Chulkə Sə'ingu nda nja Kati
14
1 Nguli Hyel Tlakən hi hi, aka ənga, ngwa hya tla dza kərnəhi ndara hya sənda shishir pambaɗa ndə tətə kəhi wa. 2 Aka nji karti nə Hyel Tlakən hi hi, Aku huɗa njir dunəya dəhəu, Tlakə tabiya hi tə aka nənyawa nji, nji inda wi məɗəwa nyi.Sərshishi nda njo Kina Ɗəa ana inda Pa'a njo Kina Ɗəa
3 Ngwa hya səm kala sə inda Tlakə tə katə wa. 4 Ja'inə sərshishi inda hyo kina ɗəa, tla, kətəng, kua, 5 jigəl, kanyaɗəu, mabyang, ku takəu, mwa'i, dəhə jul kanyaɗəu ana kətəng məa. 6 Hyo nau ɗə kala sərshishi nda na pəlkwapəlkwa cha təkətəkə nyi mətləu, ya kwa kwaɗə sərsuma. 7 Kəl ja, ngwa hya ɗə dəhə sərshishi nda pa'a na pəlkwapəlkwa cha təkətəkə nyi mətləu, ya a da cho kwaɗə sərsum wa. Ngwa hya da ɗə dləgwam, ndara pita, ndara səɓa wa, madangə kwa kwaɗə nda sərsuma, kəl ja, pəlkwapəlkwa nda da təkətəkə nyi wa, sər həɗə ingə nə hi. 8 Ngwa hya da ɗə dagəla wa, madangə pəlkwapəlkwa cha təkətəkə nyi, kəl ja, a da cho kwaɗə sərsum wa, sər həɗə ngə nə hi. Ngwa hya ɗə kum kənda ndara hya tsəkar tətəkura nda wa.
9 Ku kala sə inda kwa ngya ku ɓiti tsəu, hyo nau ɗə dəhə sə inda na vyang ana lilibi dzəri. 10 Kəl ja, dəhə sə inda pa'a na vyang ana lilibi dzəri, ngwa hya ɗə wa, aka sər həɗə cha nə hi.
11 Hyo nau ɗə kala eakə inda njo kina ɗəa. 12 Ngwa hya ɗə eakə inən wa, kwadəga, dukəu ana kwadəga kyakyarəu, 13 tongali dəzəu, tongali kyakyar ana kala jul tongali, 14 ana kala jul salakəu, 15 shatili pələkə himi, shatili nduɓə himi, ghaada ana kala jul tongali, 16 ngulinguli shatili, wawa'ar shatili, ana shatili pərtəu, 17 shatili takəu, shatili Masar ana ngalalakəu, 18 chari, ana kala jul ngalalakəu, zhumbul ana favakəu.
19 Dəhə sə chahachaha nda na baɓəkəu ya kwa ma'i hu'i, sər həɗə cha nə hi, ngwa hya ɗə nda wa. 20 Hyo nau ɗə kala sə chahachaha inda kwa fəl na baɓəkəu. 21 Ngwa hya da ɗə sənda hya kutlatə tətə nyi wa. Hyo nau nə nyi nə ndə shilishili nda na ngya ku pama hi cha ɗəa, hyo nau ɗəlnda nyi nə ndə shilishili. Kəl ja, ngwa hya da ɗə nəkəhi wa, aka nahi nji karti nə Hyel Tlakə hi.
Ngwa hya da səl zər kua ku 'ua ama nyi wa.
Zhang ku Kuma
22 Hya həbiya zhang ku kumə nə kala sə inda hya məriya ku fa kəhi kala fa. 23 Hya səm zhang ku kumə nə uhi, taɗər ɓitir anap, mal zaitun, ana yar tangərmar sərshishi nə tla kə'i kətəng ana ku kəhi i'i a mar Hyel Tlakən hi tə mbwa nda cha tabiya ka njo həsəli nə nyi ti, ga hya dlədləɓtə ənda hyo nə nyi səli nə Hyel Tlakən hi wa'atanyi. 24 Kəl ja, macha mbwambwa nyi tə ɗa naɗə gagaɗə tsa hi, nda a da hyo nau hətə zhang ku kumə sənda Hyel Tlakən hi tə səkə hi papa'akur nə wa, 25 ba'a hya ɗəlnda zhang ku kumə nda, ba'a hya shili na kwabakwaba nyi tə mbwa nda Hyel Tlakən hi tə tabiya. 26 Hya shili ɗəlbiya kala sənda hyo i, wi ka tla, ndara kətəng, bitir anap, ndara alenya səsasa. Tangnda hyo səm na hirgyaɗi mar Hyel Tlakən hi, nahi kə'i njir ki kəhi. 27 Kəl ja, ngwa hya far na nyandəla Levi nda na ngya ku mələm kəhi i'i wa, aka a hə'i kərnənda da wa, ya a sərfa'aki da tsa nda wa.
28 A tə batəbatər makərkunya fa, hya shili na zhang ku kumə nə dəhə sə kəhi ku vi məɗəwa nə mələm kəhi i'i, 29 ga nyandəla Levi, nji inda hə'i kərnənda da wa, ya a sərfa'aki da tsa nda wa, ana nji shilishili, ana nguli maha, ana mahi'ifi nda na ngya ku mələm kəhi i'i nda shili səm nda nyi, təwa ənga, Hyel Tlakən hi kwa səkə hi papa'akur təkəra dəhə tlər nda hyo məra.