Yusufu tə Biya tə Babal
45
1 Sakan ja, a Yusufu da zhaka nau chinda kərnyi mar dəhə njir mər tlər nyi wa, cha na na kurakə dzəgam dzəgam nə njir mər tlər nyi inda, <<Təra ma biya!>> Aka ənga, a vanya ndə da tangnda ma Yusufu chabiya kərnyi nə ka zamə nyi wa. 2 Kəl ngə cha tiwi na kurakə banghəu, nda ma'a njir Masar ana njir ki Fir'auna tə ngati.3 Ngə Yusufu tə nar nyi nə ka zamə nyi, <<Naya Yusufu na! Tsəu tanyi ada ɗa na pi ya?>> Kəl ja, ka zamə nyi da tə nau wum nə nyi wa, aka ləvər tə səya nda.
4 Ngə Yusufu tə nar nyi nə ka zamə nyi, <<Shili ma ləhə dzə ɗa.>> Manda nda yi dzə nyi, ngə cha na, Naya zamən hi Yusufu nda na, nda hya ɗəlnda gwa Masar nda! 5 Sakan ja, ngwa hya ɗəngha ndara hya mər huɗatla na kərnəhi aka hya ɗəlnda ɗa shili tangnə wa, aka ga ya mbəɗandə pya nji ngə Hyel tə sə ɗa təvi hya shili. 6 Aka mətlə nə fa cha nda huɓə tə tla, ya tsə'utanyi fa tufəu biyama nda a da njo zwa ndara nja məriya wa. 7 Kəl ja, Hyel tə səɗa təvi hya shili, aka ga nyandəla hi həyadzə tə dunəya, təwa əngə tsə'u Hyel kwa mbəɗandə pya nji ɗanghəu.
8 <<Aka əngə ja, a da nahi ngə tə səɗa shili tangnə wa, Hyel nga. Cha mərtə ɗa wi ada nə Fir'auna, tlakə tsə'u təkəra dəhə njir ki nyi ana gavərma təkəra dəhə njir Masar. 9 Sakan ja, kusa ma hya yi nar nyi nə ada ɗa, <Janə sə nda zər nghə Yusufu tə na. Hyela fiya ɗa tə tlakə təkəra dəhə njir Masar. Shili da ya, ngwa ka da finda ɓəji wa. 10 Ko shili ngya ku mətla Goshen ləhə dzə ɗa, naka ana ngulisha'a ngha ana ka aji ngha, sərshishi ngha ana njir ɓəla sərshishi ngha ana dəhə sə nda nə ngha. 11 Yo nə nghə sərsum tangnda vu Goshen, a nə ngha ana njir ki ngha ana sərshishi ngha, aka tsə'utanyi huɓə nə fa tufəu kwa shili. Məlna a sə da ko tar wa.
12 << <A la'a tə hi na lya hi, ya a la'a tə kə tsə'u zamə ɗa Banyami, ənda vəlvəl naya Yusufu ngə kwa ndər nə hi. 13 Nar nyi nə ada ɗa chulkə səli nda nja na'a vu Masar ana dəhə sə nda hya la'a. Hya shili na ada ɗa shili tangnə kuskusu.> >>
14 Kəl ngə cha sə cha cha ga gaɓətə zamə nyi Banyami ana tiwi, ngə Banyami tə gaɓətə nyi, ndo tiwi. 15 Ngə cha gaɓətə zamə nyi inda kərzhang kərzhang cho tiwi. Ahir nga ngə dza zamə inda tə ɗa walwalnyi, ngə nda ɓwanya kə'i cha.
16 Manda mafakə tə ya tə patla Fir'auna ənda kə'i zamənya Yusufu tə shili, kəl Fir'auna ana njirawawa'a nyi tə ɗa na hirgyaɗi. 17 Ngə Fir'auna tə nar nyi nə Yusufu, <<Nar nyi nə ka zamə ngha, <Janə sə nda ndo məra, Mbatə ma sərsum tə dagərya sershishi kəhi hya ɓəl ya tə hə'i Kan'ana, 18 hya ki shili na adan hi ana njir ki kəhi shili da ya. Yo shili nə hi mbwa nda ndiya na mənakə tə hə'i Masar, ya hyo uya sərsum nyabəu tə hə'i na.>
19 <<Nə nghə tə nji gyalkur ka nar nda, <Nda hətə charkaina tla vu Masar aka ngulisha'a ana mahi'i kənda ana ada ngha nda shili. 20 Ngwa nda da ɗəngha na kar kənda wa, aka dəhə sə mənakə nə hə'i Masar kwa ɗa ka nə kənda.> >>
21 Kəl ngə nguli shili Isra'ila tə mər ənga. Yusufu tə nə nda charkaina tla i'i wi nda Fir'auna tə na, ngə cha nə nda sərsum hə laku tsəu. 22 Ngə cha nə nyi taɗər lukutə nə kala ndəu, kəl ja, cha nə nyi shekel 300 nə azurfa, ana dzaki tufəu nə Banyami. 23 Janə sə inda cha lətə nyi nə ada nyi, bidal kwara kuma ana ga'a nə sə mənakə inda nja ɓatlə vu Masar tə ya nda, ana mahi'i kwara ana uhi tə ya nda, ana gwazhilakə ana alenya sər hə laku. 24 Ngə cha səu ka zamə nyi ku laku, manda ndo təra ngə cha nar nda, <<Ngwa hya da guhi ku laku wa!>>
25 Kəl ngə nda ngyar Masar ga shili da adan nda Jakop tə hə'i Kan'ana. 26 Ngə nda nar nyi, <<Yusufu tsə'utanyi na pi! Nacha ngə ngwamna hə'i Masar.>> Kəl ngə ləmba Jakop tə tləa, aka a da cha dləukər na nda wa. 27 Kəl ja, manda nda dəkar nyi dəhə sə nda Yusufu tə nar nda, ana nda cha la'a charkaina tla inda Yusufu tə lətə shili ka njo shili hətə nyi nə nda, kəl ngə shanguɗa ada nda Jakop tə ɓəl shili. 28 Kəl ngə Jakop tə na, <<Sakana a dləukər tə ya! Zər ɗa Yusufu tsə'utanyi na pi. Yo ma'i ya ki la'a nyi təvi yo tah.>>