Gadladla nda Ndiya
6
1 Ja'inə gadlagadla i'i, tsaubar i'i ana ɓwanya i'i nda Hyel Tlakən hi tə nar ɗa ya dlədləɓətə hi ka hya ɓəlatə tə hə'i ngə hyo biya dləuya biya tiya Dəl Urdən nga, 2 ka ga nahi, ngulisha'a kəhi ana ngulisha'a inda kwa shili hin nda, nda ləvər Hyel Tlakən hi, kəda ga cha wur ɗa ana pi hi təwa ɓəlatə tsaubar nyi i'i ana gadlagadla nyi i'i nda ya kwa nə hi, ga pya hi təɗardza. 3 Səya ma himi njir Isra'ila, hya gəla hya ɓəlatə ga hya uya ngya mənakə ana hya yatəkər tə hə'i nda mwamwa ana 'ua kwa hwi kwa, tang wi nda Hyel Tlakə nə kə'i jival kəhi tə mər alkawal.4 Ngatə ma ja njir Israila! Hyel Tlakən mən, Tlakə zhang. 5 Ka nyida Hyel Tlakə ngha ana dəhə ɗufwa ka ana dəhə pya ka ana dəhə dunama ngha. 6 Gadlagadla inə yo nə nghə ənya na cha ɗa ku ɗufwa ka. 7 Ka dlədləɓətə nyi nə ngulisha'a ngha. Ka ndər təkəri ma ko ngya ku ki ana ma ko ma'i ku laku, ku sakanda ko piya ana ku sakanda ko hya'ati. 8 Ka mbatə nda ka ba'ada atə cha ka, ana ka mbatə nda ku nyama ka. 9 Ka tsəfətə tə shimbal nə nyavi ngha ana tə nyaki ngha.
10 Ma Hyel Tlakən hi tə gwa na hi tə hə'i nda cha səmnda nyi fəla nə kə'i jival kəhi Ibrahim, Ishaku ana Jakop ka cha nə hi, hə'i nda na mələm wawa'a, gumaguma, inda a da na hya hər wa, 11 ana ki inda nyinyinyi na sə mənakə inda a da na hya pəu wa, ka'ur ɓiti inda a da na hya la wa, ana ngakə anap ana fa zaitun inda a da na hya chi wa, ma hya səm ga nyi, 12 hya gəla, hya da ba'a far na Tlakəu, nda həbiya hi vu Masar ku hə'i mavakur.
13 Ləvər ma Hyel Tlakən hi, kəl nacha tanyi hyo mər mavakur nə nyi, ma hyo hə salkur hya hə na tləm nyi. 14 Ngwa hya nəu alenya hyel wa, hyel nji ingə dzən hi wa, 15 aka Hyel Tlakən hi nda na ngya ku pama hi, ndər səlkəkur cha ya huɗatla nyi kwa səya təkəra hi, ya cho zhazhinda hi tə dunəya. 16 Ngwa hya dzə Hyel Tlakən hi wi nda hya mər vu Massa wa. 17 Kəl hya mbabiyadza hya ɓəlatə gadlagadla nyi i'i, tsaubar nyi i'i ana ɓwanya nyi i'i nda cha nə hi. 18 Hya mər sə inda tsa'atsa'a ya mənakə mar Tlakəu, ga hya uya ngya mənakəu, məlna hyo nau gwa dləuya hə'i mənakə nda Tlakə tə nə nyi nə kə'i jival kəhi təwa səmfəla, 19 hyo yi gədləbiya njir dawa kəhi, wi nda Tlakə tə mər tə hi alkawal.
20 A biyama, ma ngulisha'a kəhi tə jau hi, <<Mi sə nda gadlagadla, tsaubar ana ɓwanya inda Hyel Tlakən hi tə nə hi kwa cha?>> 21 Hya nar nda, <<Mavi'i Fir'auna ea vu Masar ɗaka ɗa, kəl ja, Tlakə tə fa'abiya ea vu Masar təwa gyalkur cha cha. 22 A tə lya ea, Tlakə tə mər səshinshin i'i ana sər ləvər wawa'a i'i təkəra Masar, Fir'auna ana dəhə njir ki nyi. 23 Cha fa'abiya ea vu Masar ga cha shili na ea tə hə'i na, hə'i nda cha mər alkawal təwa səmfəla cho nə nyi nə kə'i jival kə ea. 24 Tlakə tə nar ea, ea nəubiya dəhə tsaubar ina ana ea ləvər nyi, ga ea uya biyama ana ga pya ea təɗardza, wi nəcha ənya na. 25 Ya ma ea nau ɓəlatə gadlagadla inə Hyel Tlakə tə nə ea nə mənakəu, wi nda cha tsau ea bar, cho ɗa ka tsatsa'akur nə ea.>>