Njir Isra'ila tə Kura Og Təl Bashan
3
1 Kəl ngə ea sha ga təra ya təwa lakur Bashan, mbwa nda Og təl Bashan ana dəhə ləvaləva nyi tə shili pah ea vu Edrai. 2 Kəl ja, Tlakə tə nar ɗa, <<Ngwa ləvər da tə nghə tsa cha wa, aka wur təya nə nghə dunamar kura nyi, ana dəhə njir hə'i nyi ana hə'i nyi. Ka mərtə nyi wi nda ka mərtə nyi nə Sihon təl njir Amori, nda tə səm təlkur vu Heshbon.>>3 Təwa ənga Hyel Tlakən mən tə nə ea gyalkur kura Og təl Bashan ana dəhə ləvaləva nyi, mada ndə zhang da tə mbəɗə wa. 4 Ku nda na bəji, dəhə mətla Argob nda da tə kiɗa Og təl Bashan ea dləuya, mada mələm zhang kənda da tə mbəɗə ku mələm kwakumnyi inda wa. 5 Dəhə mələm inga nja ɓandə na ɓangtili dzəgam dzəgaməu, nja ɓatlətə sər haɗə nyamələm nda na lyang, matsa ingə ma'a, alenya nguli mələm da ɗang kəla ɓangtili nda ea dləuya. 6 Ea kuɗənda nda dəhəu wi nda ea mər na Sihon təl Heshbon nda, ea wazənda kala mələm kənda ga kuɗənda dəhə shili, mahi'i ana ngulisha'a. 7 Kəl ja, ea fa'aya kwazhalɓi na sərshishi ana gəna nə mələm inda ka kərnəea.
8 Aku nda na bəji ngə ea fa'aya təl njir Amori mətlə inda, hə'i nda təwa zədər pəchi nə Urdən, fwatə ku Dakə Arnon bətə ya dza Mə Harmon. 9 (Njir Sidon kwa nga njir Harmon na Siriyon, njir Amori tsə'u kwa nga nda Senir.) 10 Ea dləuya babal ɓya'ar hə'i nda kyatə dəgəl ana dəhə hə'i Giliyad ana Bashan bətə yo mələm Saleka ana Edrai, mələm inda tə hə'i Og təl Bashan. 11 Kəl Og təl Bashan ngə huɗəkər ndə tə həyadzə ku huɗa njir Refa. Gangər lyang da tsa cha, pələkəkura cha kwa ɗa hia kwabəfwaɗəu ana dlaɓkura cha kwa ɗa hi kwah. Ba'aka ənya tsə'utanyi gangər nda vu Raba tə hə'i njir Amori.
12 Nda ea dləuya hə'i nda ku bəji nda, ya nə nyi mətla nda gyatəwa Vwa nə Arower ləhə dzər Dakə Arnon, gyapə na mar hə'i dəgəldəgəl Giliyad ana mələm inda nda ti, nə njikə Roben ana njikə Gad 13 Həyadzər Giliyad ana dəhə hə'i Bashan nda da kiɗa təl Og, ya nə nyi manyi nə njikə Manasa. (Dəhə mətla hə'i Argob nda tə hə'i Bashan njo nga ɗakaɗa hə'i njir Refa.) 14 Jayir vanya ndə ku nyandəla Manasa tə hətə dəhə mətla Argob bətə biya nya chira hə'i njir Geshuri ana hə'i njir Makati, cha fəndzi nyi tləmər kərnyi nə mələm nda, nacha gwa'atə ba'aka ənya nja kwa nga Bashan Havotb Jayir. 15 Ngə ya nə nyi Giliyad nə nyandəla Makir zər Manasa. 16 Kəl ja, a nə njikə Roben ana Gad, ya nə nda fwatə dzər Giliyad kwa'a səyo Dakə Arnon (ghadar dakə nda ngə tə ɗa ka gəl) ana biya mar Dəl Jabok, təwabanda ngə gəla nda ka njir Amon. 17 Təwa təɗərpechi, gəla nda nacha Dakə Urdən a vu Araba, fwatə vu Keneret go Fa'a Araba (nacha ngə, Fa'a Wuna), təwa sara mə Pisga.
18 A tə bəji nda, ya tsau hi bar bəra, <<Hyel Tlakən hi nə hi tə hə'i na, cha ɗa ka nəkəhi. Dəhə ləvaləva kəhi nda fa'atə balmi kənda, nda batliya ka pah, nda təra biya mar ka zamən hi njir Isra'ila. 19 Kəl ja, mahi'i kəhi, ngulisha'a kəhi ana sərshishi kəhi (aka a zəndə təya sərshishi da ɗang tsa hi) ndo ngya ku mələm ingə ya nə hi inga. 20 Hya hagwa nyi chi nə kuvanəhi njir Isra'ila, kəl bəji nda Tlakə tə nə nda ɓəlsar wi nəkəhi na, nanda ma'a tsə'u kəlnda dləuya hə'i nda Hyel Tlakən hi kwa nə hi biya tə ya Dəl Urdən. Ahir nga, kala ndə zhang kəhi kwa nau ɓəl kyatə mbwa nda ya nə hi ka nəkəhi.>>
Nja Katə Musa tsa Dləgəlbiya Urdən
21 A tə nda na bəji, ya tsau nyi bar nə Joshuwa bəra, <<A la'atə kə dəhə sənda Hyel Tlakən hi tə mər nə təl mətlə ingə na lya ka. Cho mərtə tang wi ngə nə dəhə təlkur mbwa ngə hyo biya tə nga. 22 Ngwa hya da ləvər tsa nda wa, aka Hyel Tlakən hi kwa pah tə ya hi.>>
23 A tə nda na bəji ya gədi Tlakə ga na, 24 <<Maki Tlakə Ndər Gyalkur Dəhəu, nakə ngə tə ghəya char dəgalkur nghə nə mava ngha. A vanya Hyel da ki huɗamələm ndara a tə dunəya nda nji ka mərtə sər məngəl wawa'a wi nənghə wa. 25 Yo gədi, macha ko i, ngya ɗa, ya dləgəlbiya Dəl Urdən ya biya la'a hə'i mənakə nga, hə'i dəgəldəgəl gumaguma nga ana Lebanon.>>
26 Kəl ja, huɗa Tlakə tə tla tsa ya a tə dəbar kəhi, ngə cha nar ɗa, <<A njitə ənga, ngwa ka tsakətə ɓwanya na'a təkəra sə ngə wa. 27 Ma'i gyo kəra Mə Pisga ka gi ndzamari mada təwabari. Ndzamətə hə'i ngə dəhə mənakəu, aka a da ko dləgəlbiya biyatə ya Dəl Urdən ngə wa. 28 A təvəra ənga, ka dzəviya Joshuwa, ka tsəkutə nyi ana ka tsətə nyi dufəu, aka nacha ngo gwa na nji inga, ya nacha ngo gwa nəu na nji ingə ndo dləuya hə'i ngə ko la'a nga.>> 29 Kəl ngə ea ngya ku dakə nda, ləhə dzər Bet Peyor.