Jakop tə Gwa Masar
46
1 Kəl ngə Isra'ila tə biya dəhə ka sə nda nənyi, nda cha yi Biyarsheba, ngə cha handa təmachi nə Hyel nə ada nyi Ishaku.2 Ngə Hyel tə ndər na Isra'ila ku shi'uni vu'i ga na, <<Jakop! Jakop!>>
Ngə Jakop tə wum ga na, <<Janə ya.>>
3 Ngə Hyel tə nar nyi. <<Naya ngə Hyel, Hyel nə ada ngha. Ngwa ka da ləvər tsa yi Masar wa, aka yo yi mərtə nghə ka mələm dəgal hinda. 4 Yo ma'i tsa'a naka gwa Masar, ya yo ɓəlandə nghə shili səkəu. Aku cha Yusufu ko yi tah.>>
5 Kəl ngə Jakop tə ngyar Biyarsheba, ngə nguli nyi tə hətə adan nda Jakop ana ngulisha'a kənda ana mahi'i kənda ku charkaina tla inda Fir'auna tə sətə ka fa'a nda nda. 6 Ətsəu nda fa'atə dəhə sərshishi kənda ana dəhə gəna kənda inda nda uya tə hə'i Kan'ana, ngə Jakop ana dəhə nyandəla cha tə təra yi Masar. 7 Jakop tə fa'atə nguli nyi shili ka mahi'i nyi, ana aji nyi shili ka mahi'i, ana dəhə nyandəla cha.
8 Janə tləmər nguli shili Isra'ila (Nyadəla Jakop i'i) nda tə təra ka cha yi Masar,
Roben zə'ualə Jakop.
9 Ja inə nguli shili Roben,
Hanok, Pallu, Hezron ana Karmi.
10 Ja inə nguli shili Simion,
Jemuel, Jamin, Ohad, Jakin, Zohar ana Shawul nguli kwa Kan'ana.
11 Ja inə nguli shili Levi,
Gashon, Kohat ana Merari.
12 Nguli shili Yahuda tsə'u nanda ingə,
Er, Onan. Shela, Perez ana Zera (kəl ja, Er na nda na Onan kuɗə tə vu Kan'ana.
Nguli shili Perez, na nda ngə
Hezron ana Hamul.
13 Ja inə nguli shili Issaka,
Tola, Puwa, Jashub ana Shimron.
14 Nguli shili Zebulun, nanda ingə,
Sered, Elon ana Jalil.
15 Inənnə ngə nguli shili nda Liya tə yiyah nyi nə Jakop vu Padan Aram, ahir nda cha yah kwa nyi Dina. Nguli shili ana ku'imahi'i nyi na nda 33 nda dəhə dəhəu.
16 Inənnə ngə nguli shili Gad,
Zepon, Haggi, Shuni, Ezbon, Eri, Arodi ana Areli.
17 Inənnə ngə nguli shili Asha,
Imna, Ishva, Ishvi ana Beriya ba'a
kwamə nda Sera.
Nguli Beriya nanda ingə,
Heba ana Malkiyel.
18 Inənnə ngə ngulisha'a nda Zilfa tə yiyah nyi nə Jakop, nanda kumabəkwah nda dəhə dəhəu. Zilfa ngə kwatəra nda Laban tə nə nyi nə kwa nyi Liya ma cha ɗəuwa.
19 Nguli shili nda Rachal tə yiyah nyi nə Jakop,
nanda ingə Yusufu ana Banyami. 20 Ja'inə nguli shili inda Asenat kwar Fotifera ndər Masar, pərist nə On tə yiyah nyi nə Yusufu; Manasa ana Ifərem.
21 Ja'inə nguli shili Banyami;
Bela, Beka, Ashbel, Gera, Na'aman, Ehi, Rosh, Mupim, Hupim ana Ard.
22 Inənnə ngə nguli shili nda Rachal tə yiyah nyi nə Jakop, nanda kwabəfwaɗə nda dəhə dəhəu.
23 Zər Dan,
nacha ngə Hushim.
24 Nguli shili Nafitali,
nanda ingə Jaziyel, Guni, Jeza ana Shilem.
25 Inennə ngə nguli shili nda Bilha tə yiyah nyi nə Jakop, nanda məɗəfə nda dəhə dəhəu. Bilha nacha ngə kwatəra nda Laban tə nə nyi nə kwa nyi Rachal ma cha ɗəuwa.
26 Dəhə dəhə nji inda tə gwa Masar kə'i Jakop, nji kwakumnyi parnya kwah, nji inda təkəɗər nyadəla cha, a nja jiga mahi'i nguli nyi wa. 27 Dəhə ka nguli shili Yusufu inda mətlə inda nja ya vu Masar nda, ɗangkura nyandəla Jakop nda tə gwa Masar, nanda məɗəfəkumnyi nda dəhə dəhəu.
28 Manda Jakop tə ɗa ləhə na Goshen, ngə cha sə Yahuda biyaman nda yada Yusufu ka cha zəbiya char nda lakur gwa ku Goshen. 29 Yusufu tə batliya charkaina taku nyi ka cho biya ɓə na ada nyi Isra'ila. Nda cha yi dza ada nyi, ngə cha sə cha cha ga gapətə nyi, cho tiwi.
30 Ngə Isra'ila tə nar nyi nə Yusufu, <<Sakan ja, mada ya tah, manə jan ya la'a nghə tə na kərɗa ənda tsə'u tanghə na pi.>>
31 Kəl ngə Yusufu tə nar nyi nə ka zamə nyi inda ana dəhə njir ki ada nyi, <<Ngwa ya gwa nar nyi nə Fir'auna ənda, <Janə ka zamə ɗa ana dəhə njir ki ada ɗa, inda na ngya vu Kan'ana, shili tə da ya. 32 Nanda njir ɓəla sərshishi nda, nda shili na dangal kənda nə kətəng ka kua, ana nə tla ana dəhə sə kənda.> 33 Ma Fir'auna tə nga hi ga jau hi, <Mi tlər kəhya?> 34 Hya wum nə nyi bəra, <Na ea mavi'i nghə njir ɓəla sərshishi ea fwatə ku aji.> Kəl ba'a nja ngya hi hya ngya ku mətla nə Goshen, aka dəhə njir ɓəla sərshsishi, sər həɗə nda nə njir Masar.>>