Jakop tə Səkə nyi Papa'akur nə Manasa ana Ifərem
48
1 Ahir ənga, vanya pəchi ngə nja nar nyi nə Yusufu, <<Ada nghə da yiying wa.>> Ngə cha fa'atə nguli shili nyi mətləu, Manasa ana Ifərem ga təra na nda yi da ada nyi Jakop. 2 Manda nja nar nyi nə Jakop. <<Janə zər nghə Yusufu shili tə da ka,>> ngə Isra'ila tə mər salkur ga hya'atə tə gangər nyi.3 Ngə Jakop tə nar nyi nə Yusufu, <<Hyel Ndər Gyalkur tə chabiya ɗa kərnyi vu Luz, hya tə hə'i Kan'ana, hinda cha səkə ɗa papa'akur 4 ga nar ɗa, <Yo mərtə nghə ko yatəkər ɗanghəu. Yo mərtə nyandəla kə ka jul nji ɗanghəu, ya yo nə nyi hə'i na nə nyandəla kə nda kwa shili hi ngha, ka sərfa'aki kənda.>
5 <<Sakana ja, nguli shili nghə ingə mətlə inga, ka Ifərem ana Manasa ngə nja yiyah nghə tə hə'i Masar təvi ya shili nga, na'a inga, ndo ɗa ka na'a, tang wi ngə tə ka Roben ana Simion. 6 Kala ngulisha'a nda nja yiyah nghə hin nda ndo ɗa ka nəngha, dəhə mbaɗə sərfa'aki nda nja nə nyi nə ka Ifərem na Manasa, kwa ɗa ka nə kənda dəhə nda. 7 Ku biji nda yo ɓəl hya'atə vu Padan, tsə'u ea ku laku, Rachal tə tə ku cha ya tə hə'i Kan'ana, tsə'utanyi zər babal yi Efrata. Ngə ya haɗiya nyi nya lakur yi Efrata>> (nacha ngə Baitalami).
8 Manda Isra'ila tə la'a ngulisha'a Yusufu, ngə cha jawa, <<Wa ina?>>
9 Ngə Yusufu tə nar nyi nə ada nyi, <<Ngulisha'a inda Hyel tə na'a tangnə ina.>> Kəl ngə Isra'ila tə na, <<Anda na nda ka ga ya səkə nda papa'akur.>>
10 Lya Isra'ila ɗa tə kutlə kutlə na hala, a tsə'u cho la'a sə dur wa. Ngə Yusufu tə shili na nguli nyi dzə nyi, ngə ada nyi tə gaɓtə nda. 11 Ngə Isra'ila tə nar nyi nə Yusufu. <<A naya zəndə yo da la'a huɗəma kə səkə wa, ya ngə Hyel tə i ya la'a ma'a nguli ngha.>>
12 Kəl ngə Yusufu tə fa'anda ngulisha'a inda tə dza Isra'ila ga uzhi na huɗəma cha səya hu'i. 13 Ngə Yusufu tə fa'atə nda kya'a nda, Ifərem təwa chisəma cha, Manasa təwa matsala cha, ga yi na nda ləhə dzər Isra'ila. 14 Kəl ngə Isra'ila tə ha chisəma cha ga fəu ku kəra Ifərem, madangə nacha ngə kushiu, ngə cha fətə matsala cha təkəra Manasa madangə nacha ngə zə'uala.
15 Ngə cha səkə nyi papa'akur nə Yusufu ga na,
<<Ga Hyel nda ma'i mar ada ɗa
Ibrahim ana Ishaku.
Hyel nda tə ɗa ka ndər ɓəla ɗa
ku dəhə ngya ɗa tsa'a tə pəchi nə ənya,
16 Chama nda tə dləuya ɗa tsa dəhə takasa,
cha səkə nyi papa'akur nə ngulisha'a ina.
Nja nga nda na tləm ɗa ɗəm ja,
ana tləmər ada ɗa Ibrahim ana Ishaku,
nyandəla nda yatəkər 'ual'ualəu tə dunəya.>>
17 Manda Yusufu tə la'a ada nyi tə fətə chisəma cha tə kəra Ifərem a cha ngatə məsɗakə nə wa, ngə cha hənda cha ada nyi tə kəra Ifərem ka cha fətə yatə kəra Manasa. 18 Ngə Yusufu tə nar nyi nə ada nyi, <<A'a, ada, nənnə ngə zə'uala, fətə chisəma ka tə kəra cha.>>
19 Kəl ja, ada nyi da tə i wa, ngə cha nar nyi, <<A zəndə tə ya, zər ɗa, zəndə tə ya. Nacha ma'a cho ɗa ka jul nji ɗanghəu, ya cho ɗa ndə dəgaləu. Dəhə ka ənga, zamə nyi ngə kushi nga kwa ɗa dəgal matsa cha, ya nyandəla cha kwa ɗa ka mətla hə'i ɗanghəu.>> 20 Ngə cha səkə nda papa'akur pəshi nda ga na,
<<Təwa tləmən hi njir Isra'ila kwa səkə nyi papa'akur nə nji, ndo na,
<Ga Hyella mərtə nghə wi Ifərem ana Manasa.> >>
Təwa ənga Jakop tə mərtə Ifərem dəgal matsa Manasa.