Njir Isra'ila tə Wi tə Dadil Takəu
2
1 Ngə ea sha ga ɓəl gwatə dadil takəu təwa lakur gwa Fa'a Dizəu wi nda Tlakə tə na ya məra. Ea hanyar pəchi ɗang gagaɗa, ea kwa zhuli tə sara mə Seyir.2 Ngə Tlakə tə nar ɗa, 3 <<Finda tə hi bəji gagaɗə tə hə'i dəgəldəgəl na, sakanə ja, sha ma hya təra gya təwa Vwa. 4 Nar nyi tsaubar inənna nə nji inga, <Hyo tərabiya tahə hə'i njikə hi, nacha ngə nyandəla Isuwa nda na ngya vu Seyir. Hya gəla, aka ləvər kwa səya nda tsa hi. 5 Ngwa hya gwa'a nya nda wa, aka nə nda təya Mə Seyir cha ɗaka nəkənda, a da yo nə hi mada mbwar fiya hi zhang ku hə'i kənda wa. 6 Hyo nau ɗəlbiya sərsuma ana ɓiti sa tsa nda.> >>
7 Aka Hyel Tlakən hi səkə hi tə papa'akur təkəra dəhə tlər kəhi. Nacha ngə ndə nda tə ɓəlatə hi ku ma'i kəhi tə takə dlaɓə na. Hyel Tlakən hi ngə tə nəu na hi ku fa fwaɗəkumnyi na, ya a səda hya tar wa.
8 Əngə məna tlatə nyi daladala nə njikə mən, na nda ngə nyandəla Isuwa nda na ngya tə hə'i Seyir. Məna ngyar nəu laku nda tahəbiya Dakə Araba nda kwa hya'atə vu Elat ana Eziyongeba. Ətsəu wi nda məna sha gya təwa Vwa təwa laku ndo təra dzəva Mowab.
9 Ngə Tlakə tə nar ɗa, <<Ngwa hya dlənyarvi ndara hya tliya huɗa njir Mowab wa, aka a da yo nə hi mbwa mada kushə ku hə'i kənda wa. A nə nda təya mələm Ar nə nyandəla Lot ka nəkənda.>> 10 (Njir Emam ingə na ngya tangna ɗəɗəməu, njinjinyi na dunama ya ɗanghəu, jan nda dzəgam dzəgam wi nyandəla Anak. 11 Njo nga njir Emam ana nyandəla Anak njir Refa, kəl njir Mowab ngə kwa nga nda njir Emam. 12 Ɗakaɗa njir Horim ngə na ngya tə hə'i Seyir, kəl ja, nyandəla Isuwa tə gədləbiya nda. Nda kuɗənda njir Horim ga ngyata nda tə hə'i kənda, tang wi nda njir Isra'ila tə mər tə hə'i nda Tlakə tə nə nda ka nəkənda nda.)
13 Ngə Tlakə tə nar ea, <<Hya'atə ma sakana hya dləgəlbiya Dakə Zered.>> Əngə ea dləgəlbiya Dakə Zered nda.
14 Fa makərkumnyi parnya chisə tərabiyatə fwatə tə bəji nda ea ngyar Kadesh Baniya ba'a tə bəji nda ea shili dləgəlbiya Dakə Zered nda. Ku bəji nda, dəhə ba shili nda tsa'aka pah, tə kuɗa, wi nda Tlakə tə səmnda fəla. 15 Gyalkur Tlakə tə kuɗənda nda kəl nda cha nda zhazhinda nda dəhəu.
16 Ahir nji inda tsa'aka pah kuɗətə dəhəu, 17 ngə Tlakə tə nar ɗa, 18 <<Ənya hyo tərabiya tahə hə'i Mowab ləhə dzər mələm Ar. 19 Ma hya shili ləhə dzər Amon, ngwa hya dlənyarvi ndara hya tliya huɗa nda wa, aka a da yo nə hi mada mi ku hə'i njir Amon wa. A nənyi təya nə nyandəla Lot cha ɗa ka nəkənda.>> 20 (Mbwanda ma'a ɗakaɗa nə njir Refa cha, madangə njir Amon kwa nga nda njir Zamzomin. 21 Njir dunama nda ya ɗanghəu, dzəgam dzəgam wi nyandəla Anak. Tlakə tə kuɗənda nda na gyalkur nyi amar njir Amon, nda tə gədləbiya nda ga ngyata nda tə mbwa kənda. 22 Əngə Tlakə tə mərtə nyi nə nyandəla Isuwa, ku bəji nda cha kuɗənda njir Horim. Nda gədləbiya nda ga ngyata nda tə hə'i kənda ba'a ənya. 23 Əngə tanyi njir Avim tsəu, nji inda tə ɓandə Gaza tsa'a, Njir Kaptorim hya'atə vu Kapto tə shili kuɗənda nda ga ngyata nda tə hə'i kənda.)
Nja kwa Kura Sihon Təl Heshbon
24 <<Hya'atə ma hya dləgəlbiya Dakə Arnon. Janə ya nə hi tə Sihon ndər Amori təl Heshbon ana dəhə hə'i nyi. Ghəya ma dləuwa hya panda nyi. 25 Ənya na yo ghəya tau nyi ləvər ku ta njir dunəya mada amani, ndo ləvər hi. Ma nda ngatə labar təkəra hi, ləvər kwa səya nda gagaɗa ndo tsamtlaɗə man hi.>>
Njir Isra'ila tə Kura Sihon Təl Heshbon
26 Ku nda ea tə takə Kedemot, ya sə changhabal i'i yada Sihon təl Heshbon ka gwa'a ngya mənakəu, abəra, 27 <<Ngya ea, ea tərabiya tahə hə'i ngha. Eo ma'i ku laku dəgaləu, a da eo tyatə təwa chisəm ndara matsal wa. 28 Hya ɗəlnda ea sərsuma ana ɓitir sa, kəl ga hya ngya ea na laku nda eo tərabiya, 29 wi nda nyandəla Isuwa, nda na ngya vu Seyir ana njir Mowab, nda na ngya vu Ar, tə ngya ea na laku kəl nda ea dəgəlbiya Urdən ya tə hə'i nda Hyel Tlakən ea kwa nə ea.>> 30 Kəl ja, Sihon təl Heshbon tə katə ea tsa tərabiya. Aka Hyel Tlakən hi tə mərtə ɗufwa cha ɓaɓaləu ya ngə cha tlə mwali, məlna hyo uya lakur kura nyi wi nə cha mərtə na.
31 Ngə Tlakə tə nar ɗa, <<La'a, ghəya təya nə hi Sihon ana hə'i nyi. Sakana ghəya ma dla'a ka hya dləuya hə'i nyi.>>
32 Ngə Sihon ana ləvaləva nyi tə ghəya pah ea vu Jahaz. 33 Hyel Tlakən ea tə vala ea, ngə ea kura nyi dəhə ka nguli shili nyi ana ləvaləva nyi. 34 Ku bəji nda ngə ea dləuya mələm kənda i'i ga kuɗənda dəhə shili, mahi'i ana ngulisha'a, mada ndə zhang da həyadzə wa. 35 Ea fa'a kwazhalɓi ana sərshishi kənda, matsa əngə ma'a, ea fa'atə dəhə sər uya kwaba inda ku mələm inda ea dləuya nda. 36 Fwatə vu Arower yi tsa'a tə nyachira Dakə Arnon, hya'atə ku mələm nda ku dakə nda yi tsa'a vu Giliyad, wi kwachə ha'i ea wurandə na nda. Aka Tlakə wurta nə ea nda. 37 Kəl ja, wi nda Hyel Tlakə tə tsau ea bar, a da ea gwatə hə'i njir Amon wa, ndara hə'i nda nya Dəl Jabok ndara mələm inda tə ɓandə nda wa.