गिलगाल ने बारा पकनामन चो चीना संगातोर
4
जेबे सपाय इसराएलिमन जरदन नंदी के नाहकुन सरला, तेबे जहोवा, जहोसू के बललो, 2 “इसराएलिमन ले बाराझन मनुक बललोने, गोटोक-गोटोक बंस ले गोटोक-गोटोक मनुक के बाछुन 3 असन हुकुम देस, ‘जरदन नंदी मंजारे जोन लगे पुजारीमन उबा होउन रला, हुताले तुमी बारा ठन पकनामन बोउन आना आउर जोन थाने आजी राती ठेबासे हुता संगाहा’।” 4 तेबे जहोसू, इसराएल चो बारा बंसमन ले बाराझन मनुक के बाछलो। 5 जहोसू हुनमन के बललो, “तुमी जरदन नंदी मंजारे जाउन आपलो महापरभु जहोवा चो डोली पुरे ले इसराएल बंस चो गनती हिसाब ने गोटोक-गोटोक पकना आपलो खांदे बोउन आना, 6 जेचोले तुमचो मंजी चीना होयदे। एतो समया ने जेबे तुमचो पिलामन पूछदे, ‘ए पकनामन चो अरथ काय आय?’ 7 तेबे तुमी हुनमन के सांगा, जरदन नंदी चो पानी जहोवा चो बायदा चो डोली पुरे दुय भाग होली। जिदलदांय जहोवा चो बायदा चो डोली जरदन नंदी भीतर ले जाते रये हुदलदांय जरदन चो पानी दुय भाग होउन रये। एईकाजे ए पकनामन इसराएलिमन काजे अमदेया सूरता चो चीना रयदे।”8 जहोसू चो हुकुम असन इसराएलिमन करला। जसन जहोवा, जहोसू के बलुन रये, उसनेची हुनमन इसराएल बंस चो गनती हिसाब ले बारा ठन पकना जरदन मंजार ले निकराउन आनला आउर आपलो तमु गाड़लो भाटा ने संगाला। 9 आउर जरदन नंदी मंजारे, जोन थाने पुजारीमन बायदा चो डोली बोउन उबुन रला, हुता जहोसू बारा ठन पकनामन उबालो। हुन एबतले हुताय आसे।
10 जहोवा, मोसा बाटले जहोसू के सांगलो गोटमन के, लोगमन के बलतो हुकुम देउन रये, ए सपाय गोटमन सांगुन सरतले पुजारीमन बायदा चो डोली बोउन जरदन नंदी मंजारे उबा रला। तेबे सपाय लोग झटके नाहकला। 11 आउर जिदलदांय इसराएल बंस चो सपाय लोगमन जरदन नंदी के नाहकुन सरला, तेबे पुजारीमन बले जहोवा चो डोली बोउन सपाय लोगमन चो दखते-दखते जरदन के नाहकला। 12 आउर रूबेनीमन, गादीमन आउर आदो मनस्से बंस चो लोग, मोसा बललो असन इसराएलिमन चो पुरे-पुरे हतियार धरुन धाड़ी-धाड़ी गेला। 13 बललोने, चालीस हजार इतलो मनुकमन हतियार धरुन जुद करतो काजे जहोवा पुरे जरीहो चो अराबा भाटा ने अमरला।
14 हुन दिने जहोवा सपाय इसराएलिमन चो मंजी जहोसू चो मान बड़ालो; एईकाजे जसन हुनमन मोसा चो गोट के डर संगे मानते रओत, उसनेची जहोसू चो जीवता जीव भर हुनचो गोट के मानते रला।
15 जहोवा, जहोसू के बललो, 16 “बायदा चो डोली* बोअलो पुजारीमन के हुकुम देस कि हुनमन ‘जरदन नंदी ले निकरुन एओत’।” 17 तेबे जहोसू पुजारीमन के हुकुम दिलो, “जरदन ले निकरुन इआ।” 18 जेबे जहोवा चो बायदा चो डोली बोअलो पुजारीमन जरदन नंदी मंजार ले निकरुन ईला आउर जसन हुनमन चो पांय सुकलो भुंय ने पड़ली हुदलीदांय जरदन नंदी चो पानी आपलो थाने बोहड़ुन ईली आउर आगे चो असन उछरुन बोहुक मुरियाली।
19 पईल मयना चो दसवां दिने, लोगमन जरदन नंदी के नाहकुन जरीहो चो बेर-उदिया बाटे गिलगाल ने तमु गाड़ला। 20 आउर जरदन ले निकरालोर बारा ठन पकनामन के जहोसू, गिलगाल ने गाड़लो। 21 आउर इसराएलिमन के बललो, “एतो समया ने तुमचो पिला-झीलामन पूछले, ‘ए पकनामन चो काय अरथ आय?’ 22 तेबे तुमी, हुनमन के असन सांगा, ‘इसराएलिमन जरदन नंदी के सुकलो भुंये नाहकुन ईलासोत।’ 23 कसनबलले तुमचो जहोवा महापरभु जसन लाल समदूर के आमचो नाहकतले सुकाउन रलो उसनेची जरदन नंदी चो पानी के बले तुमचो नाहकतले सुकालो। 24 एईकाजे मंजपुर चो सपाय देस् चो लोग जानोत, जहोवा चो हाथे सकत आसे आउर तुमी अमदेया आपलो जहोवा महापरभु के डरुन चलते राहा।”