Tlakə kwa Zhazhənda Njir Hə'i Kan'ana
9
1 Səya ma himi ja njir Isra'ila. Sakan ja, kaɗə hya dləgəlbiya Dəl Urdən ka ga hya gwa gədləbiya jul nji inda tə ndəɗə hi dunama ana gyalkur, nji inda na mələm wawa'a i'i ana ɓangtili mələm kənda kwa'a ki huɗamələm. 2 Nji njinyi na dunama, ya janə nda dzəgam dzəgaməu, wi nyandəla Anakəu, kwa zəndə nda hi, ya kwa ngatə hi nja kwa na, <<Wa kwa nau shukwar nya njikə Anaka?>> 3 Kəl ja, ənya hyo la'a na kərnəhi ənda Hyel Tlakən hi kwa təra biyaman hi wi hu'u gəɗəgəɗa. Cho ndiya dunaman nda, ya cho kuɗənda nda man hi. Təwa ənga hyo nau gədləbiya nda ba'a zhazhinda nda kuskusu, wi nda Tlakə tə mərtə hi alkawal.4 Ahir ma hya gədləbiya nda man hi, ngwa hya na nə kərnəhi, a bəra, <<Tlakə tə shili na ea ka ea dləuya hə'i na aka tsa'atsa'akur kə ea wa.>> A da əngə wa, a təkəra pahakur jul nji ingə nga gwa'atə Tlakə tə gədləbiya nda man hi. 5 A da aka tsa'atsa'akur kəhi ndara mənakəkur kəhi ngə tə gwa'atə hyo gwa dləuya hə'i kənda wa, kəl ja, aka pahakur jul nji ingə nga, Hyel Tlakən hi kwa gədləbiya nda man hi, ga cha nyabiya səmfəla nyi nda cha mər nə kə'i jival kəhi, na nda ingə Ibrahim, Ishaku ana Jakop. 6 Hya zəndə ja, ənda, Hyel Tlakən hi da kwa nə hi hə'i mənakə na ka nəkəhi aka tsa'atsa'akur kəhi wa, aka nahi nji kəla ngatə ndər hi.
Zər Daləu Bəjingha
7 Hya zəndə ja, ya ngwa hya da ba'a far ənda hya gwa'atə huɗa Tlakə tə tla tsa hi tə dadil takə wa. Fwatə tə pəchi nda hya ngyar Masar ba'a tə bəji nda hya shili tangnə nə hi tə ənya na, mwali tanyi ngə hyo tlə nə Tlakəu. 8 Hya tləya huɗa Tlakə gagaɗə vu Horeb, huɗatla nyi tə gwa'atə cha kuɗənda hi. 9 Bəji nda ya təra gi dləu təmbəl fafa inda nja tsəfətə mbandər nda Tlakə tə mər na hi nda, ya gi ngya kyo mə nda ɓupuchi fwaɗəkumnyi ana hanyi fwaɗəkumnyi, a da ya səm sərsum wa, ya a da sa ɓiti wa. 10 Ngə Tlakə tə na'a təmbəl fafa mətlə ga tsəfətə tsəfə na cha kərnyi ti, gadlagadla inda Tlakə tə bəzə nə hi kyo mə zəbiya ku hu'u nda, ku nda hya tsəmtədzə tə sara mə nda.
11 Ahir ɓupuchi fwaɗəkumnyi ana hanyi fwaɗəkumnyi nda, na cha ngə Tlakə tə na'a təmbəl fafa mətlə inda, na nda ingə təmbəl mbandəra. 12 Ngə Tlakə tə nar ɗa, <<Hya'atə ka ma'i səya sakana, aka nji nghə inda ka fa'abiya zəbiya vu Masar nda səwati. Janə nda shata nda tə ɗəɗəu tsa sə inda ya tsau nda bar ni, ngə nda ɓatliya nyi katə nə kərnənda.>> 13 Ngə Tlakə tə Tsakətə nar ɗa, <<Vəlvələu, a la'atə ya nji ina, nji kəla ngatə ndər ina.>> 14 Ngya ɗa, ga ya kuɗənda nda ya zhazhinda tləmən nda tə dunəya. Ba ya mərtə nghə ka hə'i dəgaləu, ya ɗang matsa nda.
15 Ngə ya səya kyo mə nda ku bəji nda cha naɓənaɓə na hu'u. Ya səya na təmbəl fafa mətlə nə mbandər inda ku cha ya. 16 Nda ya ndzamari, ngə ya la'a a mərtə hi səpəla'a 'ualə mar Hyel Tlakən hi, hya ɓatlətə nyi katə nə kərnəhi nə səlirma zər daləu. Hya shata hi ɗəɗəu tsa sənda Tlakə tə tsau hi bar ni. 17 Əngə ya uchənda təmbəl fafa mətlə inda ku cha ya nda səya hu'i, ngə nda huhuɓə man hi.
18 Ngə ya dla ga piya mar Tlakə ɓupuchi fwaɗəkumnyi ana hanyi fwaɗəkumnyi, a ya da səm sərsum wa, ya a da sa ɓiti wa, tə dəbar səpəla'a nda hya məra, hya mər sə ɗimi mar Tlakəu ga gwa'atə huɗa cha tla. 19 Ləvər tə səya ɗa tsa huɗatla ana huɗatla ɗimiɗimi nə Tlakəu, aka huɗatla nyi tsafətə ka cho kuɗənda hi. Kəl ja, Tlakə tə səhimi da ya səkəu. 20 Huɗətla Tlakə tə tsafə ka cho tsəya Haruna. Ngə ya gədi Tlakə aka Haruna tsəu, ngə cha ngya nyi. 21 Əngə tsəu, ya hətə səpəla'a kəhi ka na'a, ya hətə zər daləu nda hya ɓatlətə nda, ga nginda ku hu'u. Ngə ya tasəya ga ha'agwa kəɓətə wi bərbər ga pətə gwatə dəl nda kwa səya kyo məa.
22 Əngə tsə'u hya tləya huɗa Tlakə vu Tabera, Massa ana Kibirot Hatava.
23 Ya Tlakə tə sə hi ku bəji nda hyo ngyar Kadesh Baniya, Tlakə tə na, <<Ma'i ma hya gwa dləuya hə'i nda ya nə hi.>> Ngə hya tləmwali nə tsaubar Hyel Tlakən hi. Na hya dləukər ɓwanya nyi wa, ya a hya nəu nya cha wa. 24 Na hi njir tləmwali nə Tlakə hi fwatə tə bəji nda ya zəndə hi ti.
25 Ya piya pəraɓə mar Tlakəu ɓupuchi fwaɗəkumnyi ana hanyi fwaɗukumnyi tə dəbar kəhi, aka Tlakə tə na cho kuɗənda hi. 26 Ya gədi Tlakəu ga na, <<Maki Tlakə Ndər Gyalkur Dəhəu, ngwa ka da kuɗənda nji nghə wa, nji inda ka dləuya vu Masar, nji inda ka pəliya na gyalkur dəgal ngha. 27 Ɗənghatə na mavi'i nghə Ibrahim, Ishaku ana Jakop. Far na kəla ngatə ndərkur nji ina, pahakur kənda ana səpəla'a kənda. 28 Ma a da wa, njir Masar, kwa nda na, <Aka a Tlakə da kwa nau fa'atə nda gwatə hə'i nda cha mərtə nda alkawal wa, ya aka a cho i nda wa, cha fa'abiya nda ga zəbiya kuɗənda nda tə dadil takəu.> 29 Kəl ja, nji nghə inga, nji inda ka tabiya ga fa'abiya nda təwa gyalkur dəgal ngha ya ana dunamar cha kərngha.>>