Nji inda nə Tlakəu
(Dəla 34:11-16)
7
1 Ma Hyel Tlakən hi tə gwa na hi tə hə'i ngə hyo gwa dləuya nga, Tlakə kwa gədləbiya hi jul nji ɗanghəu, Jul nji pampam məɗəfa inda wawa'a matsa hi ya a ndəɗə hi tə nda dunama, nanda ingə njir Hiti, njir Girgash, njir Amori, njir Kan'ana, njir Perizi, njir Hivi ba'a njir Jebusi. 2 Ya ma Hyel Tlakən hi tə nə hi gyalkur təkəra nda ngə hya kura nda, tuku hya zhazhəbiya nda pa'apa'a. Ngwa hya gwa'a ngya mənakə kə'i nda wa, ya ngwa hya ngatə təhuɗə kənda wa. 3 Ngwa hya hədzə kə'i nda wa. Ngwa nda hə ku'i kəhi nda hə wa, ya ngwa nguli shili kəhi hə ku'i kənda wa. 4 Aka ndo nau gwa'atə ngulisha'a kəhi kwa ngyar nəu ɗa, ndo ki həsəli nə alenya hyel i'i, ya huɗətlar Tlakə kwa səya təkəra nda, ya ɗəɗəu tanyi cho kuɗənda hi. 5 Jan sənda hyo mər na nda, hya huhuɓənda dzəgana katə kənda i'i, hya wazənda hangu hatəmachi kənda i'i, hya gəganda udzəm Ashera kənda i'i ba'a nginda katə kənda i'i ku hu'u. 6 Aka nahi nji karti hi nə Hyel Tlakən hi. Hyel Tlakən hi tabiya hi tə ku pama njir dunəya dəhə ka ga hya ɗa ka nji inda nənyi, nji inda cha dzəɓəbiya.7 Aka a Tlakə da nyida hi ga tabiya hi aka hya ndiya alenya jul nji na ɗangkur wa, aka nahi nga ndiya na kushikur ku dəhə jul nji. 8 Kəl ja, aka Tlakə tə nyidatə hi ga ɓəlatə səmfəla nda cha mər nə kə'i jival kəhi, nacha gwa'atə cha həbiya hi na chi nə gyalkur, ga mbəɗəndə hi tsa mavakur da kiɗa gyalkur təl Fir'auna vu Masar. 9 Aka əngə ja, hya zəndə ənda Hyel Tlakə nacha ngə Hyel kəhi; Hyel cha nda na jiri; kwa gəzəya alkawal ya cha kwa char nyi nyida kəla wura nə nyandəla nji dəbu dəbu nda kwa nyida nyi, kwa ɓəlatə sənda cha tsau nda bar ni. 10 Kəl ja,
nji inda tə ngya nyi
a da cho kas cha cha tsa ɓu nda ana kuɗənda nji inda kwa ngya nyi wa.
11 Aka ənga ja, ɓəlatə ma tsaubar nyi, ana gadlagadla nda ya kwa nə hi ənya.
12 Ma hya ɓəlatə gadlagadla inə mənakəu ga nəubiya nda tsatsa'a, Hyel Tlakən hi kwa nyabiya mbandər nyida nyi nə hi, wi nda cha mər alkawal nə kə'i jival kəhi. 13 Cho səkə hi papa'akur, ya cho gwa'atə hyo tsakə na ɗangkur. Cho səkə hi papa'akur təwa uya ngulisha'a, təkəra sə zwazwa, wi ka uhi, taɗər anap ana mal. Cho səkər papa'akur təkəra sərshishi kəhi, wi ka tla ana kətəng kə'i kua, tə hə'i nda cha səmfəla nə kə'i jival kəhi cho nə hi. 14 Hyo uya papa'akur matsa dəhə alenya jul nji. Ndə zhang da lya hi ndara sal ndara mala nda kwa tar yah wa. Ya kala sərshishi kəhi, kwa ɗa na ngulisha'a nya ndəla cha. 15 Tlakə kwa ɓəlatə hi tsa dəhə kala shiləka. A da cho tsəka hi na shiləkə ɗimiɗimi nda hya la'a vu Masar nda wa, kəl ja, dəhə nji inda kwa ɗa tsa hi, cho pəkə nda shiləka. 16 Tuku hya kuɗənda dəhə jul nji inda Hyel Tlakən hi kwa nə hi gyalkur təkəra nda, ngwa hya ngatə təhuɗə kənda wa, ya ngwa hya həsəli nə hyel kənda i'i wa.
17 Hyo nau na nə kərnəhi, <<Jul nji inə ndəɗə mən tə na dunama, a man məno ɗana nau gədləbiya nda?>> 18 Kəl ja, ngwa ləvər da səya hi tsa nda wa, hya ɗənghatə mənakəu, sənda Hyel Tlakən hi tə mərtə nyi nə Fir'auna ana dəhə njir Masar. 19 A la'a tə hi səshinshin ana sərməngəl, dla'a, gyalkur dəgal ana dunama na lya hi, ana ənda Hyel Tlakən hi tə fa'abiya hi zəbiya vu Masar. Əngə tanyi sənda Hyel Tlakən hi kwa mərtə nyi nə dəhə jul nji inə hyo ləvər tsa nda sakan na. 20 Dəhə ka ənga, Hyel Tlakən hi kwa sətə vanya sə nda kwa shili gwazhiya pama nda, kwa kuɗənda dəhə ka nji inda tə mbua. 21 Ngwa hya da ləvər nda wa, aka Hyel Tlakən hi ku huɗa hi cha, Hyel ndər gyalkur ya ndə nda ndiya na səli cha. 22 Ka nyabəra ka nyabəra, Hyel Tlakən hi kwa gədləbiya dəhə jul nji ingə biyaman hi inga. A da hyo nau gədlənda nda aka zhang wa, a tsa kum takə da yatəkər təkəra hi, ya ndo ləvər nda hi. 23 Kəl ja, Hyel Tlakən hi kwa gwa'atə hyo kura nda, cho gwazhiya pama nda kəl bəji nda nda kuɗə dəhəu. 24 Cho taɓəu hi təl kənda i'i ku cha hi, ya hyo zhazhinda tləmən nda tə dunəya. Ndə da kwa nau ta'i ka pah hi wa, hyo kuɗənda nda. 25 Hya nginda katə kənda i'i. Ngwa hya da fa'a azurfa kənda ndara bəjingha inda dzən nda wa, ngwa hya fa'a mada nə kərnəhi wa, ma hya fa'atə cho ɗa ka ləbam nə hi, aka sər həɗə cha mar Hyel Tlakən hi. 26 Ngwa hya shili na kala sər həɗə ku ki kəhi wa, ma hya shili nə njo kuɗənda hi. Hya həɗə tsari, hya ngyari pa'apa'a, aka sənda njo zhazhinda nga.