Musa tə Tsau nyi Bar nə Njir Isra'ila nda ɗa na Kəriwa
4
1 Səya ma himi da tsaubar ana gadlagadla nda yo dlədləɓə nə hi njir Isra'ila. Hya nəu tsa'aka hyo ɗa na pi ga hya gwa dləuya hə'i nda Tlakəu, Hyel nə ka jival kəhi kwa nə hi. 2 Ngwa hya da tsakəkəri ndara hya həya madami təkəra gadlagadla nə ya nə hi nə wa, kəl ja, hya ɓəlatə gadlagadla Hyel Tlakən hi nda ya kwa nə hi.3 A la'a tə hi sənda Tlakə tə mər vu Baal Peyor na lya hi. Tangnda Hyel Tlakən hi tə kuɗənda kala ndə nda tə həsəli nə Baal Peyor. 4 Kəl ja, dəhə nahi nda tə dləukəri na Hyel Tlakən hi, jan tsə'u ta hi na pi ba'a ənya.
5 Səya ma himi, a dlədləɓətə hi təya dəhə gadlagadla ana tsaubar i'i wi nda Hyel Tlakə ɗa tə nar ɗa, ga hya ɓəlatə vu tə hə'i nda hyo gwa dləuya ka cha ɗa ka nəkəhi. 6 Ɓəlatə ma tsa'anyata, aka nacha ngo char chul dəma ana ngabiya da tsa hi nə alenyi nji, ma nda ngatə sə təkəra gadlagadla inga, ndo na, <<Təkəɗəu njir hə'i dəgal ina, dəma ana ngabiya da tsa nda.>> 7 Aka hə'i manə ngə mada aman dəgalkura cha, kwa uya hyel kənda ləhə dzən nda, wi nda Hyel Tlakən mən ləhə dzən mən, ma dəhə bəji nda məno gədi nyi ti, cho ngatə məna? 8 Aa vanya hə'i dəgal manə ngə tə uya gadlagadla i'i ana tsaubar inda tsa'atsa'a wi gadlagadla inə yo nə hi ənya na?
9 Hya ngya na ɓəla, hya ɓəlatə kərnəhi, ngwa hya da far na sə inda hya la'a na lya hi wa, ya ngwa hya həbiya ku ɗufwa hi matə wur ɗa ana pi hi wa. Hya dlədləɓətə nyi nə nguli kəhi, nanda tsə'u nda dlədləɓətə nyi nə nguli kənda. 10 Hya ɗənghatə na bəji nda hya ta'i biyamar Hyel Tlakən hi vu Horeb, tangnda cha nar ɗa, <<Tsəmtə ɗa na'awa nji biyama ɗa ga nda ngatə ɓwanya ɗa ana ga nda dlədləɓətə ənda ndo nəu nya ya matə wur ɗa ana pi nda tə dunəya, nanda tsə'u nda dlədləbətə nyi nə nguli kənda.>> 11 A shili tə hi ləhə dzər sara mə nda ku bəji nda cha naɓənaɓə na kyara hu'u kwa'a shi huɗamələm, ana ləmbəkə ndalndala ba'a kutlə tuɗuməu. 12 Ngə Tlakə tə ɓwanya nə hi zəbiya ku hu'u nda. A ngatə tə hi cho ɓwanya, kəl ja, a da hya la'a nyi ndara pabiya mi cha wa, kəl kurakə tanyi. 13 Cha bəziya hi mbandər nyi, nacha ngə Gadlagadla Kuma, nda cha na hya ɓəlati, ngə cha tsəfətə tə təmbəl fafa mətləu. 14 Ngə Tlakə tə nar ɗa a tə nda na bəji, ya dlədləbətə hi gadlagadla i'i, ana tsaubar i'i nda hyo gwa nəu tə hə'i nda hyo gwa dləuya biyatə ya Urdən.
Təɗəhimi təkəra Həsəli nə Katəu
15 Ana ənga, hya ɓəlatə kərnəhi mənakəu. Aka a da hya la'a səlirma madami sakanda Tlakə tə ɓwanya nə hi zəbiya ku hu'u vu Horeb wa. 16 Hya gəla, ngwa hya dyaɓəndə kərnəhi təwa ɓatlə katə wa, mada səlirma sər mi, ndara pabiya da sal ndara mala, 17 ndara pabiya da sərshishi nda tə dunəya ndara eakə nda kwa fəl biya huɗamələm, 18 ndara pabiya da səpipi nda kwa təɗə na ta ndara pabiya da kalfi nda kyo ndəla ɓiti. 19 Ngwa vanya sə da ba'a shandə hi kər hya uzhi ka həsəli nə sə inda hyo la'a biya huɗamələm wa. Ndara nə pəchi, hya, sasəlga ana dəhə alenya sə inda biya huɗamələm wa. Dəhə sə inga, anə njir dunəya ngə Hyel Tlakən hi tə nə nda. 20 Kəl ja, nahi, Tlakə tə fa'abiya hi zəbiya vu Masar, mbwa nda wi ku hu'u gədəgəɗa, ga hya ɗa ka nənyi na nji, wi nəhi ənya na.
21 Kəl ja, huɗa Tlakə tə tla tsa ya tə dəbar kəhi, cha səmnda fəla ənda a da yo dləgəlbiya Dəl Urdən gwatə hə'i nda Hyel Tlakən hi kwa nə hi, ka cha ɗa ka nəkəhi wa. 22 A tə hə'i nə yo tah, a da yo dləgəlbiya Dəl Urdən wa. Kəl ja, nahi hyo dləgəlbiya, hyo gwa dləuya hə'i mənakə nga. 23 Hya gəla, hya da ba'a far na mbandər nda Hyel Tlakən hi tə mər na hi, ngwa hya da ɓatlə katə nə kərnəhi pabiya da madami nda Hyel Tlakən hi tə katə hi tsarə wa. 24 Aka Hyel Tlakən hi wi kyara hu'u nda kwa nginda kala sə cha, Hyel ndər mər səlkəkur cha.
25 A biyama, ma hya yanda ngulisha'a ana ajin hi ga halndakər tə hə'i nga, ngə hya dyaɓəndə kərnəhi ga ɓatlətə kala katəu, chul ngəna səu, sə ɗimi cha mar Hyel Tlakən hi, ya kwa gwa'atə huɗa cho tla. 26 Ənya, jan yo nga huɗamələm ana hə'i nda ɗa ka matauli ɗa a təkəra hi, a pya hi do təɗardzə tə hə'i ngə hyo gwa dləuya biyatə ya Dəl Urdən ngə wa. A pya hi do təɗardzə tə hə'i ngə wa, kəl ja, njo zhazhinda hi pa'apa'a. 27 Aka Tlakə kwa wiɗənda hi kyo huɗa alenya jul nji, ya kəl nji tsaɗə tanyi kwa həyadzə ku huɗa alenya jul nji nda Tlakə kwa wiɗənda hi kyo huɗa nda. 28 A banda hyo ki həsəli nə katə i'i nda nja ɓatlə na wua ndara hangu, inda a da kwa la'a sə ndara kwa ngatə sə wa, ya a da kwa səma ndara tlatə shi'unər sə wa. 29 Kəl ja, ma hya gwa'a Hyel Tlakən hi tsa'anyata banda hi tə nda, hyo uya nyi. 30 Sakanda hi ku ɓwaɓwatə ti, ma sə ingə tə ɗa na hi biyama, hyo ɓəl shili da Hyel Tlakən hi, ya hyo nəu nya cha. 31 Aka Hyel Tlakən hi, Hyel cha nda kwa ngatə təhuɗəu, a da cho ngya hi ndara cha zhazhinda hi wa, ndara cha far na mbandər nda cha mər na jival kəhi təwa səmfəla wa.
Tlakəu Nacha ngə Hyel
32 Jawar ma təkəra sə inda tə tərabiya ɗəɗəm təvi bəji kəhi na, fwatə tə bəji nda Hyel tə ɓatlə ndə tə dunəya, jawar ma fwatə tə məngum huɗamələm bana yi tsa'a bananda. Vanya chulkə sə dəgal da taa ɗa wi nənna? A taa nji ngatə vanya labar chulkə nənnə ya? 33 Vanya jul nji da taa ngatə kuraka Hyel kwa ɓwanya zəbiya ku hu'u, wi nda hya ngatə nda, ya tsəuta nda na pi ya? 34 Aa vanya hyel da nda taa gwa'a cha fa'abiya vanya jul nji ka kərnyi zəbiya ku vanya hə'i, təwa dzea, səshinshin ana sərməngəl, ndara təwa dla'a, gyalkur dəgal ana dunama, ana təwa wawa'ar sər ləvəra, wi dəhə sə inda Hyel Tlakən hi tə mər tə lya hi vu Masar nda ya?
35 Nja char hi dəhə sə inga ka ga hya zəndə ənda Tlakəu nacha ngə Hyel, mapa'a nacha wa, a vanya Hyel da wa. 36 Nacha nga gwa'atə hya ngatə kuraka cha səya kya huɗamələm, aka ga cha ɓutə hi. Nacha nga gwa'atə tsə'u hya la'a hu'u nyi nda dəgal tə dunəya, ngə hya ngatə kuraka cha zəbiya ku hu'u nda. 37 Aka cha nyidatə kə'i jival kəhi, ga tabiya nyandəla nda, cha fa'abiya hi zəbiya vu Masar təwa gyalkur nyi nda dəgaləu, 38 cha gədlənda jul nji inda tə ndəɗə hi na gyalkur ana dunama biyaman hi, ga shili nahi tə hə'i kənda ga cha ɗa ka sərfa'aki kəhi, wi nəcha ənya na.
39 Ana ənga, hya ɗənghatə ənya ana hya gəziya ku ɗufwa hi ənda Tlakəu nacha ngə Hyel nda ki huɗamələm ana tə dunəya. Vanya Hyel da səkəu wa. 40 Ɓəlatə ma tsaubar ana gadlagadla nyi i'i, inda ya kwa nə hi ənya, ga hya uya biyama nahi kə'i ngulisha'a kəhi nda kwa shili hin hi, ga pya hi təɗardzə tə hə'i nda Hyel Tlakən hi kwa nə hi ka ba'anawa.
Mələm Mbu i'i nda təwa Zədərpəchi nə Urdən
41 Kəl ngə Musa tə ɗəmətsə mələm makər təwa zədərpəchi nə Dəl Urdən, 42 aka kə'i ba vanya ndə tsəya ndəu ya a da na ikur nyi wa, ya a ɗimikur da ku pama nda ɗakaɗa wa, cho nau hwi tanyi yo zhang ku huɗa mələm inda, ya cho mbəɗandə pya cha. 43 Mələm inga, na nda ingə Bezer nda kyatə dəgəl aka nyandəla Roben, Ramot a vu Giliyad aka nyandəla Gad ana Golan a vu Bashan aka nyandəla Manasa.
Dəlahimi təkəra Gadlagadla Hyel
44 Janə gadlagadla inda Musa tə nə nyi nə njir Isra'ila. 45 Inənnə ngə ɓwanya i'i, tsaubar i'i ana gadlagadla inda Musa tə nə nda ku bəji nda nda zəbiya vu Masar 46 aku dakə nda ləhə dzər Bet Peyor tewa zədərpəchi nə Dəl Urdən, tə hə'i Sihon təl njir Amori nda tə səm təlkur vu Heshbon, nda Musa ana njir Isra'ila tə kura ku nda nda kwa zəbiya vu Masar nda. 47 Nda dləuya hə'i nyi ana hə'i Og təl Bashan. Təl njir Amori ingə tsa'a kya'a nda təwa zədərpəchi nə Dəl Urdən. 48 Hə'i nda, tə səya fwatə vu Arower a nya Dəl Arnon kwa'a kyatə Dəgəl Siriyon nda njo nga Mə Harmon, 49 ana a həu dəhə Araba nda təwa zədərpəchi nə Dəl Urdən, bətə gwa nya Fa'a Araba, ana sara Mə Pisga.