एय सहर के जीततोर
8
जहोवा, जहोसू के बललो, “नी डर, मुरुसनाय नी हो। करांड बांदुन सपाय बीरमन संगे एय सहर ने जाउन जुद कर। सुन, मय एय सहर के हुनचो राजा, रयतमन, आउर हुनचो राज के तुचो हक ने करलेसे। 2 जसन तुय जरीहो सहर आउर हुनचो राजा संगे करलीस, उसनेची एय सहर आउर हुनचो राजा संगे कर। मानतर तुमी हुता चो जनावर आउर झीका-उड़मा करलो तीजमन के ची आपलो काजे संगाउक सकास। एईकाजे हुन सहर चो पाटकुती घत ने राहा।”3 तेबे जहोसू सपाय बीरमन संगे एय सहर के लड़ुक जातो काजे तियार होलो। जहोसू तीस हजार बीरमन के बाछुन राती बेरा हुकुम देउन पठालो, 4 “सुना, तुमी हुन सहर चो पाटकुती घत ने बसुन राहा। सहर ले खुबे लापी नी जाहा मानतर सपाय चेत ने राहा। 5 मय आउर मोचो संग चो लोग, हुन सहर लगे जाउंदे आउर आगे चो असन हुनमन आमचो ले लड़ुक निकरदे, आमी हुनमन चो पुरे ले पराउंदे। 6 तेबे हुनमन असन बिचारदे, ‘एमन आगे चो असन आमचो पुरे ले परायसोत’ बलुन आमके खेदुन नेदे। असन बरन ले आमी हुनमन के सहर ले लापी नेउंदे। 7 तेबे तुमी घत ले उठुन सहर के आपलो हक ने करा। कसनबलले तुमचो जहोवा महापरभु हुन सहर के तुमचो हक ने करुन देयदे। 8 जेबे सहर के आपलो हक ने करासे, तेबे जहोवा चो हुकुम असन हुन सहर के डसाउन दियास। दखा, मय तुमके हुकुम दिलेसे।” 9 एईकाजे जहोसू असन बलुन हुनमन के पठालो आउर हुनमन जाउन बेतेल आउर एय सहर मंजारे आउर एय सहर चो बेर-बुड़ती बाटे घत ने रला; मानतर जहोसू हुनी राती तमु-भाटा* ने लोगमन संगे रलो।
10 जहोसू बड़े बियाने उठलो आउर बीरमन के तियार करलो, आउर इसराएली धरम-सियानमन संगे लोगमन चो पुरे-पुरे एय सहर बाटे गेलो। 11 सपाय बीरमन बले हुनमन संगे गेला, आउर एय सहर लगे अमरुन सहर चो बेर-उदिया डेबरी बाटे तमु गाड़ला। हुनमन चो आउर एय सहर मंजारे कड़की रये। 12 हुन पांचक हजार बीरमन के बाछुन बेतेल आउर एय सहर चो मंजारे, सहर चो बेर-बुड़ती बाटे घत ने बसालो। 13 आदो बीरमन बेर-उदिया डेबरी बाटे तमु गाड़ला आउर बाचलो बीरमन सहर चो बेर-बुड़ती बाटे घत ने बसला, मानतर जहोसू हुनी राती कड़की ने रलो। 14 जिदलदांय एय सहर चो राजा हुनमन के दखलो, तेबे बियाने झटके आपलो सपाय रयतमन संगे अराबा चो पुरे चो भाटा ने इसराएलिमन के लड़ुक निकरलो। मानतर हुन नी जानते रये, सहर चो पाटकुती लोगमन घत ने बसलासे। 15 तेबे जहोसू आउर इसराएलिमन हारलो असन टंग-टंगा भाटा बाटे पराला। 16 एईकाजे एय सहर चो लोग चिचियाउन-चिचियाउन सपाय लोगमन के रुंडाला, आउर जहोसूमन के खेदते-खेदते हुनमन सहर ले लापी गेला। 17 एय सहर आउर बेतेल सहर चो सपाय मनुकमन इसराएलिमन के खेदुन नीला आउर हुनमन इसराएलिमन के खेदतोदांय आपलो सहर चो देवड़ी के उगाड़ा छांडला।
18 तेबे जहोवा, जहोसू के बललो, “आपलो हाथ चो खांडा के एय सहर बाटे उठाव; कसनबलले मय हुनके तुचो हक ने देयंदे।” आउर जहोसू आपलो हाथ चो खांडा के सहर बाटे उठालो। 19 हुनचो हाथ उठाते खन घत ने बसलो लोग झटके उठला, आउर पराते जाउन सहर ने ओलला आउर सहर के आपलो हक ने करुन डसाला। 20 जिदलदांय एय सहर चो मनुकमन पाटकुती उलटुन दखला, तेबे सहर ने कुमला उठते रये। हुनमन के भाम चेपाली आउर कहांय पराउक नी सकला। कसनबलले टंग-टंगा भाटा बाटे परातो इसराएलिमन बोहड़ुन आपलो खेदतो लोगमन के मोरते मारला। 21 जिदलदांय जहोसू आउर इसराएलिमन दखला, घतेयारमन सहर के आपलो हक ने करला, आउर हुताले कुमला उठेसे, तेबे हुनमन बले बोहड़ुन एउन एय सहर चो लोगमन के मारुक मुरियाला। 22 एय सहर चो इसराएलिमन बले सहर ले निकरुन हुनमन ले लड़ला। एईकाजे हुनमन इसराएलिमन चो मंजी फसला। इसराएलिमन तो हुनमन के भोंवरक छेकुन मारला कि हुनमन ले कोनी बले बाचुन पराउक नी सकला। 23 मानतर इसराएलिमन, एय चो राजा के जीवत धरुन जहोसू लगे आनला।
24 जेबे इसराएलिमन के खेदुन नेतो एय सहर चो सपाय लोग के टंग-टंगा भाटा ने खांडा ले मोरते मारला, तेबे सपाय इसराएलिमन एय सहर ने बोहड़ुन एउन हुता चो बाचलो लोग के बले आपलो खांडा ले मोरते मारला। 25 हुन दिने मोरलो सपाय बायले-मनुक बारा हजार रओत। एय सहर ने इतलेची लोग रते रओत। 26 एय सहर ने रतो सपाय लोग के सत्यानास करतले जहोसू आपलो खांडा उठालो हाथ के खाले नी करलो। 27 जहोवा, जहोसू के दिलो हुकुम असन जनावरमन आउर सहर ले झीका-उड़मा करलो तीजमन के इसराएलिमन धरला। 28 तेबे जहोसू एय सहर के डसाउन रन-बन करलो आउर एबतले हुन असने ची आसे। 29 सांज होओतले एय चो राजा के रूके ओराउन रओत; आउर बेर बसतो बेरा जहोसू चो हुकुम ले हुनचो मोड़ी के रूक ले उतराउन सहर चो देवड़ी पुरे पकाला, आउर हुनचो मोड़ी उपरे खुबे पकना कुड़ाला जोन एबतले हुता आसे।
एबाल डोंगरी ने नियम-कानुन सुनातोर
30 तेबे जहोसू, इसराएल चो जहोवा महापरभु काजे एबाल बड़े डोंगरी ने गोटोक बेदी बनालो। 31 जहोवा चो कमेया मोसा, इसराएलिमन के हुकुम देउ रये, आउर मोसा चो नियम-कानुन चो किताप ने लिखलोर आसे, “गुला* पकनामन चो गोटोक बेदी बनाहा जोन पकनामन ने लोहो ओजार ले काई बुता नी करु रओत”, उसनेची हुनमन बनाला आउर हुता जहोवा काजे होम-जतरा आउर मिला-मिसा जतरा चेगाला। 32 आउर जहोसू, इसराएलिमन चो पुरे मोसा लिखलोर नियम-कानुन चो नकल, बेदी चो पकनामन ने लिखालो। 33 सपाय इसराएलिमन बललोने, सपाय परगांयामन आउर रयतमन, हुनमन चो धरम-सियानमन, मुखियामन आउर नियाव करुमन जहोवा चो बायदा चो डोली चो भोंवरक आउर डोली बोअलो लेवी पुजारीमन चो पुरे उबा होला। जहोवा चो कमेया मोसा दिलो हुकुम हिसाब ले इसराएली लोगमन बर पावतो काजे आदो लोगमन गरिजीम डोंगरी पुरे आउर आदो लोगमन एबाल डोंगरी पुरे उबा होला। 34 एचो पाछे जहोसू बर आउर सराप चो सपाय नियम, जसन-जसन नियम-कानुन चो किताप ने लिखलोर आसे, उसनेची पढ़ुन सुनालो। 35 मोसा हुकुम देउ रलो सपाय गोटमन के जहोसू, इसराएली मंडली, बायले-मनुकमन, पिला-झीलामन आउर हुनमन संगे रतो परदेसियामन चो पुरे पढ़ुन सुनालो। हुन, मोसा चो गोटमन ले काई गोट के नी छांडलो।