जरीहो सहर चो सत्यानास
6
इसराएलिमन चो डर किरता जरीहो चो देवड़ी के रोजे ढाकुन रते रओत। कोनी भीतरे-बाहरे इयार-जाहार नी होते रओत। 2 जहोवा, जहोसू के बललो, “दख, मय जरीहो के, हुता चो राजा आउर हुनचो सेना के तुचो हाथे करुन देयंसे। 3 एईकाजे तुय आउर तुचो बीरमन, दिन ने हारक हुन सहर चो भोंवरक किंदरुन इआ, छय दिनतले उसनेची करते राहा। 4 आउर सात झन पुजारीमन मेंडा-सींग चो सात ठन तोड़ीमन धरुन बायदा चो डोली पुरे-पुरे हिंडोत। फेर सातवां दिने तुमी सहर चो भोंवरक सात हार किंदरा आउर पुजारीमन तोड़ी फूकते हिंडोत। 5 जिदलदांय हुनमन मेंडा-सींग चो तोड़ी खुबेदांय ले फूकते रदे, तोड़ी फूकतोके सुनुन सपाय लोग खुबे जोर ले चिचियाओत। तेबे सहर चो भाड़ा भोसड़ेदे आउर सपाय लोग आपलो-आपलो ठान ले सहर भीतरे जाहा।” 6 एईकाजे नून चो बेटा जहोसू, पुजारीमन के हागदेउन बललो: “जहोवा चो बायदा चो डोली के बोआ आउर सात झन पुजारीमन मेंडा-सींग चो सात ठन तोड़ीमन धरुन हुनचो पुरे-पुरे हिंडोत।” 7 फेर हुन लोगमन के बललो, “जाहा, सहर चो भोंवरक किंदरुन इआ। हतियार धरलो मनुकमन, जहोवा चो डोली पुरे-पुरे हिंडा।”8 जहोसू लोगमन ले गोटेयालो पाछे, हुन सात झन पुजारीमन जोन मेंडा-सींग चो सात ठन तोड़ी धरुन रओत जहोवा चो पुरे ले तोड़ी फूकते गेला आउर जहोवा चो बायदा चो डोली के बोउन पुजारीमन पाट-पाट गेला। 9 हतियार धरलो बीरमन तोड़ी फूकतो पुजारीमन चो पुरे-पुरे हिंडला। बाचलो राखा करुमन बायदा चो डोली चो पाट-पाट हिंडला। हुदलदांय पुजारीमन तोड़ी फूकते ची रला। 10 जहोसू लोगमन के हुकुम दिलो: “जिदलदांय ले मय तुमके चिचियातो काजे हुकुम नी देयें, तुमी नी चिचियाहा। तुमचो टोंड ले गोटोक गोट बले नी निकरो। हुकुम दिले ची चिचियाहा।” 11 एईकाजे जहोवा चो डोली के सहर चो भोंवरक हारक किंदरालो पाछे, हुनमन तमु-भाटा ने एउन राती हुताय ठेबला।
12 जहोसू बड़े बियाने उठलो आउर पुजारीमन जहोवा चो बायदा चो डोली के बोअला। 13 सातो पुजारीमन मेंडा-सींग चो सात ठन तोड़ीमन धरुन जहोवा चो बायदा चो डोली पुरे फूकते हिंडला। पुजारीमन चो पुरे हतियार धरलो बीरमन हिंडला, बाचलो राखा करुमन जहोवा चो बायदा चो डोली चो पाट-पाट हिंडला। हुदलदांय पुजारीमन तोड़ी फूकते ची रला। 14 असन बरन ले हुनमन दुसर दिने बले सहर चो भोंवरक हारक किंदरुन तमु-भाटा ने एउन हुताय रला। छय दिनतले हुनमन असने ची करते रला।
15 फेर सातवां दिने, हुनमन बड़े बियाने उठुन उसनेची सहर चो भोंवरक सात हार किंदरला। हुनी गोटकीचे दिने हुनमन सात हार किंदरला। 16 सातवां हार किंदरतो बेरा पुजारीमन तोड़ी फूकते रओत। हुदलीदांय जहोसू लोगमन के बललो: “खुबे जोर ले चिचियाहा। कसनबलले जहोवा तुमके ए सहर दिलोसे। 17 सहर आउर जोन बले हुता आसे, सपाय के जहोवा बाटले सत्यानास करतो काजे अलगालोर आसे। मानतर राहाब बेसवा आउर हुनचो घरे रतो लोग ची बाचदे। कसनबलले हुन, आमी पठालो भेदियामन के लुकाउन रली। 18 दखा, तुमी अलगालो सत्यानास करतो तीजमन ले लापी राहा। अलगालो तीजमन के लालच करुन हुताले तुमी काई बले नी धरा, नोहले तुमचो किरता इसराएलिमन उपरे बिपती पड़ेदे आउर हुनमन चो तमु-भाटा सत्यानास होयदे। 19 सपाय सोन-रूप, कांस आउर लोहा चो थारा-बटकामन जहोवा काजे पवितर आय, हुनमन के जहोवा चो भंडार ने संगाहा।” 20 तेबे लोगमन चिचियाला आउर पुजारीमन तोड़ी फूकते रओत। तोड़ी फूकतो के सुनुन लोगमन खुबे जोर ले चिचियाला हुदलीदांय सहर चो भाड़ा भोसड़ली। लोगमन सहर भीतरे ओलुन हुनके आपलो हक ने करला। 21 आउर हुनमन बायले-मनुक, जुवान-डोकरा, गाय-बयला, छेरी-मेंडी, गदाहा आउर जितलो बले सहर ने रला, सपाय के खांडा ने मारुन सत्यानास करला।
22 तेबे जहोसू हुन देस् चो भेद जानुक गेलो दुनो भेदियामन के बललो, “हुन बेसवा घरे जाउन आपलो किरिया खादलो असन हुनके आउर हुनचो संगे रतो लोग के निकराउन आना।” 23 एईकाजे हुन दुनो जुवान भेदियामन, राहाब घर भीतरे जाउन हुनके आउर हुनचो आया-बुआ, भाई-बईन आउर जोन बले हुता रओत, हुनचो सपाय कुटुम-लोग के निकराउन आनला आउर इसराएलिमन चो तमु-भाटा चो बाहरे बसाला। 24 तेबे हुनमन, सहर के आउर जोन बले हुता रये सपाय के डसाला। सोजे सोन-रूप, कांस आउर लोहा चो थारा-बटकामन आउर नकी-भंडवामन के जहोवा चो मंदिर चो भंडार ने संगाला। 25 जहोसू, राहाब बेसवा आउर हुनचो कुटुम-लोग चो जीव बचालो आउर एबतले हुनचो कुटुम-लोग इसराएलिमन चो मंजी ने रयसोत। कसनबलले जहोसू, जरीहो चो भेद जानुक पठालो भेदियामन के राहाब लुकाउन रली।
26 हुदलीदांय जहोसू, इसराएलिमन चो पुरे असन किरिया खादलो,
“जोन मनुक जरीहो सहर के फेर बनायदे
हुनके जहोवा बाटले सराप मिरो!
जेबे हुन, हुनचो पाया खोड़ेदे, तेबे हुनचो पईलात बेटा मोरेदे,
जेबे हुनचो देवड़ी बनायदे, तेबे हुनचो नानी बेटा मोरेदे!”
27 जहोवा जहोसू संगे रये आउर जहोसू चो नाव सपाय देस् ने उड़ली।