Mbwar Həsəli Zhang
12
1 Ja inə gadlagadla ana tsaubar inda hya kwa ɓəlatə mənakə tə hə'i nda Tlakəu, Hyel nə kə'i jival kəhi tə nə hi. Hya ɓəlatə matə a wur ɗa ana pi hi. 2 Hya huhuɓənda dəhə mbwa inda jul nji ingə kwa həsəli nə katə kənda i'i ti, inda kyatə mə inda dzəgam dzəgaməu, inda tə dəgəl i'i, ana inda tə kiɗa wu wawa'a. 3 Hya huhuɓənda dzəgana katə kənda i'i, hya pəpətlənda hangu hatəmachi kənda i'i, hya dlanda udzəm Ashera kənda i'i ba'a nginda katə kənda i'i ku hu'u, hya tsətsaunda katə fiɗəfiɗə kənda ba'a zhazhinda tləmər katə kənda i'i pa'apa'a.4 Ngwa hya da həsəli nə Hyel Tlakən hi tang wi nda ndo həsəli nə katə kənda i'i wa. 5 Kəl ja, hya gwa'arə mbwa nda Hyel Tlakən hi kwa tabiya hi ku pama dəhə nyavi kəhi, mbwar həsəli nə nyi, tangnda hyo shili həsəli nə nyi, 6 a tangnda ngə hyo shili na sər hatəmachi i'i nə nginda, sər hatəmachi i'i, zhang ku kumə nə dəhə sənda hyo uya, ga'a pampaməu, ga'a sə inda hya hətə salkur i'i ana ga'a nda ɗufwa hya hətə i'i, ana ga'a yar tangəmar tla kəhi i'i ana nə kua, ka kətəng kəhi i'i. 7 A hinda, hyo səm nahi kə'i njir ki kəhi mar Hyel Tlakən hi, hyo mər hirgyaɗi na dəhə sənda Hyel Tlakən hi tə nə hi na papa'akur nyi.
8 Ngwa hya da mər wi nə mən kwa mər tangnə ənya nə wa, wi nə kala ndə kwa mər sənda tə shili ku kəra cha nə wa, 9 aka a na hya taa həya mbwar ɓəlsar ana sərfa'aki nda Hyel Tlakən hi kwa nə hi wa. 10 Kəl ja, ma hya dləgəlbiya Dəl Urdən ga gwa vaviya mbwar ngya tə hə'i nda Hyel Tlakən hi kwa nə hi aka sərfa'aki kəhi, ya ngə cha nə hi ɓəlsar tsa dəhə njir dawa kəhi nda dzən hi, hyo uya ngya mənakəu. 11 Kəl ba hya yi na dəhə sə inda ya nar hi nə Tlakəu, sər hatəmachi i'i nə nginda, sər hatəmachi i'i, zhang ku kumə nə dəhə sənda hyo uya i'i, ga'a pampaməu, ga'a nə sə inda hya hətə salkur i'i ana ga'a nda ɗufwa hya hətə i'i, ana ga'a yar tangəmar tla kəhi i'i ana nə ku ka kətəng kəhi i'i, ya tə mbwa nda Hyel Tlakən hi tə tabiya ka mbwar həsəli ka kərnyi. 12 A hinda ngə hyo yi mər hirgyaɗi a mar Hyel Tlakən hi, nahi, nguli shili kəhi, ku'imahi'i kəhi, mavi'i kəhi shili ka mahi'i, nyandəla Levi inda ku mələm kəhi i'i, hya ɗənghatə njir Ləvi nda na ngya ku pama hi, inda pa'a na mətla hə'i kərnənda ndara sərfa'aki. 13 Hya gəla, a da kala mbwa nda kəra hyo i hyo hatəmachi nə nginda tə wa. 14 Hya hatəmachi kəl tə mbwa nda Tlakə tə tabiya ku huɗa nyavi kəhi, tangnda ngə hyo mər kala sə nda ya tsau hi bar ni.
15 Dəhə ka ənga, hyo nau tlakəri wulya təkəra sərshishi kəhi ku mələm kəhi i'i, hya ɗə kum wi nda hyo i, mada wi ka jigəl ndara kanyaɗəu, dəhə sə inda Tlakə tə nəhi təwa papa'akur nyi. Mada ndə nda chinda dza cha, ndara ndə nda pa'a chinda dza cha, kwa nau ɗəa. 16 Kəl ja, ngwa hya da səm mashi pa'a wa, hya pənda hu'i wi ɓiti. 17 Ngwa hya da səm sə inən ku mələm inda hyo ngya kwa wa, zhang ku kumə nə uhi, ɓitir anap ana mal, ndara yar tangərmar tla, kua ana kətəng, ndara kala ga'a nda hya hətə salkur təkəri, ndara ga'a nda ɗufwa hya həti, ndara kala ga'a pampaməu. 18 Atəvira ənga, hya yi səm tə mbwa nda Hyel Tlakən hi tə tabiya, nahi kə'i nguli kəhi shili ka mahi'i, ana mavi'i kəhi shili ka mahi'i ana nyandəla Levi inda ku mələm kəhi i'i. Hya mər hirgyaɗi mar Hyel Tlakən hi təkəra dəhə sənda hyo məra. 19 Hya gəla, ngwa hya da far na nyandəla Levi ku dəhə sənda hyo mər tə hə'i kəhi wa.
20 Sakanda Hyel Tlakən hi tə tsakətə dlaɓəkura hə'i kəhi wi nda cha mərtə hi alkawal, ya ngə hyo chimə kum hyo na, <<Zhindar kwa tə ɗa,>> kəl ba'a hya ɗə kum wi ənda hyo i. 21 Macha mbwa nda Hyel Tlakən hi tə tabiya ka həsəli nə nyi naɗə gagaɗa tsa hi, hyo nau tlakəri wulya təkəra sərshishi kəhi wi ka tla, kua ndara kətəng nda Tlakə tə nə hi, ba'a hya səm ku mələm kəhi i'i wi nda kəra hi kwa i, wi nda ya tsau hi bar. 22 Hya səma wi nda hyo ɗə jigəl ndara kanyadəu, mada ndə nda chinda dza cha ndara ndə nda pa'a chinda dza cha, kwa nau ɗəa. 23 Kəl ja, ngwa hya səm mashi wa, aka mashi nacha ngə pi, ya ngwa hya ɗənya pi ana kum kya'a wa. 24 Ngwa hya səm mashi pa'a wa, hya pənda hu'i wi ɓiti. 25 Ngwa hya da səm mashi wa, ga hya uya ngya mənakə nahi ka ngulisha'a kəhi inda kwa shili hin hi, aka ga hya nau mərtə sənda mənakə tə lya Tlakəu.
26 Hya fa'atə ga'a kəhi nda karti ana ga'a ind hya hətə salkur təkəri yatə mbwa nda Tlakə kwa tabiya. 27 Hya shili na kum ana mashi nə sərhatəmachi nginda tə dzəgana Hyel Tlakən hi. Hya pənda mashi sərhatəmachi nginda kəhi dzər dzəgana Hyel Tlakən hi, kəl ja, hyo nau ɗə kumkum nyi. 28 Hya gəla, kəl hya ɓəlatə dəhə tsaubar inə ya kwa nə hi ina, ga hya uya ngya mənakəu, nahi ka nguli kəhi nda kwa shili hin hi, aka ga hya nau mərtə sənda mənakə mar Hyel Tlakən hi.
29 Hyel Tlakən hi kwa kuɗənda jul nji ingə hyo gwa gədləbiya inga. Kəl ja, ma hya gədləbiya nda, ga vaviya mbwar ngya tə hə'i kənda, 30 ahir a kuɗənda nda tə nji, hya gəla tsa nja da səya hi na ləbam təwa gwa'a hya katə kənda i'i, ngwa hya na, <<A man jul nji inə kwa həsəli nə katə kənda i'i, ga ea nəu hya nda?>> 31 Ngwa hya həsəli nə Hyel Tlakən hi təwa nəkəndawa laku wa, aka ma ndo həsəli nə katə kənda i'i, ndo mər dəhə sərhəɗə inda pa'a Tlakə kwa i. Ndo nginda ma'a nguli shili ka ku'i kənda i'i ku hu'u aka sərhatəmachi nə katə kənda i'i.
32 Əja ya, hya ɓəlatə dəhə sə inda ya tsau hi bar ni, ngwa həya wa, ya ngwa hya tsakəkəri wa.