जहोसू
महापरभु, जहोसू के हुकुम देतोर
1
जहोवा चो कमेया मोसा मोरलो पाछे जहोवा, मोसा चो साहरा करु/पाटलागा आउर नून चो बेटा जहोसू के बललो: 2 “मोचो कमेया मोसा मोरलो। एईकाजे तुय उठ, करांड बांध आउर ए सपाय इसराएलिमन संगे जरदन नंदी के नाहकुन हुन देस् ने जा, जेके मय हुनमन के देयंसे। 3 मय, मोसा संगे करलो बायदा हिसाब ले, जोन-जोन ठाने तुमी पांय मंडाहासे हुन सपाय ठान तुमके देयंसे। 4 बेर-उदिया उजा बाट चो टंग-टंगा भाटा ले धरुन बेर-उदिया डेबरी बाट चो लबानोन डोंगरीमन लगले आउर बेर-उदिया बाट चो बड़े फरात नंदी ले धरुन बेर-बुड़ती बाट चो बड़े समदूर* लगले हित्तीमन चो सपाय देस् तुमचो बाटा होयदे। एई तुमचो संदमन होयदे। 5 तुचो जीवता जीव भर कोनी तुचो पुरे उबुक नी सकदे, जसन मय, मोसा संगे रले, उसने ची तुचो संगे बले रयंदे आउर तुके नी छांडें। 6 एईकाजे ढाढ़ुस करुन चमकट रा। जोन देस् के मय एमन चो पुरखामन के देतो किरिया खाउन रले, हुन देस् के तुय एमन चो हक ने करसे। 7 तुय ढाढ़ुस करुन चमकट रा आउर मोचो कमेया मोसा दिलो सपाय नियम-कानुन के पक्का मान। हुनचोले तुय ए बाटे-हुन बाटे नी हो। तेबे जोन-जोन बाटे तुय जासे, हुता-हुता तुचो काम पुरा होयदे। 8 नियम-कानुन चो ए गोट अमदेया तुचो मने रओ, रात-मंजन एचई धियान ने रा। जोन बले हुता लिखलोर आसे हुनचेई हिसाब ने चल। असन करलीस जाले तुचो बाड़ती होयदे आउर तुचो सपाय बुता पुरा होयदे। 9 मय तुके ढाढ़ुस करुन चमकट रतो हुकुम देयंसे: नी डर आउर तुचो मन दुक-पुछ नी करो। कसनबलले जोन-जोन बाटे तुय जासे, मय तुचो जहोवा महापरभु तुचो संगे-संगे रयंदे।”जहोसू, लोगमन के हुकुम देतोर
10 तेबे जहोसू, लोगमन चो मुखियामन के असन हुकुम दिलो, 11 “तमु-भाटा ने जाउन लोगमन के हुकुम दियास, ‘आपलाहान काजे खादी-पीदी बनाउन तियार रओत। कसनबलले तीन दिन भीतरे, तुमके जरदन नंदी के नाहकुन हुन पाट चो देस् के आपलो हक ने करतो काजे जातोर आय जेके तुमचो जहोवा महापरभु तुमचो हक ने देयसे’।”
12 फेर जहोसू, रूबेनीमन, गादीमन, आउर मनस्से चो आदो बंस चो लोगमन के बललो, 13 “जहोवा आपलो कमेया मोसा बाटले दिलो हुकुम के तुमी सूरता करा, ‘तुमचो जहोवा महापरभु जरदन नंदी चो बेर-उदिया बाट चो एई देस् तुमके देउन अस्तिर करेसे’। 14 तुमचो बायले-पिलामन आउर जनावरमन, जरदन चो एई पाट, मोसा दिलो देस् ने रओत। मानतर तुमचो मंजी चो सपाय बीरमन तियार होउन आपलो भाई-बंदमन चो पुरे-पुरे जरदन नंदी चो हुन पाट जाओत आउर हुनमन चो साहरा करोत; 15 जेबे तुमचो भाई-बंदमन बले हुनमन के महापरभु जहोवा दिलो देस् चो हकदार होउन तुमचो असन अस्तिर ने रदे, तेबे जरदन नंदी चो बेर-उदिया बाटे जहोवा चो कमेया मोसा तुमके दिलो देस् ने बोहड़ुन, हुनचो हकदार होआसे।”
16 तेबे हुनमन जहोसू के बलला, “तुय जोन बले आमके करतो हुकुम दिलीसीस आमी करुंदे, आउर जोन-जोन बाटे आमके पठासे आमी जाउंदे। 17 जसन आमी मोसा चो सपाय गोट मानते रउं उसने तुचो गोट बले मानुंदे। तुचो जहोवा महापरभु जसन मोसा संगे रलो, उसने ची तुचो संगे बले रओ। 18 कोनी बले तुचो बिरुद करले आउर तुचो हुकुम नी मानले हुनके मोरना-डंड मिरेदे। मानतर तुय ढाढ़ुस करुन चमकट होउन रा।”