Dləu Hə'i nda Mənakəu
8
1 Hya ɓəlatə dəhə gadlagadla inda ya nə hi ənya, tsa'aka pya hyo təɗardza, hya yatəkər, ka ga hya nau gwa dləuya hə'i nda Tlakə tə mərtə nyi alkawal nə kə'i jival kəhi. 2 Hya ɗənghatə ənda fa fwaɗəkumnyi, Hyel Tlakən hi tə nəu na dəhəkura hi tə dadil takəu, ka cha dlədləɓtə hi həyakər, cha dzətə hi, ga cha ngabiya sənda ku ɗufwa hi, ndara kwa nau hya ɓəlatə gadlagadla nyi, ndara a da hyo nau wa. 3 Cha dlədləɓtə hi həyakər, ga gwa'atə huɓə tə tə hi, a hir nga, cha nda nyandə hi na manna, sənda nahi ndara kə'i jival kəhi da zəndə wa, ga cha dlədləɓətə hi ənda a ndə do ngya ka sərsum tanyi wa, kəl nda aka dəhə kala ɓwanya nda kwa biya ku nya Tlakəu. 4 Ku fa fwaɗəkumnyi inga, kar kəhi da utlə wa, ya a hya hi da mba wa. 5 Hya zəndəbiya ku ɗufwa hi ja, ənda wi ngə ndə kwa ɓu zər nyi, əngə tanyi ngə Tlakə kwa ɓu hi.6 Ana ənga, ɓəlatə ma gadlagadla Hyel Tlakən hi, hya nəubiya ana hya ləvər nyi. 7 Aka Hyel Tlakən hi kwa gwa na hi gwa tə hə'i mənakəu, hə'i nda na dlələm i'i ana dəl i'i, ana tsədzəɗə inda kwa tlə gədagəda kyo dakəu ana kyatə dəgəl i'i, 8 hə'i nda na alkama, ana bale, anap, kanda, pomegranet, mal zaitun ana mwamwa chiɗi. 9 Hə'i nda a ndə do tar sərsum tə wa, ya vanya sə da njo tar tə wa, hə'i nda njo uya lyang ku fafa kənda, ya hyo nau latsə ndzə kwa.
10 Ma hya səm ga nyi, hya fal Hyel Tlakən hi, aka hə'i mənakə nda cha nə hi.
Təɗəhimi Təkəra Far na Tlakəu
11 Hya gəla tsa hya da far na Hyel Tlakən hi, ngwa hya da ngyar ɓəlatə gadlagadla nyi i'i, tsaubar nyi i'i ana ɓwanya nyi i'i, inda yo nə hi ənya wa. 12 A tsa ma hya səm ga nyi, ga həriya ki kəhi mənakəu ga vaviya mbwar ngya, 13 ma sərshishi kəhi, tla kəhi kətəng kəhi i'i tə yatəkər, ana ma hya ɗa njir gəna nə azurfa ana bəjingha, 14 ngwa hya da ɗa ka njir jalvi hya far na Hyel Tlakən hi, ndə nda tə fa'abiya hi zəbiya vu Masar, zəbiya ku hə'i mavakur wa. 15 Cha nəu na hi təwa dadil takə nda dlaɓəu ya kwa ləvərnda nji, hə'i nda na pwabu inda chaɓə na kəlpa, ana idah i'i, hə'i 'ulə'ulə nda pa'a na ɓiti. Ngə Tlakə tə nə hi ɓiti zəbiya ku fafa ɓaɓal nda. 16 Nacha ngə ndə nda tə nə hi manna hya səm tə dadil takə nda, sənda a jival kəhi da zəndə wa, aka ga cha dlədləɓtə hi həyakər, cha dzətə hi, tsa'aka a tə bata, cho mərtə hi sə mənakəu. 17 Ko nau na nə kərngha, <<Gyalkur ɗa ana dunamar cha ya na gwa'atə ya ɓutsə gəna.>> 18 Kəl ja, hya ɗənghatə na Hyel Tlakən hi, aka nacha nga tə nə hi gyalkur uya gəna, ga cha nyabiya mbandər nyi nda cha mər təwa səmfəla nə kə'i jival kəhi, wi nəcha ənya na.