Joshuwa
Tlakə tə Tsau nyi Bar nə Joshuwa
1
1 Ahir tər Musa mava Tlakəu, ngə Tlakə tə ndər nə Joshuwa zər Nun, ndər vala Musa. 2 Cha na, Musa mava ɗa tə ti. Aka ənga ka ɓatliya kərngha nahi ka njir Isra'ila ka ga hya dləgəlbiya dəl Urdən biyatə hə'i nda yo nə hi. 3 Yo nə hi kala mbwanda hya fiya hya hi ti, tang wi nda ya mərtə nyi alkawal nə Musa. 4 Ba ɓəlkər hə'i kəhi kwa ɗa fwatə tə dadil takəu ba'a nə Lebanon, fwatə nya Dəl Yufretis ba'a nə Dəl Meditereniya ana dəhə hə'i njir Hiti təwa təɗər pəchi. 5 Dəhə ngya ngha, a ndə da kwa nau kura nghə wa. Tang wi nda ya nəu na Musa, əngə tsə'u yo nəu na na ka. A da yo ngya nghə wa, ya a da yo təkə nakə wa.6 <<Ka ta'i na dunama ka ɗa gangkər ku dəhə sə nda ko məra, aka ko ma'i na nji inə biya tə hə'i nda ya səmnda nyi fəla nə kə'i jival kəhi ənda yo nə nda. 7 Ka ta'i na dunama ka ɗa gangkər ku dəhə sə nda ko məra. Ka gəla ka ɓəlatə dəhə tsaubar nda mava ɗa Musa tə nə ngha; ngwa da tyatinda təwa chisəm ndara matsal wa, ga ka ɗa na biyama ku dəhə banda ko ma'i ti. 8 Ngwa ka da ngyar Likatkatə nə gadlagadla na, cha təkə na nyakə wa; ka maka jigadəma təkəri vu'i na puchi, tsa'aka ko nau nəubiya kala sə inda nja tsəfəbiya kwa. Təwa ənga, ko uya biyama ana tsaka, ku dəhə sə ngha. 9 A da ya nar nghə ka ɗa na dunama ndan ma? Ka ɗa gangkər ku dəhə sə nda ko məra. Ngwa ka da ɗa gərich wa, ngwa ɗufwa ka da tsəyadzə wa, aka Hyel Tlakə nghə kwa nəuna ka kala banda ko ma'i ti.>>
Ɓwanya Joshuwa anə njir Isra'ila
10 Ngə Joshuwa tə tsau nyi bar nə njirawawa'a ga na, 11 <<Ma'i ma go huɗa nji hya nar nda, <Ɓatliya ma sərsuma. Aka hanyi makər tə həyadzə hyo dləgəlbiya Dəl Urdən ka hya biya dləuya hə'i nda Hyel Tlakən hi kwa nəhi ka nəkəhi.> >>
12 Ngə Joshuwa tə nga nyavi Roben, Gad ba'a mar nyavi Manasa shili, ga nar nda, 13 <<Ɗənghatə ma na tsaubar nda Musa mava Tlakə tə nəhi, cha na, <Hyel Tlakən hi kwa nəhi mbwar ɓəlsar. Ana ənga, a nəhi tə cha hə'i na.> 14 Hyo nau ngyar mahi'i kəhi, ngulsha'a kəhi ba'a sərshishi kəhi, nda ngya tə mbwanda Musa tə tlatsə hi, təwa zədərpəchi nə Dəl Urdən. Kəl ja, a ngyatə tuku, ləvaləva kəhi inda na kar pah, nda ghəya dləgəlbiya təvi ka zamən hi. Hya hagwa nyi chi nə ka zamən hi 15 kəl bəji nda Tlakə tə nə nda ɓəlsar, tang wi nda cha nəhi ɓəlsar, ana manda ngya tə mbwanda Hyel Tlakən hi kwa nənda. Ahir nga, hyo nau ɓəl tahi kyatə nəkəhi na hə'i, mbwanda Musa mava Tlakə tə tlatsə hi təwa zədərpəchi nə Dəl Urdən.>> 16 Ngə nda wumə ga nar nyi nə Joshuwa, <<Kala sə nda ka nar ea, eo məra, ya kala banda ka sə ea ti, eo ma'i. 17 Tang wi nda ea nəu nya Musa, əngə tanyi tsə'u eo nəu nya ka. Ga Hyel nəu na ka wi nda cha nəu na Musa. 18 Kala ndə nda tlə mwali təkəra ɓwanya ngha, ga ngyar nəu kala tsaubar ngha, njo tsəya nyi. Nakə nəngha, ka ɗa na dunama, ana ka ɗa gangkər ku sə nda ko məra!>>