Səlir Tlakəu
11
1 Kəl hya nyida Hyel Tlakən hi ana hya ɓəlatə sə inda cha na, ɓwanya nyi i'i, tsaubar nyi i'i ana gadlagadla nyi i'i wa'atanyi. 2 Hya zəndə ənda a da a nə nguli kəhi nə ya kwa ɓwanya wa, nji inda da ɓə na ɓu nda Hyel Tlakən hi tə məra ndara la'a səli nyi, ndara gyalkur dəgal nyi ndara dunamar cha kərnyi wa. 3 Səshinshin nda cha məra ana sə'inda cha mər vu Masar, a nə Fir'auna təl Masar ana dəhə hə'i Masar wa. 4 Sənda cha mər nə ləvaləva Masar, anə taku nyi i'i ana charkaina taku nyi i'i, ənda cha haɗiya nda na ɓiti Fa'a Dəzə ku nda nda kwa gədlə hin nda, ana ənda Tlakə tə zhazhinda nda pa'apa'a wa. 5 A da nguli kəhi ngə tə la'a sə nda Tlakə tə mər nə hi tə dadil takə təvi hya shili tangna, 6 ana sənda cha mər nə Datan ana Abiram, nguli shili Eliyab nda ku nyandəla Roben wa. Hə'i tə mbəɗa ga ndasənya nda dəhə ka njir ki kənda, madləɓa kənda ana dəhə səpipi nda nəkənda. 7 Kəl ja, nahi na kərnəhi ngə tə la'a dəhə sə wawa'a ingə Tlakə tə mər inga.8 Nəubiya ma gadlagadla inə ya kwa nə hi ənya na, ga hya uya dunamar gwa dləuya hə'i nə kwa ɗa ka nəkəhi biyamar Dəl Urdən na, 9 ga pya hi təɗardzə tə hə'i nda Tlakə tə səmfəla cho nə nyi nə kə'i jival kəhi ana nyandəla nda, hə'i nda 'ua ana mwamwa kwa hwi kwa. 10 Hə'i ngə hya kwa gwa dləuya nga, a da wi hə'i Masar nda hya zəbiya kwa wa. A hinda, ma hya tləkəya chuli səu, kəl hya mbabiyadzə ga tsa'a ɓiti tə təvi cho ɗa. 11 Kəl ja, hə'i ngə hya kwa gwa dləuya biya tə ya Dəl Urdən nga, hə'i nda dəgəl kə'i dakə i'i nda par kwa təɗə ti 'ualə'ualə nga. 12 Hə'i ngə tsəu, Hyel Tlakən hi kwa tsamarti, lya Hyel Tlakən hi tyakə tanyi təkəra hə'i nga, fwatə tə ghəyar fa biya tsa'atə udiya nyi.
13 Ana ənga, ma hya ɓəlatə gadlagadla nə ya kwa nə hi ənya nə na jiri, ma hya nyida Hyel Tlakən hi ana hya hətə nyi səli na dəhə ɗufwa hi ana dəhə pya hi, 14 yo təɗə par səya tə hə'i tə bəji tsa'atsa'a, par səyar jamun ana par fwakəu, məlna hyo məriya səuhiuhi, ɓitir anap ana mal zaitun. 15 Tlakə kwa gwa'atə sar kwa tsə tə takəu anə sərshishi kəhi, əngə hyo səma, ya hyo nyi.
16 Kəl ja, hya gəla, tsa ɗufwa hya da shandə hi kər hya həsəli nə alənya hyel ana hya mər mavakur nə nda. 17 A tsa huɗa Tlakə da tla tsa hi, cha haɗənda huɗamələm tsa par da təɗa, ana cha katə hə'i tsa a da biyandə sakəda, ya ɗəɗəu tanyi hyo kuɗə tə hə'i mənakə nə Tlakə kwa nə hi na. 18 Gəziya ma ɓwanya ɗa inə ku ɗufwa hi ana ku jigadəma kəhi, hya mbatə tə cha hi ana nyama hi ka ba'ada. 19 Hya dlədləɓətə nyi nə nguli kəhi, hya ɓwanya təkəri ma hi ku ki ana ma hyo ma'i ku laku, ma hyo piya ana ma hyo hya'ati. 20 Hya tsəfətə tə udzəm nyavi ana nə nyaki kəhi, 21 ga pya hi ana nə nguli kəhi kwa təɗardzə tə hə'i nda Hyel Tlakən hi tə mərtə nyi alkawal nə kə'i jival kəhi, kəda ga cha wur ɗa huɗamələm gi kəra dunəya.
22 Ma hya ɓəlatə gadlagadla inə ya kwa nə hi na jiri, nacha ngə hya nyida Hyel Tlakən hi, hya mər sə inda cho i ana hya nəu nyi na jiri. 23 Əngə tsə'u Tlakə kwa gədləbiya dəhə jul nji ingə biyaman hi nga, ya hyo gwa ngya tə hə'i nji inda tə ndəɗə hi dunama ana gyalkur. 24 Dəhə mbwa nda hya həya na hya hi, cho ɗa ka nəkəhi, mətla hə'i kəhi ghəya tə dadil takə yi tsa'a vu Lebanon, ana fwatə ku Dəl Yufretis gwa tsa'a təwa təɗərpəchi nə Fa'a Meditereniya. 25 Ndə da nji ka cho katə hi wa. Wi nda Hyel Tlakən hi tə mərtə hi alkawal, cho gwa'atə nji kwa ləvər hi ya ndo dzədzi, kala banda hya ma'i ti.
Papa'akur ndara Shu'a
26 Ənya, janə ya fiya hi tə papa'akur ndara shu'a hya tabiya, 27 hyo uya papa'akur, ma hya nəubiya gadlagadla Hyel Tlakən hi nə yo nə hi ənya na, 28 hyo uya shu'u tsə'u ma hya ngyar nəubiya gadlagadla Hyel Tlakən hi ga shata hi tsa sənda ya tsau hi bar nə ənya na, ga nəu alenya hyel i'i, inda pa'a hyo zəndi. 29 Ma Hyel Tlakən hi tə gwa na hi tə hə'i nə hyo gwa dləutsə na, hya gwa bəzəya papa'akur i'i a nya Mə Gerizim, hya bəzəya shu'u i'i tsə'u kya nya Mə Ebal. 30 Mə ingə kya'a, təwa təɗərpəchi nə Dəl Urdən nda, ləhə dzər kubu dəgal nə More, a tə hə'i njir Kan'ana inda na ngya ku Araba nda dzər Gilgal. 31 Janə kaɗə hya dləgəlbiya Dəl Urdən ka hya gwa dləutsə hə'i nda Hyel Tlakən hi kwa nə hi. Ma hya gwa dləutsə ga vaviya mbwar ngya ti, 32 hya gəla, hya ɓəlatə tsaubar i'i ana gadlagadla i'i nda ya kwa nə hi ənya na.