47
1 Ngə Yusufu tə gwa nar nyi nə Fir'auna, <<Ja'inə ada ɗa kə'i zamə ɗa ana sərshishi kənda ka njir ɓəla shilitə hya'atə vu Kan'ana, sakana ja'inə nda vu Goshen.>> 2 Ngə cha ɗəmtsə nji tufə ku huɗa ka zamə nyi ga təra na nda gwa huɗə Fir'auna.3 Ngə Fir'auna tə gwa jau nda, <<Mi tlər kəhya?>>
Ngə nda wum nə Fir'auna ga na, <<Kə'i mavi'i nghə njir ɓəla sərshishi nda, wi nda tə ka adan ea.>> 4 Ngə nda ɓəla tsakətə nar nyi, <<Ea shili tangnə ka ngya nə bəji kushiu, aka huɓə ɗa tə 'ual'ual tə hə'i Kan'ana, ya a bəɗakə da ka sərshishi mavi'i nghə wa. Sakan ja, maki ngyar mavi'i nghə nda ngya vu Goshen.>>
5 Ngə Fir'auna tə nar nyi nə Yusufu, <<A da kə nə ada nghə ana kə'i zamə nghə tə shili, 6 ya hə'i Masar dəhə ku cha ka, sər ka piya ada ngha ana kə'i zamə nghə tə mbwa nda ndiya na mənakəu. Sər nda ngya vu Goshen. Ətsəu macha vanya ndə da nda kwa nau ɓəla sərshishi ku pama nda, ba'a ka fəkə nyi təkəra na'awa sərshishi.>>
7 Kəl ngə Yusufu tə shili na ada nyi Jakop huɗə Fir'auna. Ahir Jakop tə səkə nyi papa'akur nə Fir'auna, 8 ngə Fir'auna tə jau nyi, <<Yiɗau fa ngha?>> 9 Ngə Jakop tə nar nyi nə Fir'auna, <<Fa ɗa nə ngyar məhiɓikur 130. Fa ɗa yiɗau tanyi, ya ana ɓwaɓwatəu, a fa ɗa da həya nə kə'i aji ɗa ku ngyar mihiɓikur kənda wa.>> 10 Kəl ngə Jakop tə səkə nyi papa'akur nə Fir'auna, ga biya təra.
11 Aka ənga, Yusufu tə piya ada nyi kə'i zamə nyi tə hə'i Masar, təwa banda ndiya na mənakə tə hə'i nda, tə mətla Ramesse, wi nda Fir'auna tə na. 12 Ngə Yusufu tə nə nyi sərsum nə ada nyi kə'i zamə nyi, ana dəhə njir ki ada nyi məlməl na ɗangkura ngulisha'a kənda.
Təlkur Yusufu ku Bəjir Huɓa
13 A tsə'u sərsum da tə dəhə hə'i nda wa, ya huɓə ɗa tə 'ual'ualəu, tə ɗa tsə'u dunamar njir Masar ana njir Kan'ana da wa. 14 Yusufu tə tsəmiya dəhə kwaba nda njir Masar ana njir Kan'ana tə shili ɗəl sərsum ni, ga shili nə tə patla Fir'auna. 15 Manda kwaba njir Masar ana nə njir Kan'ana tə wura, ngə dəhə njir Masar tə shili da Yusufu ga nar nyi, <<Nə ea sərsuma. Mya gwa'atə ko ngya ea eo kuɗə tə lya ka? Aka kwaba kəea wurti.>>
16 Ngə Yusufu tə nar nda, <<Shili ma na sərshishi kəhi, hya shili blabiya sərsum ni, mangə a tsə'u kwaba da tsa hi wa.>> 17 Kəl ngə nda shili na sərshishi kənda nə Yusufu, ga shili blabiya sərsum na taku, kətəng, kua, tla ana kwara i'i. Aka ənga cha həbiya fa nda na bəla sərsum na sərshishi kənda. 18 Nda fa nda tə tərabiya, ngə nda shili da cha vanya fa ga na, <<Sakan ja, a tsə'u eo nau dəwanda jiri tsa tlakən ea wa, aka kwaba kəea wur ti, ya sərshishi kəea ɗa tə ka nəngha. Sə nda həyadzə tsa ea sakana, kəl nda dza ea ana hə'i kəea. 19 Mya gwa'atə eo kuɗə dəhə ka ma'a hə'i kəea tə lya ka? Ɗəlbiya ea dəhə ka hə'i kəea, ka bəla nda ea na sərsuma, ya na ea ka hə'i kəea kwa ɗa ka mavi'i Fir'auna. Nə ea chuli tsa ea da kuɗa, ana tsa hə'i kəea da ba'a ɗa ka huɗəfi.>>
20 Ngə Yusufu tə ɗəlbiya nyi dəhə hə'i Masar nə Fir'auna. Kəl ngə dəhə njir Masar tə ɗəlnda babal kənda, manda tsə'utanyi huɓə nda 'ual'ual nə nda. Dəhə hə'i nda tə ɗa ka nə Fir'rauna, 21 Təwa ənga Yusufu tə shandə dəhə njir Masar ka mavi'i, ku dəhə ɓəlkər hə'i Masar. 22 Kəl nda a da cha ɗəl hə'i ka pərist wa, aka mbaɗə kənda da nda Fir'auna kwa maka nə nda, aku mbaɗə kənda nda Fir'auna kwa nə nda nda ndo səma. Nacha gwa'atə a da nda ɗəlnda hə'i kənda wa.
23 Ngə Yusufu tə nar nyi nə nji, <<Sakana mangə ənya wurtə ya ɗəlbiya hi dəhə ka hə'i kəhi nə Fir'auna, janə ma chuli hya ki tləkanda ku fa kəhi. 24 Kəl ja, ma hya shili na sərsuma, hyo shili nə nyi zhang ku tufəu nə Fir'auna, fwaɗə ku tufəu hyo fiya ka chuli ana ka sərsum ka kərnəhi ka njir ki kəhi ana ngulisha'a kəhi.>>
25 Kəl ngə nda na, <<A dləuya tə kə pya ea, ngwa ea uya kwambiyakur tə lya tlakən ea, eo ɗa ka mava Fir'auna.>>
26 Sə nda gwa'atə Yusufu tə fiya gadlagadla tə hə'i Masar ka ba'aka ənya nga, ənda zhang ku tufəu nə Fir'auna nga. Kəl nda hə'i pərist ngə pa'a tə ɗa ka nə Fir'auna.
27 Njir Isra'ila tə ngya tə hə'i Masar tə mətla Goshen. Nda mər gəna hi nda, ga yatəkər ga ɗa ɗanghəu.
28 Jakop tə ngya tə hə'i Masar fa kwabəməɗəfa, fa nyi dəhə dəhəu 147. 29 Manda bəjir tə nyi tə ɗa ləhəu, ngə cha nga zər nyi Yusufu ga nar nyi, <<Macha uya təya kwambiyakur tsa ka, fəu cha kə gwada kiɗa ea ya ka mərtə ɗa alkawal ənda ko ɗa kəriwa na'a ana jiri. Ənda a da ko haɗiya ɗa tə hə'i Masar wa, 30 kəl ja, ma ya təra gwa kə njikə mambəl gwa da kə'i ada ɗa, ko hətə ɗa ko yi haɗiya ɗa tə mbwa nda nja haɗiya nda ti.>>
Ngə Yusufu tə na, <<Yo mər tang wi ngə ka na nga.>>
31 Ngə Jakop tə nar nyi nə Yusufu, <<Səmnda ɗa fəla,>> Ngə Yusufu tə səmnda nyi fəla, ngə Isra'ila tə sha tə gangər nyi, ga hətə nyi səli nə Hyel.