आकान चो पाप किरता मोरना
7
मानतर इसराएलिमन महापरभु काजे अलगालो तीज ने पतेयातो लाईक नी रला, बललोने, जहूदा बंस चो जेरह चो पुती, जबदी चो नाती, आउर करमी चो बेटा आकान, महापरभु काजे अलगालो तीज ले खिंडिक धरलो। एईकाजे जहोवा, इसराएलिमन उपरे रीस होलो।2 जहोसू, कोनी-कोनी मनुक के जरीहो ले एय नाव चो सहर ने पठालो, जोन बेत-आवेन लगे बेतेल चो बेर-उदिया बाटे आसे। हुन, हुनमन के बललो: “तुमी जाउन हुन देस् चो भेद के जानुन इआ।” तेबे हुन मनुकमन जाउन एय सहर चो भेद जानुन ईला। 3 हुनमन जहोसू लगे एउन बलला: “सपाय लोगमन के हुता जाउक नी लागे, दुय-तीन हजार मनुकमन जाउन एय सहर के जीतुक सकुं। कसनबलले हुनमन खिंडिक असन लोग आसोत।” 4 एईकाजे तीनक हजार मनुकमन हुता गेला; मानतर एय सहर चो लोगमन ले डरुन पराउन ईला। 5 तेबे एय सहर चो लोगमन इसराएलिमन ले छत्तीसक मनुकमन के मोरते मारला आउर आपलो सहर देवड़ी ले धरुन सबारीम लग ले खेदुन नीला आउर उतरानी ने मोरते मारला। तेबे इसराएलिमन चो मन निमल होली आउर हुनमन के भाम चेपाली।
6 तेबे जहोसू करलाउन आपलो फटई चीरलो आउर इसराएली धरम-सियानमन संगे जहोवा चो बायदा चो डोली पुरे सांज होओतले पाटा पड़ुन रलो; आउर हुनमन आपलाहान मुंडे धुरला रिकाय होला। 7 जहोसू बललो, “हाय, जहोवा महापरभु! काय, तुय आपलो लोगमन के, एमोरीमन चो हाथ ले नास करातो काजे जरदन नंदी नाहकाउन आनलिसीस? नंगत होती, आमी जरदन चो हुनी पाट रतु! 8 हाय परभु, एदांय मय काय बलुआंय, इसराएलिमन आपलो बयरीमन ले डरुन पराउन ईला! 9 एके सुनुन, कनानीमन आउर हुन देस् चो सपाय लोग, आमके भोंवरक छेकुन आमचो नाव मंजपुर ले मेटादे। फेर तुय आपलो बड़े नाव काजे, काय करसे?”
10 जहोवा, जहोसू के बललो, “उठ! उबा हो, तुय काय काजे भुंये पाटा पड़लीसीस? 11 इसराएलिमन पाप करलासोत आउर हुनमन संगे मोचो करलो बायदा के टुटाला। हुनमन अलगालो तीज ले काई चोरला, हुनमन फंद गोटेयाला आउर चोरलो तीज के आपलो तीजमन संगे लुकाला। 12 एईकाजे हुनमन आपलो बयरीमन के डरुन परायसोत आउर आपलो बयरीमन पुरे उबुक नी सकोत। कसनबलले इसराएलिमन आपलेई किरता सत्यानास होतो काजे खुड़सोत। तुमी आपलो मंजी ले अलगालो तीज के नास नी करलास जाले, मय तुमचो संगे नी रयें। 13 ‘तुय उठ! लोगमन के सुद कर। हुनमन के बल, बियान पावतोले आगे आपने के सुद करा, कसनबलले इसराएल चो जहोवा महापरभु बलेसे, ए इसराएलिमन, तुमचो मंजी अलगालो तीजमन आसे, जिदलदांय ले अलगालो तीजमन के आपलो मंजी ले नी गुचाहासे, हुदलदांय ले तुमी आपलो बयरीमन पुरे उबा रउक नी सकास। 14 एईकाजे बियाने तुमी बंस-बंस हिसाब ले उबा होआसे आउर जोन बंस के जहोवा धरेदे हुनचो गोटोक-गोटोक थर चो लोग पुरे एओत आउर जोन थर के जहोवा धरेदे हुनचो घर-घर चो लोग पुरे एओत, आउर जोन घर-लोग के जहोवा धरेदे, हुन घर चो मनुकमन गोटोक-गोटोक करुन पुरे एओत। 15 जोन मनुक अलगालो तीज के लुकालोर धरा पड़ेदे, हुनके आउर जोन बले हुनचो आय सपाय के डसाउन दियास। कसनबलले हुन जहोवा चो बायदा के टुटालोसे आउर इसराएल ने अडरा बुता करलोसे’।”
16 जहोसू बियाने उठुन इसराएलिमन के बंस-बंस हिसाब ले बायदा चो डोली पुरे नीलो आउर जहूदा बंस धरा पड़ली। 17 हुन, जहूदा बंस चो लोग के लगे आनलो आउर जेरह चो थर धरा पड़ली। जेरह थर चो गोटोक-गोटोक घर-लोग के लगे आनलो आउर जबदी घर-लोग धरा पड़ला। 18 जबदी घर चो लोग के उबा करलो आउर जहूदा बंस चो जेरह चो पुती, जबदी चो नाती, आउर करमी चो बेटा आकान धरा पड़लो। 19 तेबे जहोसू, आकान के बललो, “ए मोचो बेटा, इसराएल चो जहोवा महापरभु चो मयमा कर आउर जोन बले तुय करलिसीस जहोवा पुरे मान। मोके सांग, तुय काय करलीस; मोचोले काई नी लुकाव।” 20 तेबे आकान, जहोसू के बललो, “सते, मय इसराएल चो जहोवा महापरभु चो बिरुद पाप करलेसे। 21 झीका-उड़मा करलो तीजमन ने मय, सिनार *† चो गोटोक सुंदर बीती ओड़ना आउर दुय सव रूपा चो सिक्कामन आउर सोन चो गोटोक ईटा (जेचो भार पचास ठन सोन चो सिक्कामन चो इतलो) के दखुन लालच करले आउर हुनके धरले। हुनमन के मोचो तमु भीतरे गाड़लोर आसे आउर सपाय चो खाले रूपा आसे।”
22 तेबे जहोसू दूतमन के पठालो आउर हुनमन पराते जाउन दखला, सपाय तीजमन हुनचो तमु भीतरे गाड़लोर रये आउर सपाय चो खाले रूपा रये। 23 हुनमन सपाय तीजमन के तमु ले निकराउन जहोसू आउर इसराएलिमन लगे आनला; आउर सपाय के जहोवा पुरे संगाला। 24 तेबे जहोसू आउर सपाय इसराएलिमन, जेरह कुटुम चो आकान के, रूपा, ओड़ना, सोन चो ईटा, हुनचो बेटा-बेटीमन, गाय-बयलामन, गदाहामन, छेरी-मेंडीमन, हुनचो तमु आउर जोन बले हुनचो रये, हुन सपाय संगे आकोर कड़की ने नीला। 25 तेबे जहोसू हुनके बललो, “तुय काय-काजे आमके इतलो दुख-तकलीस दिलीस? आजी जहोवा तुके डंड देयदे।” तेबे सपाय इसराएलिमन हुनमन के पकना पकाउन मोरते मारला; आउर हुनमन के डसाउन उपरे पकना कुड़ाला। 26 तेबे जहोवा चो जंजाल रीस थामली। हुनमन उपरे कुड़ालो पकना एबतले आसे। एईकाजे हुन ठान चो नाव आजी बले, आकोर कड़की* आय।