Njir Tla Nəuma
Nyandəla Yahuda ana Simion tə Kura Njir Kan'ana
1
1 Ahir Joshuwa tə tah, njir Isra'ila tə jau Tlakəu, <<Wa kwa biya tangərma ku pama ea ka pa njir Kan'ana?>>2 Tlakə tə wuma, <<Nyandəla Yahuda ngə kwa ma'i, a nənda tə ya hə'i ngə ku cha nda.>>
3 Nyandəla Yahuda tə nar nyi nə nyandəla Simion zamən nda, <<Anda kə'i ea məna panda njir Kan'ana, məna dləuya hə'i nda nja nə ea ka mbaɗə kəea. Naea tsə'u eo ma'i kə'i hi ya tə nəkəhi na hə'i nda nja nə hi ka mbaɗə kəhi.>> Kəl nyandəla Simion tə təra kə'i nda.
4 Nda nyandəla Yahuda tə ghəya pah njir Kan'ana, ngə Tlakə tə nə nda njir Kan'ana ana njir Perizi ku cha nda, nda kuɗənda nji 10,000 vu Bezek. 5 A tangnda ngə nda həya təl Adoni-Bezek ga pah nyi, ga kura njir Kan'ana ana njir Perizi. 6 Adoni-Bezek tə hwi, kəl ja, nda gədlə nyi ga səya nyi, ga tlətlanda təl cha cha i'i ana təl hya cha i'i.
7 Kəl Adoni-Bezek tə na, <<Ləvaləva ɗa tə səya təl məɗəfəkumnyi ga tlətlanda təl cha nda ka nə hya nd i'i, ahir nga ea chiu nda tuku nda vaɗə sərsum nda kwa pəpə ku nya ya. Sakana, janə Hyel pəu ɗa tə ku shala ɗa wi nda ya mərtə nda.>> Nda shili na cha vu Urshalima, a vu nda cha tah. 8 Njir Yahuda tə biya gwa dla'a Ursahlima tsə'u ga dləuya. Nda kuɗənda njir mələm nda ga nginda mələm nda na hu'u.
9 Ahir nga, njir Yahuda tə təra səya pa njir Kan'ana inda na ngya kyatə dəgəl nə hə'i nda, Negev ana sara dəgəl inda. 10 Nda pah njir Kan'ana nda na ngya vu Hebron nda (njo ɗaka nga Kiritat Arba) ga kwasə Sheshai, Ahiman, ana Talmai.
11 Hya'atə tangnda tsə'u nda təra ga yi pah Debir nda njo nga Kiriyat Sefər ɗakaɗa. 12 Ngə Kalip tə na, <<Dəhə ndə nda kwasə Kiriyat Sefer, yo nə nyi kwaɗa Aksa ka mala nyi.>> 13 Kəl Otniyel zər Kenaz məshikərnya Kalip tə kwasə mələm nda, ngə cha nə nyi kwa nyi Aksa ka mala nyi.
14 Vanya pəchi ngə cha shili da Otniyel, cha nar nyi cha gədi babal tsa ada nyi. Nda cha səya kyatə kwara nyi, ngə Kalip tə jau nyi, <<Mi sə nda ko i ya mərtə ngha?>>
15 Ngə cha wuma, <<Yo i ya uya kwambiyakur, mana na'a tə kə babal vu Negev, na'a tsədəɗə ɓiti tsəu.>> Ngə Kalip tə nə nyi tsədzəɗər ɓiti nda kyatə dəgəl ana mbəta. Mbwa inda nyadəla Yahuda ana banyami tə kwasa.
16 Kəl njir nyandəla Keni, nyandəla sələkənya Musa, nda ngyar Jariko mələm wur dabino ga təra ka njir Yahuda gwa dadil takə nda vu Negev nda təwa holma nə Arad. Tangnda nda ngya ləhə dzər njir Amalek.
17 Kəl njir Yahuda nanda kə'i zamən nda njir nyandəla Simion tə yi pah njir Kan'ana nda na ngya vu Zefat, nda wazənda mələm nda papatəu. Aka ənga nja nga mbwa nda Horma. 18 Njir Yahuda tsə'u tə kwasə Gaza, Ashkelon ana Ekron dəhə ka hə'i inda lələhə dzən nda.
19 Tlakə tsə'u tsa'a na njir Yahuda. Nda kwasə hə'i inda kyatə dəgəl, kəl ja a da nda nau gədləbiya nji kwa wa, aka charkaina taku nə lyang tsa nji inda. 20 Nja nə nyi Hebron nə Kalip nda tə gədləbiya nguli Anak makərəu ku mələm nda wi nda Musa tə mər alkawal. 21 Kəl ja nyandəla Banyami da nau gədləbiya njir Jebusi nda na ngya vu Urshalima wa, ba'a ənya njir Jebusi ku mələm nda na ngya, nanda ka nyandəla Banyami.
22 Njir nyandəla Yusufu tə pah Betel, ya Tlakə tsə'u tsa'a na nda. 23 Ngə nda sə njir gwa'a hya mələm ka nda gwa'abiya hya mələm Betel nda njo ɗaka nga Luz, 24 njir gwa'a hya mələm inda tə la'a vanya ndə kwa zəbiya ku mələm nda ngə nda nar nyi, <<Char ea lakur gu ta mələm na, naea tsə'u eo mərtə nghə mənakəkur.>> 25 Ngə cha char nda, ngə nda kuɗənda njir mələm nda papatə na katsakər, kəl ja nda ngyar ndə nda char nda laku nda, dəhə ka njir ki nyi. 26 Kəl ngə ndə nda təra ya tə hə'i njir Hitti, tangnda cha hərtə mələm ga nga nyi Luz, nda nacha ngə tləmər mələm nda ba'a ənya.
27 Kəl ja, nyandəla Manasa da gədləbiya njir Bet Shan ndara, Ta'anak, Dor, Iblem, Megiddo ana mələm inda lələhə dzən nda wa, aka njir Kan'ana tə diyadzə na ngya tə hə'i nda. 28 Nda njir Isra'ila tə ɗa na dunama, nda chiu njir Kan'ana ku tlər tuku, kəl ja a da nda gədlə nda ku mələm nda wa. 29 Ya a njir Ifərem da gədləbiya njir Gezer wa, kəl ja, njir Kan'ana tə biyama na ngya ku pama nda. 30 Ya njir nyandəla Zebulun da gədlə njir Kan'ana nda na ngya ku Kitron ndara Nahalol inda tə həyadzə ku pama nda wa, kəl ja, nda chiu nda ku tlər tuku. 31 Əngə ma'a nyandəla Asha ma'a a nda gədlə nji inda na ngya vu Akko, Sidon, Ahlab, Akzib, Helba, Afek ana Rehob wa, 32 atəvira ənga nyandəla Asha tə ngya ku pama njir hə'i nda. 33 Ya tsə'u a nyandəla Naftali da gədlə nji inda na ngya vu Bet Shemesh ndara Bet Anat wa, kəl ja, nda ngya ku pama njir Kan'ana nda na ngya tə hə'i nda, ana nji inda na ngya vu Bet Shemesh ana Bet Anat, kəl ja, nja chiu njir Bet Shemesh ana Bet Anat ku tlər tuku wi mavi'i. 34 Njir Amori tə gwa'atə nyandəla Dan tə təra gya tə dəgəl na ngya. A da nda na lukur səya ngya ki hə'i wa. 35 Ya ngə njir Amori inda tə diyadzə na ngya kyatə dəgəl Heres, Aijalon, ana Sha'albim, kəl ja, nda njir nyandəla Yusufu tə tsakətə ɗa na dunama, ngə nda chiu njir Amori inda ku tlər tuku. 36 Ɓəlkər njir Amori tə ghəya tə lakur gwa Akrabim təwa zədər pəchi, tə təra biyamar mələm Sela.