Gadlagadla Kuma
(Dəla 20:1-17)
5
1 Kəl ngə Musa tə tsəmtə dəhə njir Isra'ila ga nar nda:Ngatə ma tsaubar ana gadlgadla inə yo bəzə nə hi ənya nə njir Isra'ila, hya dlədləɓətə hya ɓəlati. 2 Hyel Tlakən mən tə mbandər na mən vu Horeb. 3 A da kəl ana kə'i jival kəmən ngə Tlakə tə mbandər nə wa, kəl ja, ana dəhəkura mən namən nə na pi tangnə ənya na. 4 Tlakə tə ndər nahi nya na nya zəbiya ku hu'u a kyo məa. 5 Naya nda ta'i ku pama hi ka Tlakə tə nda na bəji ka ya bəziya hi sənda cha na, aka ləvər tə səya hi tsa hu'u nda, ya a da hya gyo mə nda wa. Ngə cha na,
6 <<Naya ngə Hyel Tlakən hi, nda tə zəbiya nahi vu Masar, zəbiya ku hə'i mavakur.
7 Ngwa ka həsəli nə vanya hyel wa, kəl naya.
8 Ngwa ka da ɓatlə katə nə kərnghə pabiya da səlirma madami kya huɗamələm ndara tə dunəya kyo ndəla hə'i, ndara kyo ndəla ɓiti wa. 9 Ngwa ka da uzhə nə nda ndara ka həsəli nə nda wa, aka naya Hyel Tlakə ngha, ndər sələkəkur ya, yo tla nəuma nə ngulisha'a tə dəbar səpəla'a njir yan nda yi tsa'a tə nyandəla nda nə zamin makərkunyi ndara fwaɗəkunyi. 10 Kəl ja, yo char nyi nyida ɗa nə zamin dəbu dəbu inda kwa nyida ɗa ana ɓəlatə gadlagadla ɗa.
11 Ngwa ka da nga tləmər Hyel Tlakə nghə təkəra ɓwa'atanyi wa, aka Tlakə kwa tlanda nyi nəuma nə ndər nga tləmə nyi ɓwa'atanyi.
12 Ka ɗənghatə Pəchir Ngyaməngya ka ɓəlatə nyi na karti, wi nda Hyel Tlakə nghə tə tsau nghə bar. 13 Hanyi kwah ko mər dəhə tlər ngha, 14 kəl nda pəchir məɗəfəkunyi Pəchir Ngyaməngya ngə nə Hyel Tlakə ngha. Pishinda a da ko mər kala tlər wa, mada nakə təkərngha, ndara zər ngha ndara kwa ngha, mavi'i ngha, tla ngha, kwara ngha, sərshishi ngha, ndara mihiɓi inda kwa ngya kə'i ka, aka ga mava ngha ana kwatəra nghə ɓəliyasar wi nəngha.
15 Ka ɗənghatə ənda mava kə ɗakaɗa vu Masar, ngə Hyel Tlakə nghə tə həbiya nghə təwa gyalkur dəgal ana dunama nyi. Nacha gwa'atə Hyel Tlakə nghə tə tsau nghə bar ka ɓəlatə Pəchir Ngyaməngya.
16 Ka hətə nyi səli nə ada ngha ana ama ngha, wi nda Hyel Tlakə nghə tə tsau nghə bar, tsa'aka pya ka təɗardzə ana ka ga ka uya ngya mənakə ku hə'i nda Hyel Tlakə nghə kwa nə ngha.
17 Ngwa ka da tsa ndə wa.
18 Ngwa ka da mər kasalikur wa.
19 Ngwa ka da həl wa.
20 Ngwa ka da tla gəzhi təkəra təwul nghə wa.
21 Ngwa ka da ndahuɗə mala təwul nghə wa. Ngwa ka ndahuɗə ki təwul ngha, ndara fa nyi, ndara mava nyi, ndara kwatəra nyi, tla nyi, kwara nyi ndara kala sənda nə təwul nghə wa.>>
22 Innən ngə gadlagadla inda Tlakə tə bəziya na kurakə dzəgam dzəgamə nə dəhə daɓədzər nji inda kyo mə nda, zəbiya ku hu'u, ləmbəkəu ana kutlə ɗimiɗimi nda, ya a da cha tsakəngər vanya sə wa. Ngə cha tsəfətə tə təmbəl fafa tsa'a mətləu ga na'a.
Ləvər tə Səya Nji inda
23 Ngə Musa tə biyama na ɓwanya, ga na, <<Nda hya ngatə kurakə kwa zəbiya ku kutlə nda, ku bəji nda mə nda naɓənaɓə na hu'u, ngə dəhə gau nyavi kə hi ana njirawawa'a kəhi tə shili da ya. 24 Ngə hya na, <Hyel Tlakən mən char mən tə gyalkur nyi ana dəgalkur nyi, ya a ngatə tə ea kuraka cha zəbiya ku hatla hu'u nda. A la'a tə ea ənya ənda Hyel kwa nau ɓwanya na nji, ya nji do kuɗə wa.> 25 Sakan ja ya, mya gwa'atə məno kuɗa? Hu'u dəgal ngə kwa nginda mən, ya təkəɗəu məno kuɗa, ma məna ngatə kuraka Hyel Tlakən mən tə ɓwanya na mən səkəu. 26 Vanya ndə manə ngə taa ngatə kuraka Hyel nda na pi kwa ɓwanya zəbiya ku hu'u, wi nəkəmən na, ya tsə'utanyi na pya? 27 Ma'i ma yi ləhəu, ka ga hya yi səhimi da dəhə sə inda Hyel Tlakən mən kwa na. Kəl ba'a hya shili dəkar mən kala sənda Hyel Tlakən mən tə dəkar hi. Məno səbiya himi, ya məno nəu nya cha.>>
28 Tlakə ngatə tə sənda hya nar ɗa, ngə Tlakə tə nar ɗa, <<A ngatə tə ya dəhə sə inda nji ingə tə na nə ngha, ya sə inda nda na tsa'atsa'a. 29 Kəl ga cha ɗa ndo nau nəubiya ana ɓəlatə gadlagadla ɗa wa'atanyi, məlna nanda ana ngulisha'a kənda kwa uya ngya mənakə ba'anawa.
30 <<Ma'i, ka yi nar nda, nda bəl kyo madləɓa kənda i'i. 31 Kəl ja, nakə nəngha, ko ngya naya tangna, ka ga ya nə nghə tsaubar i'i, gadlagadla i'i ana ɓwanya i'i nda ko dlədləɓətə nda, inda nda kwa gwa mər tlər ni tə hə'i nda ya kwa nə nda ka nəkənda.>>