Tər kə'i Nadab ana Abihu
10
1 Ngulisha'a Haruna, ka Nadab ana Abihu tǝ hǝtǝ hahil hu'u ga pǝu ku kǝtas nǝ ngi murdi kǝnda, ga uchitǝ murdi tǝkǝri. A tǝwa ǝnga nda mǝr sǝkǝla ɗa anǝ Tlakǝu, aka nda shili hu'u nda a da cha na nda mǝr ǝnda wa. 2 Gǝɗǝ tanyi kǝl janǝ hu'u tǝ sǝya hya'atǝ kida Tlakǝu ga nginda nda, ngǝ nda kuɗǝ tang nda amar Tlakǝu. 3 Ngǝ Musa tǝ nar nyi nǝ Haruna, "A la'atǝ hi ma wa? Nachangǝ ngǝ sǝnda Tlakǝu kwa hari, ma cha na bǝra, ' jane nji inda lǝhǝ dzǝɗa yo chari ǝnda naya ndǝ Karti ya. Atǝ lya dǝhǝ nji, ya njo hǝtǝ ɗa sǝli. " Ngǝ Haruna tǝ bǝgǝu ɗiyu. 4 Kǝl ngǝ Musa tǝ nga Mishayal ana Elzafan, ngulisha'a shili nǝ Uzziyel zamǝnya adanya Haruna. Ngǝ cha nar nda, "Shili ma hya fa'atǝ guduɓǝr dza zamǝn hi i aku Madlǝɓa hya tǝra biya hir ngakǝu. 5 Kǝl ngǝ shili ngǝ ǝzardza shili lǝhǝu ga gǝzǝya guduɓǝr dza nji nda atǝ lukutu, ngǝ nda hǝtǝ nda ga tǝra nda biya hir ngakǝu. 6 Ngǝ Musa tǝ nar nyi nǝ Haruna ana ngulisha'a nyi, ka Eleyazar da Itamar, ''Ngwa hya da ngyar shishir kǝra hi wazaɓarai bǝra hyo sǝ'ingǝ wa, ndara hya tǝtau lukutu kǝhi nǝ fǝrist wa. Ma hya mǝr ǝnga hyo kuɗa, ya hyo tǝɗǝkǝnyi huɗǝtla Hyel atǝ kǝra nji. Kǝl nda hya ngyar zǝmǝn hi, dǝhǝkura njir Israila, nda tiwi tǝ ngǝ hu'u Tlakǝu tǝ shili nahi nga. 7 A da hyo biya tǝ nya vi Mdlǝɓa tsǝmǝdza ngǝ wa, atsa hya da ba kuɗa, aka zǝndǝ tǝ hi ǝnda dzǝvǝya hi anǝ Tlakǝu." Ngǝ nda mǝrtǝ mǝlmǝl na sǝnda Musa ta nar nda . Tsaubar nǝ Tlǝr Fǝrist Ngǝ Tlakǝ tǝ ɓwanya na Haruna bǝra, 9 ''Nakǝ na ngulisha'a shili ngha, a da hyo sa ɓitir anab ndara vany sǝnda kwa gwa'atǝ ndǝ kwa wi, dǝhǝ sakanda hyo gwa ku Madlǝɓa Tsǝmǝdzǝ tǝ wa, atsa hya da kuɗa. Nacha ngǝ tsaubar nda ba'anawa ghǝya saka ba'a nǝ nya ndǝla hi. 10 Hyo tǝkǝbiya pampamkur nda ku pama sǝnda nja dzǝvǝya na karti ana sǝnda a da nja dzǝvǝya wa, ana tsǝu ku pama sǝnda hiɗa hiɗa ana sǝnda kǝla da na hiɗa. 11 Ətsǝu hyo dlǝdlǝɓǝ tǝ nyi nǝ njir Israila dǝhǝkura tsaubar nda Tlakǝ tǝ na atǝ Musa." 12 Musa tǝ ɓwanya na Haruna, ana hǝyadzǝr ngulisha'a shili nyi, Eleyazar ana Itamar, cha na, "Hǝtǝ ma hǝyadzǝr sǝr hatǝmachi nǝ sǝ zwazwa ngǝ nja hatǝmachi nǝ nginda anǝ Tlakǝ nga, nja ɓatlǝ nyi kǝla tlǝlam, hya kwasǝnya atǝ yimbila dzǝgana, aka ngǝ na sǝr hatǝmaci ana karti cha gagaɗa, nja mǝr nyi wi nda tsaubar ta chari. 13 Hyo sǝmnyi atǝ vanya mbwa nda karti aka mbaɗǝ nghǝ nga ana ngulisha'a shili ngha, aku sǝr hatǝmachi inda nja nginda na hu'u anǝ Tlakǝu. 14 Kǝl nda hatlǝu ana eah nda nja lǝnda aka sǝr hatǝmachi nǝ har shi huɗamǝllǝm hyo kwasa, naka ana ngulisha'a shili ngha, ana ku'i mahi atǝ mbwa nda kǝla hiɗa hiɗa. Aka a nǝhi tǝ nji, naka ana ngulisha'a shili ngha, nda ɗa ka mbaɗǝ kǝhi aku sǝr hatǝmachi nǝ ɓatlǝ ngya nǝ njir Israila. 15 Eah ana hatlǝ inda nja lǝnda aka sǝr hatǝmachi nǝ har shi huɗamǝllǝm anǝ Tlakǝu, tsa'a kǝi mal nǝ hatǝmachi nda nja nginda na hu'u nda, ndo ɗa ka mbaɗǝ kǝhi, ba'anawa, naka ana ngulisha'a ngha, wi sǝnda Tlakǝ tǝ na.'' 16 Kǝl ngǝ Musa tǝ yiwubiya nda aman nja mǝr na bura nǝ hatǝmachi ka chinda sǝpǝla'a nda, kǝl macha la'a a wurtǝ nja nginda papatǝu! kǝl cha mǝr huɗǝtla na Eleyazar ana Itama, ngulisha'a shili Haruna inda tǝ hǝyadza. Cha na, 17 "Mi gwa'atǝ a da hya ɗǝ kum nǝ hatǝmachi chinda sǝpǝla'a at mbwa nda na karti wa? Nǝna sǝr hatǝmachi ana karti cha gagaɗa, nja mǝr nyi wi nda tsaubar tǝ na. Hyel tǝ nǝnyi ngǝ na sǝu, aka nja hǝnda bikǝr nji ni, ǝtsǝu nja hǝnda bikǝr sǝpǝla'a kǝnda amar Tlakǝu. 18 Manda a nja gwa na mashi sǝr shishi nda aku Vi nda ndiya na Karti wa, a kiti hyo ɗǝ kum ngǝ tǝ mbwa karti winda ya natǝ hi nja mǝra." 19 Ngǝ Haruna tǝ wum nǝ Musa bǝra,"Janǝ ǝnya ngǝ ngulisha'a ɗa lǝnda hatǝmachi kǝnda nǝ chinda sǝpǝla'a, ana hatǝmachi kǝnda nginda anǝ Tlakǝu. Dǝhǝ ka ǝnga ngulisha'a ɗa mǝtlǝ tǝ kuɗa. Macha nda ya nda sǝm sǝr hatǝmachi nǝ chinda sǝpǝla'a ngǝ ya, kwa nda Tlakǝ dlǝtsǝ ya? 20 Manda Musa tǝ ngatǝ ǝnga, kǝl ngǝ cha dlǝkǝr na ngǝ na ɓwanya.