Rut ana Boaz tə Lar
3
1 Vanya pəchi Na'omi sələkənya Rut tə nar nyi, <<Kwa ɗa, əngwa ya gwa'arə nghə sal ga ka uya vi kərngha, tangnda ko ɓəliyasar ko ngatə məsəɗakəkur. 2 Jangə Boaz njikə ea nda ka mər tlər kə'i kwatəra nyi inda, kwa pi uhi nda njo nga bale nyi aba akə hya tə lar. 3 Waɗə ka ɓəsəya mal ka handzə dzaki nghə nda ndiya mənakəu. Ma'i yatə lar nga, kəl ja ngwa ka i cha zəndə ənda tangnda kə wa, kəl macha wur na səma ana sa. 4 Ka ɓəlatə mbwa nda cha piya ti. Kəl ba'a ka yi kwafar sərtul nyi ka piya ta nghə ki təwa hya cha. Cho nar nghə sə nda ko məra.>>5 Ngə Rut tə wuma, <<Yo mər dəhə sə nda ka nar ɗa.>> 6 Ngə cha təra yatə lar nda ga mərtə dəhə sə nda Na'omi sələkə nyi tə nar nyi cha məra.
7 Nda Boaz tə wurandə səm ana sa ya ɗufwa cha twasə tanyi, ngə cha təra ya dzər uhi nda nja ɓutə dumu. Ngə Rut tə yi samsaməu ga yi kwafar sərtul nyi ga piyata nyi ki təwa hya cha. 8 Adala vu'i ngə Boaz tə məa ga hya'atə ku hanyi, ngə cha sha ga la'a malakə tə piya ki təwa hya cha.
9 Ngə Boaz tə jawa, <<Wa ka?>> ngə cha wuma, <<Naya kwatəra nghə Rut na, tulkə ɗa sərtul nghə nə təkəra ya, aka njikə sal ɗa ka.>> 10 Ngə cha wuma, <<Ga Tlakə səkə nghə papa'akur kwa ɗa, chul mənakəkur nə 'ual matsa nda ka char ɗa tangərma, aka a da ka gwa'a nguli tlakala wa, ndara ndər gəna ndara ndə ɗaliɗali wa. 11 Aka əngə ja kwa ɗa, ngwa ka ləvər wa. Yo mərtə nghə dəhə sə nda ko gwa'a. Janə ngan ma'a dəhə njir mələm kwa la'a səli ngha. 12 Madangə vəlvələu njikə sal nghə ya, vanya ndə da nda njikəkur kənda lələhə ma tsa ya. 13 Hanyi ta ngha, ma vu'i tə wur yo jawar nyi ndara cho nau nyabiya sə nda njikə kwa kina məra. Kəl ja, macha a da cho i wa, a səmnda tə ya fəla na Tlakə nda na pi, yo nyabiya. Piya tangnə kəl mbudla.>>
14 Kəl Rut tə piya tanyi dza hya cha kəl nda vu'i tə wura, kəl ja, cha hya'atə kaɗəu tsa nja da la'a nyi, ga na, <<Ngwa ka i nja zəndə ənda malakə shilitə tə lar nə wa.>>
15 Ngə Boaz tə nar nyi, <<Anda na pahuɗə nghə ngə ka səya tangna,>> nda cha səya pahuɗə nda, ngə Boaz tə pətə nyi uhi nda njo nga bale tasau kwah, ga həkənyi. Ngə cha təra gu ta mələm.
16 Nda Rut tə ɓəl yo ki ngə Na'omi sələkə nyi tə jau nyi, <<Mi sə nda ɗa kwa ɗa?>>
Ngə cha par nyi dəhə sə nda Boaz tə mərtə nyi 17 ga tsakətə na, <<Cha na'a uhi nda njo nga bale tasau kwah, ga na, <A da ko ɓəl yada sələkə nghə twatwachi wa.> >>
18 Kəl ngə Na'omi tə na, <<Kwa ɗa, səkə ka la'a nda mi kwa ɗa. Aka a boaz do bəlsar wa kəl cha la'a sə ɓatləbiya tə dza.>>