गिबोनीमन, इसराएलिमन के ठगलो किरता डंड
9
जरदन चो बेर-बुड़ती बाटे चो सपाय राजामन सुनला, इसराएलिमन एय सहर के जीतला। हुनमन डोंगरी परघन, डोंगरी खाले चो परघन आउर महासमदूर खंडे-खंडे लबानोन अमरतले रतो हित्ती, एमोरी, कनानी, परिज्जी, हिव्वी आउर जबूसी लोगमन उपरे राज करते रओत। 2 तेबे हुनमन गोटोक सोर होउन जहोसू आउर इसराएलिमन ले जुद करतो काजे रूंडला।3 जेबे गिबोन ने रतो हिव्वीमन सुनला, जरीहो आउर एय सहर संगे जहोसू, काय-काय करलोसे, 4 तेबे हुनमन, जहोसू के ठगतो काजे राजदूतमन चो भेस धरुन आपलो गदाहामन ने फाटलो जुना बोरामन, आउर अंगुर-मंद धरतो फाटलो-टुटलो चामड़ा चो खिललो तुमामन के लतुन 5 छीड़लो-टुटलो जुना पनई के खिलुन पींदला आउर देहें ने फाटलो फटई पींदला आउर खातो काजे सुकलो आउर बसयालो रोटी धरुन 6 गिलगाल चो तमु-भाटा ने जहोसू लगे जाउन हुनके आउर इसराएलिमन के बलुक मुरियाला, “आमी खुबे लापी देस् ले ईलुसे। एईकाजे तुमी आमचो संगे किरिया खाहा।” 7 मानतर इसराएलिमन, हिव्वीमन* के बलला, “कोन जाने, तुमी आमचो मंजी ने ची रउआहास होती? फेर आमी तुमचो संगे कसन ने किरिया खाउआंव?” 8 हुनमन जहोसू के बलला, “आमी तुचो कमेया आंव।” तेबे जहोसू हुनमन के पुछलो, “तुमी कोन आहास, आउर कहां ले ईलासाहास?” 9 हुनमन हुनके बलला, “तुचो कमेयामन खुबे लापी देस् ले तुचो जहोवा महापरभु चो नाव सुनुन ईलुसे। मिसर देस् ने, हुनचो करलो अचरित बुतामन आउर 10 जरदन चो हुन पाट रतो एमोरेयामन चो दुनो राजामन बललोने, हेसबोन चो राजा सीहोन आउर असतारोत ने रतो बासान चो राजा ओग संगे काय-काय करलोसे, ए सपाय के आमी सुनलुसे। 11 एईकाजे, आमचो थान चो धरम-सियानमन आउर आमचो देस् ने रतो सपाय लोगमन आमके बलला, ‘बाट-भाता धरुन हुनमन के भेटुक जाहा आउर हुनमन के बला, आमी तुमचो कमेया आंव। एदांय तुमी आमचो संगे किरिया खाहा’। 12 जोन दिने आमी तुमचो लगे एतो काजे निकरलु, हुन दिने आमी आपलाहान घर ले तोपलो आउर नंगत रोटी धरु रलु, मानतर एबे दखा, ए सुकली आउर बसयालीसे। 13 आउर अंगुर-मंद भोरलोदांय ए तुमामन नवा रली, मानतर एबे दखा, टुटलीसे। आमचो फटई आउर पनई खुबे लापी ले हिंडुन ईलो किरता फाटून जुना होलीसे।” 14 तेबे इसराएली मुखियामन जहोवा के नी पूछुन हुनमन चो खादी-पीदी ले खिंडिक आपलो नीति हिसाब ले खादला। 15 आउर जहोसू हुनमन संगे मिला-मिसा होउन हुनमन के जीव छांडतो किरिया खादलो, आउर इसराएली मंडली मुखियामन बले हुनमन संगे किरिया खादला।
16 मानतर हुनमन संगे बायदा करलो तीन दिन पाछे, इसराएलिमन के खबर मिरली कि हिवीमन तो हुनमन चो घर-लग चो लोग आत आउर हुनमन चो मंजारे ची बसलासोत। 17 एईकाजे इसराएलिमन निकरुन तीसर दिने हुनमन चो सहरमन ने अमरला बललोने, गिबोन, कपीरा, बेरोत, आउर किरयत-आरीम। 18 मानतर इसराएलिमन हुनमन के नी मारला, कसनबलले मंडली मुखियामन, हुनमन संगे इसराएल चो महापरभु चो नाव ने किरिया खाउ रओत। तेबे सपाय मंडली मुखियामन चो बिरुद गुरमुरुक मुरियाला। 19 तेबे मुखियामन सपाय मंडली लोगमन के बलला, “आमी हुनमन संगे इसराएल चो महापरभु जहोवा चो नाव ने किरिया खादलुसे, एईकाजे हुनमन के छिंउक नी सकुं। 20 आमी खादलो किरिया असन हुनमन के जीव छांडु, नोहले आमचो खादलो किरिया किरता आमचो उपरे महापरभु बाटले जंजाल रीस पड़ेदे।” 21 एईकाजे मुखियामन हुनमन के जीवत छांडला। मानतर हुनमन के सपाय मंडली काजे दारू गोंदतो आउर पानी दुआरतो कमेयामन बनाला।
22 जहोसू, गिबोनीमन के हागदेउन बललो, “तुमी तो आमचेई मंजारे रतो लोग आहास, फेर तुमी, ‘आमी खुबे लापी देस् चो आंव’ बलुन काय काजे ठगलास? 23 एईकाजे एदांय तुमी सराप पावलासाहास, आउर तुमीमन सपाय मोचो महापरभु चो मंडली काजे दारू गोंदतो आउर पानी दुआरतो कमेया होआसे।” 24 हुनमन जहोसू के बलला, “तुचो कमेयामन के ए पक्का सांगुन रओत कि तुचो महापरभु जहोवा आपलो कमेया मोसा के हुकुम देउन रये कि तुमके सपाय देस् देओ आउर हुन देस् ने रतो सपाय लोगमन के तुमचो पुरे ले सत्यानास करो। एईकाजे आमके तुमचो किरता जीव चो डर चेपाली गुने असन बुता करलु। 25 एबे आमी तुचो हक ने आंसु, जसन तुके नंगत लागेदे, आमचो संगे उसने बेबार कर।” 26 तेबे हुन, हुनमन संगे असने ची करलो आउर हुनमन के इसराएलिमन चो हाथ ले मोरतो ले बचालो। 27 मानतर हुनी दिन ले जहोसू हुनमन के इसराएली मंडली काजे आउर जहोवा बाछलो ठान चो बेदी काजे दारू गोंदतो आउर पानी दुआरतो कमेया बनालो। उसनेची हुनमन एबतले आसोत।