DƏLABIYA
Nja nənyi Ɓwaɓwatə nə njir Isra'ila
1
1 Inənnə ngə tləmər nguli shili nə Isra'ila nda ɗəu dzəva Masar nanda ka Yakubu, kala ndə na njir ki nyi. 2 Roben, Simion, Levi, Yahuda, 3 Ishaka, Zabuluna, Banyami, 4 Dan, Naftali, Gad ana Ashiru. 5 Nyandəla Yakubu Məɗəfəkumnyi nda dəhə dəhəu, Yusufu nənyi avu Masar cha ɗəɗəməu.6 Ngə Yusufu ana dəhə ka zamə nyi ana dəhə njir bəji nda tə kuɗa, 7 kəl ja, njir Isra'ila tə yatəkər ga tsaka ga ɗa ɗang gagaɗa, ana ənga, nda nyandə hə'i nda.
8 Ngə taɗər təl Masar nda pa'a kwa zəndə Yusufu, tə gwa ku dzəga təlkur. 9 Ngə cha narnyi nə nji kənda, <<La'a, njir Isra'ila ɗatə ɗang gagaɗə matsa mən. 10 Anda ma, tuku məno zəndə ənda məno ɗa na nda, tsa nda da biyama na yatəkər. Ma a da wa, ma pa tə ɗa, ndo daɓtə kər ka njir dawa kəmen, ndo panda mən ba ngyar hə'i na.>>
11 Aka ənga, njir Masar tə fəkənda nji nda kwa nənyi tler ɓwaɓwatəu ana tlər tuku nə njir Isra'ila, ngə nda hərtə mələm məɗəwa nə Fir'auna, nanda ngə Pitom ana Ramasis. 12 Kəl ja, ma njir Masar kwa tsakə nənyi ɓwaɓwatə nə njir Isra'ila, kəl tsakə njir Isra'ila kwa tsakə na ɗangkur ga wiɗətəkər. Aka ənga njir Masar tə ghəya ləvər tsa njir Isra'ila. 13 Njir Masar tə tsakətənyi ɓwaɓwatə gagaɗa nə Isra'ila a təhuɗə dawa. 14 Nda mərtə ngya kənda dza'u, təwa tlər ɓaɓalɓaɓal nə zuku nyingha ana hər tubali ana dəhə tler ɓwaɓwatə nda kwa takəu; ngya kənda tə ɗa ɗimiɗimi gagaɗa.
15 Kəl ngə təl Masar tə nar nyi nə ka Shifra ana puwa mahi'i dləu yah nə njir Ibrani, 16 <<Ma hyo vala mahi'i Ibrani ku bəji ndo yah hya ɓəla nda, macha zərsal nda yah, hya tsəya, kəl nda macha kwamalakə cha yah, hya ngyar na pi.>> 17 Kəl ja, manda mahi'i dləu yah inda njir ləvər Hyel nda, ngə a da nda mər sə nda təl Masar tə nar nda wa, nda ngyar ngulisha'a shili na pi. 18 Kəl ngə təl Masar tə nga mahi'i dləu yah inda ga jau nda, <<Mya gwa'atə hya mər sə na? Mya gwa'atə hya ngyar ngulisha'a shili na pya?>>
19 Mahi'i dləu yah inda wum nə Fir'auna ga na, <<Mahi'i Ibrani da wi mahi'i Masar wa, njir dunama nda, təvi mahi'i dləu yah yi, yah tə nda.>>
20 Aka ənga Hyel tə səkənyi papa'akur nə mahi'i dləu yah inda, ya ngə njir Isra'ila tə tskətə ɗa ɗang gagaɗa. 21 Aka mahi'i dləu yah inda tə ɗa njir ləvər Hyel tsəu, Hyel tə nə nda nyandəla nda nə kərnənda.
22 Ngə Fir'auna tə nənyi gadlagadla nə dəhə nənyi na nji, <<Dəhə zərsal nda njir Ibrani tə yiya, nja vakətə gwatə Dəl Nilu, kəl nda nja ngyar ku'i mahi'i na pi.>>