Zhi Gadlagadla
Njir Isra'ila tə Ngyar Horeb
1
1 Ja'inə ɓwanya nda Musa tə nar nyi nə dəhə njir Isra'ila ku dadil takəu təwa zədər pəchi biyatə ya Dəl Urdən, a tə takə Araba nda kwa ndzamə dzə na Suf ku pama Paran ana Tofel, Laban, ana Hazerot ba'a Dizahap. 2 Hya'atə ki Horeb yi Kadesh Baniya təwa lakur Mə Seyir, ma'i hanyi kwabəzhang.3 Fa fwaɗəkumnyi, ahir nda nda ngyar hə'i Masar pəshir tangərmar hanyi nə hya kwabəzhang, Musa tə par nyi dəhə ɓwanya inda Tlakə tə nar nyi cha par nyi nə njir Isra'ila. 4 Sə ngə tə ɗa ahir nja kura Sihon təl njir Amori, nda tə səm təlkur ku mələm Heshbon ana təl Og nə Bashan nda tə səm təlkur vu Ashtarot ana Edrai. 5 Ku nda nda tə hə'i Mowab təwa zədər pəchi nə Urdən, ngə Musa tə ghəya dəkəbiya nda gadlagadla Hyel, a bəra:
6 Sakanda mən ki Horeb Hyel Tlakə tə nar ɗa, <<Finda tə hi bəji gagaɗa tə sara mə na. 7 Ngyar ma mbwa na hya təra biyama. Ma'i ma yatə hə'i dəgəldəgəl nə njir Amori ana dəhə mbwa inda tə ɓandə nda tsa'a vu Araba nda kyatə məa, sara mə inda təwa təɗər pəchi nacha ngə Negev təwa nya dəl ba'a yatə hə'i njir Kan'ana bətə yi Lebanon, biya shipatə nya Yufratis dəl dəgal nga. 8 La'a, a nə hi təya hə'i na. Ma'i ma gwa, hə'i ngə kwa ɗa ka nəkəhi wi nda ya mərtə nyi alkawal nə kə'i jival kəhi Ibrahim, Ishaku ana Jakop ana nyandəla nda nda kwa shili hinə nda.>>
Musa tə Ɗəmtsə Njirawawa'a
9 Ngə Musa tə na, <<Wi nda ya nar hi nda, a da ya nji ka nəu na hi dəhə hi zhangta ɗa wa. 10 Aka Hyel Tlakən hi yanda hi tə ɗang tang wi sasəlga inda biya huɗamələm. 11 Ga Tlakəu, Hyel nə kə'i jival kəhi cha mərtə hi hya ɗa ɗang zhaka dəbu ana cha səkə hi papa'akur wi nda cha mər alkawal! 12 Wa ya zhangta ɗa kwa nau həkər ɓwaɓwatə kəhi, sə inda kwa wendi hi ana kəpal inda ku pama hya? 13 Ɗəmtsə ma nji inda na səli, nji inda nja zəndibiya na dəma ana ngabiya səu, ku kala nyavi kəhi, naya tsə'u yo fiya nda ka gau kəhi i'i.>>
14 Ngə hya wum na'a bəra, <<Sə ngə ka nar ea nga, sə menakə nga.>> 15 Ana ənga, ya ɗəmtsə nji inda na dəma ya ana səli ku kala nyavi kəhi i'i, ga fiya nda ka gau təkəra hi, alenyi a təkəra nji dəbu dəbu, alenyi a təkəra nji gharu gharu, alenyi a təkəra tufkumnyi tufkumnyi alenyi tsə'u təkəra nji kum kuma. 16 Ngə ya tsaunyi bar nə njir tla nəuma nə hi ku bəji nda bəra, <<Səndzə ma himi da wula nda ku pama njikə hi ana hya tlanda nəuma nda tsa'atsa'a, ndara ku pama ndər Isra'ila na kuvanyi ndara nə ndə shilishili nda na ngya ku huɗa hi. 17 Ngwa hya tazhira ma hyo tla nəuma ndara nə ndə ɗaliɗali ndara nə ndər gəna wa. Ngwa hya ləvər madawa wa, aka tla nəuma nə Hyel nga. Ma wula nda ɗa dza'u nə hi, hya shili nə huɗə ɗa.>> 18 Ku bəji nda a dəkari hi tə ya dəhə sənda hyo kina məra.
Nja Sə Njir Gwa'a Hya Mələm
19 Ngə ea mər wi nda Hyel Tlakən ea tə tsau ea bar, ea ngyar Horeb ga təra yatəwa hə'i dəgəldəgəl nə njir Amori tahə takə dlaɓə nda kwa ləvərnda ndə nə hya la'a na, əngə ea shili Kadesh Baniya. 20 Ngə ya nar hi, <<Shili təhi tə hə'i dəgəldəgəl nə njir Amori, nda Hyel Tlakən mən kwa nə mən. 21 La'a, Hyel Tlakən hi nə hi tə hə'i na. Ma'i ma gwa, hə'i ngə ɗatə ka nə kəhi wi nda Tlakəu, Hyel jival kəhi tə nar hi, ngwa hya da ləvər ndara hya tsiya dza hi wa.>>
22 Ngə hya shili da ya dəhə ga na, <<Təvi məno gwa, mən sətə njir gwa'a hya mələm nda ki shili na mən labar laku nda məno kina nəuwa, ana ndara mələm mani məno ya kwa.>>
23 Ngə ya la'a ənda jigadəma kəhi ngə ɗatə mənakəu, ana ənga ya ɗəmətsə nji kwabəmətlə ku huɗa hi, ndə zhang ku kala nyavi. 24 Nda təra gyo hə'i dəgəldəgəl nda, ga səyo Dakə Eshkol ga gwa'abiya hə'i nda. 25 Nda ɗəmətsə yayar wu nə hə'i nda, ga shili na bəra, <<Hə'i nda Hyel Tlakən mən kwa nə mən nda, hə'i mənakə nda.>>
Njir Isra'ila tə Tlə Mwali nə Tlakəu
26 Kəl ja, hya tləmwali nə tsaubar Hyel Tlakən hi ga ngyar ma'i. 27 Ngə hya jiganya ku madləɓa kəhi ga na, <<Tlakə ngya ea ti, nacha gwa'atə cha həbiya ea vu Masar, aka njir Amori shili kuɗənda ea. 28 Abar məno ma'i ja? Jan ka zamən mən tsiyatə ɗufwa mən ndo na, <Nji inda ndiya mən tə na dunama ya dzəgam dzəgamə nanda tsa mən, mələm kənda i'i wawa'a, ɓangtili kənda tsa'a ki huɗamələm, la'a tə ea ma'a nyandəla njikə Anak vu nda.> >>
29 Kəl ngə ya nar hi, <<Ngwa ləmba hya da tlə wa, ya ngwa hya da ləvər tsa nda wa. 30 Hyel Tlakən hi nda kwa nəu na hi, cho pah tə ya hi, wi nda cha mər tə lya hi vu Masar, 31 ana ku dadil takəu. La'a tə hi ənda Hyel Tlakən hi tə həbiya hi wi ngə ada kwa hə zər nyi, dəhə laku ngə hya nəu inga ba'a tangna.>>
32 Dəhə ka ənga, a da hya nənyi jiri nə Hyel Tlakən hi wa, 33 na cha nda tə nəu nahi ku kala laku nda hya nəuwa, tewa kyara hu'u aba vu'i ana ləmbəkəu aba puchi, ga cha char hi mbwar la madləɓa kəhi i'i ana laku nda hyo kina nəu səkəu.
34 Nda Tlakə tə ngatə jiganya kəhi, huɗa cha tla ngə cha səmnda fəla bəra, 35 <<Ndə zhang lya njir zamin pəla'a nə da kwa gwa ku hə'i mənakə nda ya mərtə nyi alkawal nə kə'i jival kəhi wa. 36 Kəl nda Kalip zər Jefuni ngə kwa gwa. Cho la'a, ya yo nə nyi ana anə nyandəla cha ba mbwa nda cha fiya hya cha tə ku bəjir gwa'a hya hə'i nda.>>
37 Tə dəbar kəhi huɗa Tlakə tə tla tsa ya tsə'u, ngə cha na, <<Mada nakə Musa do gwa tə hə'i ngə wa. 38 Kəl ndər vala ngha, nacha ngə Joshuwa zər Nun ngə kwa gwa. Ka tsətə nyi ɗufu ja, aka nacha ngə kwa nəu na njir Isra'ila ka ga nda gwa dləuya hə'i nga.>> 39 Ngə Tlakə tə nar ea dəhə ea, <<Kəl ndara ngulisha'a shiɗədə kəhi inda pa'a kwa təkəbiya matsala nda ana chisəma nda, inda yo hari wi njo shili fa'aya ku pah, nanda ingə kwa gwa dləutsə hə'i nga. 40 Kəl ja, nahi nəkəhi, hya ɓəl gwa təwa dadəl takəu təwa lakur gwa Fa'a Dizəu.>>
41 Ngə hya wum na'a ga na, <<Mərtə ea səpəla'a nə Tlakəu. Eo ma'i ki pah wi nda Tlakə tə tsau ea bar. Ngə kala ndə zhang kəhi tə fa'atə balmi nyi, hyo har wi kustanyi gwa tə hə'i dəgəldəgəl nda.>>
42 Kəl ja, Tlakə tə nar ɗa, <<Nar nda Musa ya, <Ngwa hya ma'i wa, aka a da ya tsa'a kə'i wa, ma hya ma'i ka kərnəhi, njir dawa kəhi kwa ki kura hi.> >>
43 Nar hi təya sənda Tlakə tə dəkar ɗa, kəl ja, a da hya səhimi da ya wa. Hya tləmwali nə Tlakəu, ya ku ɓalɓalkur kər kəhi, hya ma'i gwatə hə'i dəgəldəgəl nda. 44 Ngə njir Amori nda na ngya tə hə'i nda tə biya təkəra hi wi ləvakachi chiɗi ga gədlə hi fwatə vu Seyir tsa'a ku mələm Horma. 45 Ngə hya ɓəl ga shili tiwi mar Tlakəu, ya a da cha səhimi da tiwi kəhi wa, ya nacha ɗəngha nahi wa. 46 Əngə hya ngya vu Kadesh nə hanyi ɗanghəu, wi ngə tə ɗa na hi nga.