Musa tə Dləutsə Gadlagadla Səkəu
10
1 A tə bəji nda, Tlakə tə nar ɗa, <<Dzəɗəbiya təmbəl fafa mətlə wi alenyi inda tangərma nda, ka zədə həya ɗa kyo mə na. Ətsəu, ka ɓatlətə gwarara wua. 2 Yo tsəfətə ɓwanya inda tə təmbəl fafa tangərma nda ti, inda ka huhuɓənda inda, ba'a ka pəu nda go gwarara wu nda.>>3 Ngə ya ɓatlətə gwarara ana wur hyachi ga dzəɗəbiya təmbəl fafa tsa'a mətlə wi inda tangərma inda, ngə ya fa'atə ga təra nə gyo mə nda. 4 Ngə Tlakə tə ɓəla tsəfətə Gadlagadla Kuma ti, tang wi inda haaɗa nda, inda cha bəzə nə hi zəbiya ku hu'u kyo mə nda, tə pechi nda hya tsəmtədzə tə sara mə nda. Ngə Tlakə tə na'a təmbəl fafa inda. 5 Ngə ya ɓəl səya kyo mə nda, ga pəu təmbəl fafa inda go gwarara nda ya ɓatlətə nda, wi nda Tlakə tə tsau ɗa bar, ya tsəuta nda ku gwarara nda ba'a ənya.
6 (Ngə njir Isra'ila tə ɓəla ghəya ma'i hya'atə dzər kaur ɓiti nə njir Jakan, ga təra yi Mosera. Tangnda ngə Haruna tə tah, ngə nja haɗiya nyi, ngə zər nyi Eleyazar tə fa'abiya ki na tlər pəristkur nyi. 7 Hya'atə tangnda, ngə nda təra yi Gudgoda, nda nda ngyar mbwa nda tsəu, ngə təra yi Jotbata, mbwa nda na dəl ɗang ti. 8 Tə bəji nda ngə Tlakə tə tabiya njir nyavi Levi ka hə gwarara mbandər Tlakəu, aka nda ta'i mar Tlakə ka mər tləra ana ga nda səkənyi papa'akur nə nji, ya ba'a ənya tlər kənda nga. 9 Na cha gwa'atə nyandəla Levi a da na mbaɗə ndara sərfa'aki ku huɗa kə'i zamə nyi wa, aka Tlakə ngə sərfa'aki kənda, wi nda Hyel Tlakən hi tə mərtə nda alkawal.)
10 Ya ɓəla ngya ɓupuchi fwaɗəkumnyi ana hanyi fwaɗəkumnyi kyo mə nda, wi nda ya mər tangərma nda, ngə Tlakə tə ɓəla səhimi da ya səkəu. Ya Tlakə da i cha kuɗənda hi wa. 11 Ngə Tlakə tə nar ɗa, <<Hya'atə ma, ka nəu na nji ingə biyama, ga nda gwatə hə'i nga, nda gwa dləuya wi nda ya səmfəla nə kə'i jival kənda.>>
Ləvər Ma Tlakəu
12 Sakan ja njir Isra'ila, sənda Hyel Tlakən hi kwa gwa'a tsa hi, na cha ngə hya ləvər Hyel Tlakən hi, hya mər sənda cho i, hya nyida nyi, hya hətə nyi səli nə Hyel Tlakən hi na dəhə ɗufwa hi ana dəhə pya hi. 13 Ana tsəu, hya ɓəlatə gadlagadla Tlakəu ana ɓwanya nyi inda ya kwa nə hi ənya, aka mənakəkur kəhi.
14 Dəhə huɗamələm, mada huɗamələm nda ndiya na naɗəu, dunəya ana dəhə sə inda kwa, nə Hyel Tlakən hi inga. 15 Dəhə ka ənga, Tlakə tə nyidatə kə'i jival kəhi gagaɗa, ga tabiya nda, ana nyandəla nda, ndiya matsa alenya jul nji, wi nəcha ənya na. 16 Əja ya, fwatə ənya mər ma sənda Tlakə kwa i,a ngwa tsə'u hya ɗa nji kəla ngatə ndər wa. 17 Aka Hyel Tlakən hi, Hyel nə dəhə sə'inda nji kwa həsəli nə nda, Tlakə nə tlakə i'i, Hyel nda dəgaləu ndər gyalkur ndə nda njo kina ləvəra, nda pa'a kwa tagəl ya a da cha kwa dləu vangula wa. 18 Cha kwa ta'i tiya nguli maha ana mahi'ifi, ya cha kwa nyida mihiɓi, cho nənyi sərsuma ana sər handzi. 19 Ana ənga, hya nyida mihiɓi, aka mihiɓi hi ɗakaɗa vu Masar. 20 Kəl hya ləvər Hyel Tlakən hi ana hya həsəli nə nyi. Hya nəu nyi na jiri ana ma hyo hə salkur hya hə ku tləm nyi. 21 Nacha ngə ndə nda hyo kina fala; nacha ngə Hyel kəhi, ndə nda tə mər sər məngəl ana sər ləvər nda hya la'a na lya hi. 22 Jival kəhi inda tə gwa Masar dəhə dəhəu na nda məɗəfkumnyi nda, ya ngə Tlakə tə mərtə hya yatəkər ɗang wi sasəlga ki huɗamələm.