Jakop tə Səkə nyi Papa'akur nə Nguli nyi
49
1 Ngə Jakop tə nga nguli shili nyi dəhə ga nar nda, <<Shili ma dzə ɗa ga ya nar hi sə inda kwa ɗa na hi biyama.2 Tsəmtə ma dzə hya səya hima hi, nguli shili Jakop,
səya ma himi da adan hi Isra'ila.
3 Roben, nakə ngə zə'ual ɗa,
dunama ɗa, tangərmar zərsalkur ɗa,
nakə nga ndiya na səli ana gyalkur.
4 Wi ngə tə ɓitir dəl səyasəya,
aka ənga a tsə'u ko ɗa na səli wa,
aka ka piya na mala ada ngha.
5 Simion ana Levi ndə na zamə nyi inga,
katsakər kənda ɗa tə ka sər tlə mwali.
6 A da yo go mbanya kənda wa,
ya a da yo daɓəkər kə'i nda wa,
aka nda kuɗənda nji ku hudətla kənda,
ya nda ɓəɓəlnda hya gyal tla i'i ga nda uya ka sər gyaɗi.
7 Yo shi'unda nda
aka huɗatla ɗimiɗimi kənda,
yo wiɗənda nyandəla nda
ku huɗa nyavi Isra'ila i'i.
8 Yahuda, ko uya fal tsa kə'i zamə ngha,
ndo uzhi huɗə ngha,
aka vəlvəl ko kura njir dawa ngha.
9 Yahuda, nakə zər ləvari ka,
ko biya ki səm ko ɓəl shili piya tang ngha,
vanya ndə da kwa har yatə kəra kə wa.
10 Ya a təlkur ndara tamba təlkur
da kwa biya ku nyavi Yahuda wa.
Ətsəu hə'i pampam kwa hə səli nə nyi.
11 Cho mbiya kwara nyi ku anap,
daljiɓa nyi tə mbwa mənakəu,
cho chinda ləkutə nyi ku ɓitir anap,
ana daura nyi ku ɓitir anap nda dəzə wi mashi.
12 Lya cha kwa ɗa ghalghal wi ɓitir anap,
hira cha kwa ɗa pərtə ndiya 'ua.
13 Zebulun cho ngya nya fa'a
cho ɗa ka mbwar ta'i girgi ɓiti,
mətla nyi kwa mbəɗə biya təwa Sidon.
14 Isaka nə nyi, kwara nda na dunama cha,
cha piya tanyi ku pama mbəl kwara.
15 Macha la'a mənakəkura mbwar ɓəlsar nyi ana məsdakəkur hə'i nyi, cho həya patləka cha ka hə kari, cha ɗa ka mava təwa mər tlər tuku.
16 Dan kwa səm təlkur təkəra nji nyi,
wi alenya nyavi njir Isra'ila.
17 Dan kwa ɗa wi pwabu nya laku,
tsapəu nda ku laku, nda kwa ngaliya mətətəka taku,
ga ndər dlə nyi təɗə təwa dagəryi.
18 Yawa Tlakəu, yo səkə dləuya ngha.
19 Gad nənyi njir fa'avi kwa dla'a nyi,
kəl ja, cho kura nda.
20 Sərsum Asha nə nyi kwa ɗa nyaɓəu,
cho nə nyi sərsum nda məsəɗakə nə nji təltəl.
21 Naftali nənyi kanyaɗə nda wung cha,
ndər yah ngulisha'a gumaguma.
22 Yusufu kwa ɗa wi anap nda nya dəl,
nda kwa yah 'ual'ualəu,
cha cha kwa hwi gi tə sə dzəgaməu.
23 Njir ha hafə kwa ləgu nyi a tuhuɗə dawa,
nda gədlə nyi di'ir gwaja.
24 Kəl ja, laga nyi da kwa səya hu'i wa,
ya cha cha do dzədzə wa,
təwa gyalkur Hyel Ndər Gyalkur nə Jakop,
ndər bəla, fafa nə Isra'ila.
25 Təwa Hyel nə ada ngha, nda kwa vala ngha,
təwa Hyel Ndər Gyalkur Dəhə nda kwa səkə nghə papa'akur,
ana papa'akur nda kwa səya kya huɗamələm,
ana nda kyo ndəla hə'i,
ana papa'akur nə ngulisha'a ana nə sərshishi.
26 Papa'akur səuhiuhi ana mambəl wua,
papa'akur mə inda ba'anawa,
ana sə məsaɗakə hya'atə kya tə dəgəl nda ba'anawa.
Ga Hyella mərtə papa'akur ina ngya təkəra Yusufu,
nda nja dzəviya ku pama ka zamə nyi.
27 Banyami nənyi ularvwa pəla'a nga,
tsəɗakə mbudla cho ɗənya sə nda cha tsəya, aba'akəu,
cho təkəya sənda cha səya.>>
28 Inənnə nanda ingə nyavi kwabəmətlə nə Isra'ila, ya nacha ingə sə inda adan nda tə na nə nda ku bəji nda cho səkə nda papa'akur nda, cha nə nyi papa'akur nə kala ndə wi sənda cha ki ni.
Tər Jakop
29 Jakop tə tsau nyi bar nə nguli nyi, <<Bəji kaɗə ɗa nda yo ɓəl kya da ka jival ɗa. Hya haɗiya ɗa kə'i jival ɗa ku tləl nda ku fa Efron ndər Hiti nda, 30 tləl nda tə babal Makafela, ləhə dzər Mamre a vu Kan'ana, nda Ibrahim tə ɗəlbiya ka babal haɗə nji, tsa Efron ndər Hiti nda. 31 Tangnda nja haɗəya Ibrahim ana mala nyi Saratu, Ishaku ana mala nyi Robeka, hinda tsə'u nja haɗəya Liya. 32 Babal nda ana tləl nda a tsa njir Hiti nja ɗəlbiya.>> 33 Nda Jakop tə wur na tsau bar nə ngulisha'a nyi, ngə cha fa'atə hya cha gi tə gangər, ngə cha biya pi, ngə nja ki haɗiya nyi ka nji kənda inda tə ghəya kuɗa.