Sərshishi nda njo Ɗəa ana inda Pa'a njo Ɗəa
11
1 Tlakǝ tǝ ɓwanya na Musa ba a Haruna bǝra nda dǝkari nyi nǝ 2 njir Israila nǝna tsaubar i. "Janǝ chuli ngǝna sǝr shishi nda hyo ɗǝa, aku dǝhǝkura sǝr nda kwa tǝkǝra hǝ'i. 3 Dǝhǝ sǝr shishi nda pǝlkwapǝlkw cha tǝkǝtǝkǝ nyi mǝtlǝu, ya cho kwaɗa, hyo ɗǝa. 4 Aku huɗa indo kwaɗa, ndara inda pǝlkwapǝlkwa nda tǝkǝtǝkǝ nyi mǝtlǝu, janǝ chul inda kǝra hyo ɗǝa. Dlǝgwam, mada ngǝ cho kwaɗa, kǝl ja, na cha a da pǝlkwapǝlkwa cha da tǝkǝtǝkǝnyi mǝtlǝ wa, aɗati cha ka sǝr hǝɗǝ a nǝ hi. 5 Sǝɓǝu, mada ngǝ cho kwaɗa, kǝl nda a da cha na pǝlkwapǝlkwa tǝkǝtǝkǝnyi mǝtlǝ wa, aɗati cha ka sǝr hǝɗǝ a nǝ hi. 6 Pita, mada ngǝ cho kwaɗa, kǝl ja, a da cha na pǝlkwpǝlkwa tǝkǝtǝkǝ nyi mǝtlǝ wa, aɗatǝ cha aka sǝr hǝɗǝ nǝ hi. 7 Dagǝla, mada ngǝ pǝlkwapǝlkwa cha tǝkǝtǝkǝnyi mǝtlǝu, kǝl nda a da cho kwaɗǝ sǝrsum wa, a ngyatǝ cha aka sǝr hǝɗǝ nǝhi. 8 A da hyo ɗǝ kum kǝnda wa. Manda tǝ (Chaɗǝgu) ǝngǝ tanyi, ngwa hya da tsǝkari wa, aka aɗatǝ nda aka sǝr hǝɗǝ i anǝ hi. 9 "Janǝ chul sǝ pipi inda hyo ɗǝa, aku dǝhǝkura sǝ pipi inda ku ɓiti. Dǝhǝkura sǝnda na lǝbǝtǝu himi, ba a liliɓi, mada ku dǝl cha ndara dlǝlǝm, hyo ɗǝa. 10 Kǝl ja, kala sǝ pipi nda ku dǝl dǝgal, ana dlǝlǝm i, nda kǝla lǝbǝtǝ himi ana liliɓi, aɗatǝ nda aka sǝr hǝɗǝ nǝhi. 11 Chul ngǝna sǝ'i kwa ɗa ka sǝr hǝɗǝ a nǝhi, a da hyo ɗǝ kum kǝnda wa. Chaɗǝngo kǝnda tsǝu kwa ɗa sǝr hǝɗǝ nǝhi. 12 Dǝhǝ sǝ inda ku dǝlǝu, ya a da nda na lǝbǝtǝ himi ndara liliɓi wa, kwa ɗa ka sǝr hǝɗǝ nǝhi. 13 "Janǝ eakǝ inda tǝ ɗa ka sǝr hǝɗǝa, a da hyo ɗǝ wa, aɗatǝ nda aka sǝr hǝɗǝ anǝ hi. Nanda ingǝ, abǝlǝm, ana kwadǝga, dadapǝu, 14 ana wadapel, ana tongali, ana cuhul kwadǝga i, 15 ana salakǝu ana chul kǝnda, 16 ana zhǝnakǝu, ana shatili, ana kwakingal, ana dukǝu na chul nyi, 17 ana zǝrzǝr shatili, ana ngalalakǝu, dǝngalnya shatili, 18 ana shatili pǝrtǝu, ana ghada ɓiti, ana abula, 19 ana chari, ana wakǝlekǝle na chul nyi, ana ndzǝkwakwa, ana favakǝu. 20 Dǝhǝkura chul favǝ inda na babǝkǝu, inda kwa ma'i na hi fwaɗǝu, ndo ɗa ka sǝr hǝɗǝ nǝhi. 21 Kǝl ja, aku huɗa favǝ inda na babǝkǝu, inda kwa nau ma'i na hi fwaɗǝu, hyo nau ɗǝ inda na eah, nda kwa nau mǝrtǝ ndo fǝlla. 22 Aku hǝɗa inga, hyo nau ɗǝ ndzǝkwa ka chul kǝnda, yir ana jang (jom), ana ha'i. 23 Kǝl ja, dǝhǝ hǝyadzǝr favǝ inda na babǝkǝu, nda kwa ma'i na hi fwaɗǝu, aɗatǝ i ka sǝr hǝɗǝ nǝhi. Tsǝka sǝr shishi nda hiɗahiɗa. 24 "Atǝwa chul inǝna sǝr shishi, ndǝ kwa ɗa hiɗahiɗa. Ndǝ kwa ɗa sǝr hǝɗǝ ba a nǝ akǝu ma cha tsǝkǝr chiɗǝgu kǝnda. 25 Əngǝ ma ndǝ nda tǝ hǝtǝ chaɗǝgu kǝnda, kǝl cha chinda lukutu nyi, kǝl ja, dǝhǝ ka ǝnga cho ɗa sǝr hǝɗǝa, ba a nǝ akǝu. 26 Dǝhǝ sǝr shishi nda pǝlkwapǝlkwa cha tǝkǝtǝkǝnyi, ya a da cho kwaɗǝ sǝrsum wa, cho ɗa ka sǝr hǝɗǝ nǝhi. Ndǝ ma tǝ tsǝkari, cho ɗa hiɗahiɗa. 27 Aku sǝr shishi nda kwa ma'i na hi fwaɗǝu, inda na hya nda wi ufwa tǝga (patǝrǝu), ndo ɗa ka sǝr hǝɗǝ nǝhi. Dǝhǝ nda tǝ tsǝkar chaɗǝgu kǝnda kwa ɗa hiɗahiɗa ba a nǝ akǝu. 28 Dǝhǝ nda tǝ hǝtǝ chɗǝngu chul ingǝ na sǝu, kǝl chinda lukutu nyi, kǝl ja, dǝhǝ ka ǝnga, cho ɗa hiɗahiɗa nyi ba akǝu, aka sǝ inga, sǝ hiɗahiɗa ingǝ nǝhi. 29 Aku huɗa sǝ inda kwa tǝɗǝ na ta hu'i, janǝ sǝ inda kwa hiɗahiɗa nǝ hi, Nachangǝ anjir, ana ungi, ana mandhwal na chulkǝnda, 30 (zǝr ngwalaha,) ana karam (hǝm), malatangau, ana litsa, ana ngwalaha. 31 Dǝhǝ nda sǝr hǝɗǝ inga a nǝhi. Dǝhǝ ndǝ tǝ tsǝkar chaɗǝngu kǝnda, cho ɗa sǝr hǝɗǝa ba akǝu. 32 Dǝhǝ sǝnda chaɗǝngu kǝnda tǝ tǝɗa sǝya tǝkǝri, sǝ sǝnyi kwa ɗa hiɗahiɗa nyi, mada ndara sǝnda nja mǝr na wu cha, ndara lukutu, ndara chi, ndara mbǝl, ana kala sǝnda njo mǝr sakinda ni ka tlǝra, cho ɗa sǝr hǝɗǝa ba nǝ akǝu, mada ngǝ njo fǝu sǝ sǝnyi ku ɓiti. A ba akǝu cho ɓǝla ɗa ka sǝr hǝɗǝa. 33. Ma vanyi ku pama nda tǝ tǝɗǝ go tǝm yingha, sǝ nda kwa dǝhǝ kwa sǝr ka hǝɗǝa. Kǝl hya pǝtlǝ nda tǝm nda. 34 Dǝhǝ sǝnda nja kwa nau sǝma, ya kǝl ngǝ ɓiti nda ku tǝm nda tǝ tsǝkar chul ngǝna sǝu, cho ɗa sǝr hǝɗǝa. Kala sǝnda njo nau sa, ma cha ku chul ngǝna tǝm cha, kwa ɗa hiɗahiɗa nyi. 35 Dǝhǝ vanya sǝnda mar chaɗǝngu tǝ tǝɗǝ tǝkǝri, cho ɗa hiɗahiɗa, mada gaba cha, mada vǝr tsa gwazhilakǝ cha, njo huhuɓǝnda aka aɗatǝ nda hiɗahiɗa nyi.Əngǝ ndo ngya nǝ hi. 36 Kǝl ja, ma chaɗǝngu ngǝ tǝ tǝɗǝ go mǝghǝ ɓiti, (tsǝtsǝɗǝu), ndara go bam nǝ ɓiti, ɓiti nda do ɗa hiɗahiɗa wa, kǝl nda ndǝ nda hǝbiya chaɗǝngu nda, kwa hiɗahiɗa. 37 Ma chaɗǝngu nda tǝ tǝɗǝ sǝya tǝkǝra chuli nda njo ki tlǝka, chuli nda do ɗa hiɗahiɗa wa. 38 Kǝl ja, ma cha nja lǝɓǝti chuli nda ɓiti, ya ngǝ chaɗǝngu nda tǝ tǝɗǝ sǝya tǝ kǝri, chuli nda ɗatǝ hiɗahiɗa. 39 "Ma sǝr shishi nda nja nar hi hya ɗǝa, tǝ tah, dǝhǝ ndǝ nda tsǝkari chaɗǝngu nyi, cho ɗa sǝr hǝɗǝa, ba akǝu. 40 Dǝhǝ nji inda tǝ ɗǝ chanɗǝngu nga, ndo hiɗahiɗa ba a nǝ akǝu, mada ngǝ chinda tǝ nda lukutu kǝnda. Nji inda tǝ hǝtǝ chanɗǝngu nda, ndo ɗa hiɗahiɗa nyi ba akǝu, mada ngǝ chinda tǝ nda lukutu kǝnda. 41 "Dǝhǝkura sǝr shishi inda shiɗǝɗǝu kwa ma'i hu'i, ndo ɗa ka sǝr hǝɗǝ nǝ hi. A da hyo ɗǝ wa. 42 A ku huɗa inga, a da hyo ɗǝ kala sǝnda kwa tǝɗǝ na ta wa, ndara sǝnd kwa ma'i na hi fwaɗǝu, nadara sǝnda na hi ɗanghǝu, ndara dǝhǝkura sǝnda kwa tǝɗǝ na ta hu'i, aka aɗatǝ nda ka sǝr hǝɗǝa nǝ hi ndani. 43 A da hyo shandǝ kǝrnǝ hi ka sǝr hǝɗǝa a tǝwa ɗǝ sǝ ingǝ wa, Ətsǝu ngwa hya da sǝwandǝ kǝrnǝ hi sǝ hiɗahiɗa ka nda wa. 44 Aka naya ngǝ Hyel Tlakǝn nǝ hi. Hya ɓǝlatǝ kǝr nǝ hi na karti, hya ɗa ka nji karti, aka naya ndǝ karti ya. Ngwa hyo da sǝwandǝ kǝr nǝ hi na vany sǝ nda kwa tǝɗǝ na ta hu'i wa. 45 Aka naya ngǝ Tlakǝn hi nda hǝbiya hi vu Masar aka ya ɗa ka Hyel kǝ hi. Kǝl hya ɗa ka nji karti, aka naya ndǝ karti ya. 46 "Nacha ngǝ tsaubar nga aaaatǝ kǝra sǝr shishi inda kwa ma'i hu'i, ana eakǝu, ana dǝhǝkura sǝ pipi inda ku ɓiti, ana kala sǝ pipi nda kwa tǝɗǝ na ta hu'i, 47 aka nja nau tǝkǝbiya pampamkur ndo pama sǝr hǝɗǝa ana sǝ nda kǝla sǝr hǝɗǝa, ana ku pama sǝ pipi nda njo nau ɗǝa, ana sǝ pipi da kǝla njo nau ɗǝa."