इसराएली मनुकमन चो खतना
5
जिदलदांय जरदन चो बेर-बुड़ती बाटे रतो एमोरीमन चो सपाय राजामन आउर समदूर लगे रतो कनानीमन चो सपाय राजामन सुनला, जहोवा, इसराएलिमन चो पुरे ले हुनमन नाहकतले जरदन चो पानी सुकाउन रये। तेबे इसराएलिमन चो डर किरता हुनमन चो मन थरथरली आउर हुनमन चो जीव ने जीव नी रये।2 हुदलदांय जहोवा जहोसू के बललो, “धार बिती कडरीमन बनाउन जेचो खतना नी होलीसे हुन इसराएली मनुकमन चो खतना कराव।” 3 तेबे जहोसू धार बिती कडरीमन बनाउन सपाय इसराएली मनुकमन चो खतना करालो, हुनी ठान के गिबत-हारालोत* बलुआत। 4 जहोसू, मनुकमन चो खतना एईकाजे करालो कि जोन खतना होलो इसराएली मनुकमन आउर बीरमन मिसर देस् ले निकरुन रला, हुनमन सपाय टंग-टंगा भाटा ने मोरला। 5 मिसर देस् ले निकरलो सपाय मनुकमन चो तो खतना होउ रये। मानतर मिसर ले निकरलो पाछे चो पीड़ी जितलो टंग-टंगा भाटा ने बुलतो बेरा जनमु रओत, हुनमन ले कोचई खतना नी होउन रये। 6 कसनबलले इसराएलिमन तो चालीस बरक ले टंग-टंगा भाटा ने बुलते रला, आउर सपाय इसराएलिमन आउर जितरो बीरमन मिसर देस् ले निकरुन रला, हुनमन सपाय जहोवा चो गोट के नी मानलो किरता मोरुन गेला। जहोवा हुनमन ले किरिया खाउन रये, जोन देस् के मय तुमचो पुरखामन संगे किरिया खाउन तुमके देयंदे बलुन रयें, हुन देस् के मय तुमके नी दखायें जोन देस् ने गोरस आउर ओंडार-तेल बोहेसे। 7 तेबे टंग-टंगा भाटा बाट ले जातो बेरा हुनमन चो जनमलो पिलामन चो खतना जहोसू करालो। कसनबलले हुनमन चो खतना नी होउन रये।
8 जिदलदांय सपाय इसराएली मनुकमन चो खतना होली, तेबे हुनमन घाव छांडतले तमु-भाटा ने आपलाहान तमुमन ने रला। 9 तेबे जहोवा, जहोसू के बललो, “मिसरीमन तुमके निंदरते रओत, हुनके आजी मय लापी गुचालेसे।” एईकाजे एबतले हुन ठान चो नाव गिलगाल* पड़ली।
कनान देस् ने पईल हार फसह तिहार मानतोर
10 इसराएलिमन गिलगाल ने तमु गाड़ुन रला, आउर हुनी मयना चो चवदा दिन चो राती जरीहो चो भाटा ने हुनमन फसह तिहार मानला। 11 फसह तिहार चो दुसर दिने हुनमन, हुन देस् चो उबज ले बनालो पाग नोहलोर रोटी आउर भाजलो बीचा खाउक मुरियाला। 12 जोन दिने हुनमन हुन देस् चो उबज ले खाउक मुरियाला, हुनी दिन बियान ले मन्ना नी घसरली। आउर इसराएलिमन के फेर केबई मन्ना नी मिरली। मानतर हुनी बरक ले हुनमन कनान देस् चो उबज के खाउक मुरियाला।
जहोसू आउर जहोवा चो सेना-मुखिया
13 जिदलदांय जहोसू जरीहो लगे रलो, हुन नंगत ले दखलो कि गोटोक मनुक हाथे खांडा धरुन पुरे उबलोसे, तेबे जहोसू हुनचो लगे जाउन पूछलो, “काय तुय आमचो बाट चो आस कि बयरीमन बाट चो आस?” 14 हुन बललो, “नाई, मय कोचई बाट चो नोआंय, मानतर मय एबे जहोवा चो सेना-मुखिया होउन ईलेसे।” तेबे जहोसू, डंडासरन करुन पूछलो: “ए मोचो परभु, तुचो कमेया काजे काय हुकुम आय?” 15 जहोवा चो सेना-मुखिया जहोसू के बललो, “तुचो पांय ले पनई निकराव। कसनबलले जोन ठाने तुय उबलीसीस हुन पवितर आय।” तेबे जहोसू उसनेची करलो।