50
1 Kəl ngə Yusufu tə vakənda kərnyi səya təkəra ada nyi cha gaɓətə nyi cho tiwi. 2 Ngə Yusufu tə tsau nyi bar nə njir kuzəkə, nda tsəndzə nyi fəla nə ada nyi tsa cha da yiɗa, kəl ngə nda tsəndzə nyi. 3 Hanyi fwadəkumənyi ngə ndo mər ənga. Njir Masar tə sə'ingu nyi hanyi məɗəfəkumənyi.4 Manda hanyir sə'ingu nda tə tərabiya, ngə Yusufu tə ɓwanya na njir patla Fir'auna ga na, <<Macha uya tə ya kwambiyakur tə lya hi, ndər ma nə Fir'auna tə dəbar ɗa. Hya nar nyi, 5 <Ada ɗa tə gwa'atə ya səmfəla ga na, <<Kaɗə ya tah, haɗiya ɗa ku hu nda ya labiya na kərɗa vu Kan'ana.>> Aka ənga, cha ngya ɗa ya ki haɗiya ada ɗa, ga ya ɓəl shili.> >>
6 Ngə Fir'auna tə na, <<Ma'i ka ki haɗiya ada ngha, wi nda ka səmfəla nə nyi.>>
7 Aka ənga Yusufu tə təra ga ki haɗiya ada nyi. Dəhə mavi'i patla Fir'auna tə ma'i ka cha, njirawawa'a Fir'auna ana dəhə njirawawa'a nə hə'i Masar, 8 ana dəhə njir ki Yusufu ana kə'i zamə nyi, ana dəhə njir ki ada nyi. Kəl nda ngulisha'a, sərshishi ana njir ɓəla ngə nja ngyar vu Goshen. 9 Charkaina taku ana njir dlə taku tə ma'i kə'i cha. Dlama nji ɗang gagaɗə tə ləbiya nyi.
10 Manda nda ɗa ləhə dzər vanya lar tə vanya mbwa nda njo nga Atad, ləhə dzər Urdən, kəl ngə nda tiwi məsazau na kurakə dzəgamdzəgam na tuhuɗəu, tangnda Yusufu tə sə'ingu ada nyi nə hanyi məɗəfa. 11 Manda njir Kan'ana nda na ngya tangnda tə la'a sə'ingu tə lar Atad nda, ngə nda na, <<Mbwar sə'ingu ɗimiɗimi nə njir Masar na.>> Nacha gwa'atə nja fəndzə nyi tləm nə mbwa nda ləhə dzər Urdun nda Abel Mizraim.
12 Aka ənga nguli Jakop tə mər wi nda Jakop tə tsau nda bar. 13 Nda hətə nyi ya tə hə'i Kan'ana ga yi haɗiya nyi ku tləl nda tə babal Makapəla ləhə dza Mamre, nda Ibrahim tə ɗəlbiya tsa Efron ndər Hiti, ka mbwar haɗə nji. 14 Ahir cha haɗəya ada nyi, Yusufu na nda kə'i zamə nyi, dəhə kə'i nji inda tə lə nyi inda, tə ɓəl gwa Masar.
Yusufu tə Mərtə Alkawal nə ka Zamə nyi
15 Manda ka zamə nya Yusufu inda tə la'a adan nda tə ti, ngə nda na, <<Aman ma Yusufu tə gəziya sə inda məna mər tə nyi nya ta cha, ya ngə cha na cho kibiya sə nda məna mərtə nya?>> 16 Aka ənga, ngə nda sətə nyi mafakə nə Yusufu ga na, <<Ada nghə ngyar tə tsaubar təvi cha tah, 17 <Janə sənda hyo nar nyi nə Yusufu, Ya gədi ngha ka farbikər kə'i zamə ngha, ana sə ɗimi inda nda mərtə ngha.> Maki far bikər mavi'i Hyel nə ada ngha.>> Nda mafakə nda tə həya Yusufu, ngə cha tiwi.
18 Kəl ngə kə'i zamə nyi tə shili vakənda kərnənda biyama nyi ga na. <<Na ea mavi'i nghə ina.>> 19 Kəl ja, ngə Yusufu tə ɓəlakə nda, <<Ngwa hya da ləvər tsa ya wa. Naya ya, təvəra Hyel ya ya? 20 Hya mba ɗimikur ka ya, kəl ngə Hyel tə shandə ka mənakəkur. Cha na'a dəgalkur na ka ga ya mbəɗandə pya nji ɗanghəu. 21 Aka ənga, ngwa hya da ləvər wa. Yo nə hi dəhə sə nda hyo gwa'a nahi ka ngulisha'a kəhi.>> Cha fətə nda ɗufə təwa ɓwanya mənakəu. 22 Aka ənga Yusufu ka zamə nyi ana njir ki kənda tə ngya tangnda vu Masar. Fa Yusufu dəhəu, 110. 23 Cha la'a jimarngilang nə zər nyi Ifərem, ga la'a yar nguli aji nyi Makir, zər Manasseh, nda cha hətə ka zər kərnyi.
24 Yusufu tə nar nyi nə ka zamə nyi, <<Kaɗə ya tah, kəl ja, jiri Hyel kwa shili vala hi, cho fa'abiya hi ku hə'i Masar na. Cho ɓəl na hi ya tə hə'i nda cha mərtə nyi alkawal na səmfəla cho nə nyi nə Ibrahim, Ishaku ana Jakop.>> 25 Kəl ngə Yusufu tə gwa'atə njir Isra'ila tə səmfəla ga na, <<Vəlvəl Hyel kwa da shili dləuya hi, ya tuku hya fa'atə ɗəhi ɗa hya təra ni.>>
26 Fa Yusufu dəhə dəhə 110 cha tah. Ngə nda tsəndzə nyi fəla vu Masar.