इसराएलिमन जरदन नंदी के नाहकतोर
3
जहोसू बियान पावते खन उठलो आउर सपाय इसराएलिमन संगे सितीम ले निकरुन जरदन नंदी खंडे गेलो। नंदी नाहकतो ले आगे हुनमन हुताय तमु गाड़ला। 2 तीन दिन पाछे, मुखियामन तमु-भाटा ने जाउन 3 लोगमन के असन हुकुम दिला, “जेबे तुमी आपलो महापरभु, जहोवा चो बायदा चो डोली के, लेवी पुजारीमन* बोअलोके दखासे, तेबे आपलाहान ठान के छांडुन हुनमन चो पाट-पाट जाहा। 4 जेचोले तुमी जानासे, तुमके कोन बाटे जातोर आय। कसनबलले तुमी एबतले हुन बाटे नी हिंडलासाहास। मानतर तुमी हुनचोले दुय हजार हाथ* इतलो लापी राहा। महापरभु चो डोली लगे नी जाहा।” 5 फेर जहोसू लोगमन के बललो, “तुमी आपनेके सुद करा, कसनबलले जहोवा काली के तुमचो मंजारे अचरित बुता करेदे।” 6 तेबे जहोसू, पुजारीमन के बललो, “बायदा चो डोली के बोउन लोगमन चो पुरे-पुरे हिंडा।” तेबे हुनमन बायदा चो डोली के बोउन लोगमन चो पुरे-पुरे गेला।7 तेबे जहोवा, जहोसू के बललो, “आजी ले मय सपाय इसराएलिमन चो मंजी तुचो जय-जय करायंदे, जेचोले हुनमन जानदे, जसन मय मोसा संगे रते रयें, उसने तुचो संगे बले आंसे। 8 तुय, बायदा चो डोली बोअलो पुजारीमन के असन हुकुम देस, ‘जिदलदांय तुमी जरदन नंदी कटा चो पानी ने उतरासे, तेबे हुताय जरदन ने ची उबा राहा’।” 9 तेबे जहोसू, इसराएलिमन के बललो, “लगे इआ, आउर आपलो जहोवा महापरभु चो गोट सुना।” 10 जहोसू आउर बलुक मुरियालो, “एचोले तुमी जानासे, जीवत महापरभु तुमचो मंजारे आसे। हुन सते तुमचो पुरे ले कनानीमन, हित्तीमन, हिव्वीमन, परिज्जीमन, गिरगासीमन, एमोरीमन आउर जबूसीमन के हुनमन चो देस् ले निकरायदे। 11 सुना, गुलाय मंजपुर उपरे राज करु जहोवा चो बायदा चो डोली तुमचो पुरे-पुरे जरदन नंदी ने जाउआय बे। 12 एईकाजे एदांय इसराएल चो बंसमन ले बारा झन मनुकमन के बाछा। हुनमन गोटोक-गोटोक बंस ले गोटोक-गोटोक मनुक रओत। 13 जिदलदांय गुलाय मंजपुर उपरे राज करु जहोवा चो बायदा चो डोली बोअतो पुजारीमन चो पांय, जरदन चो पानी के छिंयेदे, हुदलदांय जरदन नंदी चो बोहतो पानी ठेबेदे आउर भीती असन उबा होयदे।”
14 एईकाजे लोगमन आपलो डेरा ले जरदन नंदी नाहकुक निकरला आउर पुजारीमन बायदा चो डोली बोउन हुनमन चो पुरे-पुरे गेला। 15 कटई बेरा जरदन चो पानी तो नंदी खंड उपर ले बोहुआय। जेबे बायदा चो डोली बोअतो पुजारीमन चो पांय, जरदन नंदी चो उछरुन बोहतो पानी के छींवली 16 तेबे नंदी ने बोहतो पानी खुबे लापी सारतन सहर लगे चो आदाम सहर लगे ठेबली आउर रूंडा होउन भीती असन उबा होली। आउर अराबा समदूर बललोने, लोनचर समदूर* बाटे बोहतो पानी खड़-खड़ा सुकली। तेबे सपाय इसराएलिमन जरदन नंदी के नाहकुन जरीहो सहर लगे अमरला। 17 जिदलदांय ले पुजारीमन जहोवा चो बायदा चो डोली बोउन जरदन नंदी मंजारे उबु रला हुदलदांय सपाय इसराएलिमन खड़-खड़ा सुकलो भुंये हिंडुन नाहकते रला। असन बरन ले सपाय इसराएलिमन सुकलो भुंये जरदन नंदी के नाहकला।