Təɗəhimi Təkəra Həsəli nə Katəu
13
1 Ma a ɗa vanya ndər mətakər ndara ndə nda kwa ngabiya hya shiuni tə shili ku pama hi, ga par hi səshinshin ndara sərmuniya, 2 ya ma səshinshin ndara sərmuniya nda cha ɓwanya təkər nda tə ɗa, ngə cha na, <<A mən nəu alenya hyel i'i, məna hətə nda səli.>> Aka a na hya taa zəndə sə təkəra nda gwadagə wa. 3 Ngwa hya səhimi da chulkə ngəna ɓwanya mətakər ndara ndə nda shiuni nda wa. Aka Hyel Tlakən hi ngə kwa dzə hi, ga cha la'a ndara kwa nyida nyi hi na dəhə ɗufwa hi ana dəhə pya hi. 4 Kəl Hyel Tlakən hi tanyi hyo nəuwa, ya nacha tanyi hyo ngatə ləvər nyi. Hya ɓəlatə gadlagadla nyi ana hya nəu nya cha, hya həsəli nə nyi ana hya gəzəya nyi ɓaɓaləu. 5 Chulkə ngawa ndər mətakər ndara ndər shiuni, nja tsəya nyi, aka mafakə ngə cho bəzə nga, nə tləmwali nə Hyel Tlakən hi nga, Tlakə nda fa'abiya hi zəbiya vu Masar ga pəliya hi tsa mavakur. Cho gwa'a cha shanda hi tsa nəu sə inda Hyel Tlakən hi tə tsau hi bar hya nəu nga. Tuku hya zhazhibiya ɗimikur ku huɗa hi.6 Macha zamə ngha, ndara zər ngha, ndara kwa ngha, ndara mala nghə nda ko nyida, ndara bazhi katə ngha, kwa shakər nə nghə tə ɗəwa bəra, <<Mən təra ki həsəli nə alənya hyel i'i,>> hyel inda naka ndara jival kəhi da zəndə wa, 7 hyel nji inda dzən hi, mada ləhəu ndara naɗəu, 8 ngwa hya dləukə nyi ndara hya səhimi da cha wa. Ngwa hya ngatə təhuɗə nyi wa. Ngwa hya mbu kənyi gwa ndara hya ɗəwanda nyi wa. 9 Tuku hya tsəya nyi. Nakə ngə ndə ndo ghəya tsa nyi, ahir nga alənya nji kwa pəkə nyi tuwa. 10 Hya vəvakənda nyi na hangu, aka cha gwa'a shanda hi tsa Hyel Tlakən hi nda fa'abiya hi zəbiya vu Masar, Tlakə nda dləuya hi tsa mavakur. 11 Təwa ənga, dəhə njir Isra'ila kwa ngati, ya ləvər kwa səya nda, ya ndə da ku pama hi kwa tsakətə mər chul ngəna sə ɗimi wa.
12 Ma hyo ngya ku mələm ingə Hyel Tlakən hi kwa nə hi nga, hyo nau ngatə 13 ənda alenya nji kəla sakəda ku pama hi, kwa shakər nə njir mələm kənda ndo na, <<Mən təra ki həsəli nə alənya hyel i'i,>> hyel inda a da hyo zəndə wa. 14 Hya gwa'abiya hya cha, hya ɗəmbiya ngwahya'a kwa, hya zəndəbiya təkəɗəkura cha. Macha vəlvələu, ya a uya tə hi təkəɗəkura sənda tə chari, ənda a mər tə nji chul sə ɗimi wi ngə ku pama hi, 15 ba'a hya ki kuɗənda dəhə njir mələm inda na katsakər. Hya kuɗənda dəhə nji ka sərshishi. 16 Hya tsəmiya dəhə kar njir mələm nda, hya ɓutə tə ghadar babal nə ta mələm nda, ba'a hya nginda kəɗətsəu, ga cha ɗa ka sərhatəmachi nə nginda nə Hyel Tlakən hi. Mələm nda kwa ngya jwajwa'a ba'anawa, ngwa nja tsakətə hər nyi wa. 17 Ngwa hya gəzə madami ku sə inda nja na nja nginda nda nə kərnəhi wa, məlna huɗatla Tlakə do sha ya kəra hi wa, cho char hi təhuɗəu, cho ngatə təhuɗə kəhi, cho gwa'atə hyo yatəkər, wi nda cha mərtə nyi alkawal nə kə'i jival kəhi, 18 ma hya nəu nya Hyel Tlakən hi, ngə hya ɓəlatə dəhə gadlagadla nyi nda ya nə hi ənya, ga mər sə inda tsa'atsa'a.