ले निकरुन एगलोन सहर ने गेलो आउर हुन सहर चो भोंवरक बेड़ुन जुद करलो। 35 हुनी दिने हुनमन के जीतलो आउर हुनमन के खांडा ले मोरते मारलो। जसन लाकीस चो सपाय लोगमन के नास करलो, उसने ची एगलोन सहर के बले नास करलो।
36 फेर जहोसू सपाय इसराएलिमन संगे एगलोन ले निकरुन हेबरोन सहर ने गेलो आउर हुनचो बिरुद जुद करलो। 37 हुनके जीतुन हुनचो राजा आउर हुन सहर चो सपाय लोग के खांडा ले मोरते मारलो, जसन जहोसू एगलोन सहर के करुन रये, उसनेची हुन हेबरोन सहर के बले करलो बललोने, हेबरोन आउर हुनचो भोंवरक रतो सपाय गांव चो लोगमन के सत्यानास करलो आउर कोकेई जीव नी छांडलो।
38 तेबे जहोसू सपाय इसराएलिमन संगे बोहड़ुन दबीर सहर ने गेलो आउर हुनचो बिरुद जुद करलो। 39 हुनके जीतुन हुनचो राजा आउर हुन सहर चो सपाय लोगमन के खांडा ले मारुन सत्यानास करलो आउर कोकेई जीव नी छांडलो; जहोसू जसन हेबरोन, लिबना आउर हुनमन चो राजामन के करुन रये उसनेची दबीर आउर हुनचो राजा के बले करलो।
40 असन बरन ले जहोसू, सपाय राजमन के आपलो हक ने करलो। डोंगरी परघन, बेर-उदिया उजा बाट चो परघन, डोंगरी खाले आउर डोंगरी उतरानी चो सपाय लोगमन के आउर हुनमन चो राजामन के हुन मोरते मारलो आउर इसराएल चो जहोवा महापरभु चो हुकुम असन कोकेई जीव नी छांडलो। हुता चो सपाय जीवमन के सत्यानास करलो। 41 जहोसू कादेस-बरने ले धरुन गाजा लगले आउर गोसेन परघन चो बेर-उदिया डेबरी बाट चो गिबोन लगले सपाय लोगमन के मोरते मारलो। 42 जहोसू गोटकी समया ने ए सपाय राजामन आउर हुनमन चो राजमन के जीतलो, कसनबलले इसराएल चो जहोवा महापरभु, हुनमन काजे लड़ते रये। 43 तेबे जहोसू सपाय इसराएलिमन संगे गिलगाल चो तमु-भाटा ने बोहड़ुन ईलो।