Ɗeɗika Yusufu ku Mɓəl Banyami
44
1 Ngə Yusufu tə nar nyi nə kadakaliya nyi, <<Nyandə mbəl nji ingə na sərsum nda kala ndə kwa nau həti, ka ɓəlau kwaba kala ndə ku nya mbəl nyi. 2 Kəl ba'a ka fəu ɗeɗika azurfa ɗa ku mbəl zər kushi nga, tsa'a na kwaba ɗəl sərsum nyi.>> Ngə cha mərtə tang wi nda Yusufu tə nar nyi.3 Nda kadə vu'i wura, ngə nja səu nji inda ku laku ka kwara kə nda i'i. 4 A da nda taa ɗa naɗə tsa mələm wa, ngə Yusufu tə nar nyi nə kadakaliya nyi, <<Kusa nəu nji inda, ma ka həya nda, ka nar nda, <Mya gwa'atə hya kinda mənakəkur na ɗimikura? 5 Mya gwa'atə hya həltə ɗəɗika azurfa tlakə ɗa? Aku ɗeɗika ngə ngə tlakə ɗa sa, ana tsakəza. A mərtə hi sə ɗimi gagaɗa.> >>
6 Nda cha həya nda, ngə cha nar nda ɓwanya inə dəhəu. 7 Kəl ngə nda nar nyi, <<Mya gwa'atə tlakə ɗa kwa na chul sə wi nga? Ga Hyella kanda mavi'i nghə mər sə wi nga! 8 Janə ma'a kwaba nda ea uya ku nya mbəl kəea, a ɓəl tə ea nə shili, fwatə hya'atə tə hə'i Kan'ana. Mya gwa'atə eo həl ɗəɗika azurfa ndara nə bəjingha ku ki tlakə ngha? 9 Ma nja uya tsa zhang ku huɗa mavi'i ngha, nja tsəya nyi, kəl həya dzə kəea kwa ɗa ka mavi'i tlakə ɗa.>>
10 Ngə kadakaliya nda tə na, <<Yau, ga cha ɗa wi ngə ka na nga. Ma dəhə ndə nda nja uya tsari cha ɗa ka mava ɗa, həyadzə kəhi tsə'u kwa ɓəl yo ki.>>
11 Kala ndə tə kusa həya mbəl nyi səya hu'i ga pəliya. 12 Kəl ngə kadakaliya tə ghəya gwa'a, cha ghəya na ndəra dəgal udiya tə zər kushiu, ngə cha uya ɗəɗika nda ku mbəl Banyami. 13 Aka ənga kəl nda tətanda ləkutə dzən nda. Kəl ngə dəhə nda tə ɓəlandə mbəl gi tə ya kwara, ga ɓəl gu ta mələm nda.
14 Ma Yahuda ka zamə inda ɓəl shili, Yusufu tsə'utanyi ku ki, ngə nda vakənda kərnənda səya hu'i huɗə nyi. 15 Kəl ngə Yusufu tə nar nda, <<Mi nə sə nə hya mər na? A hya zəndə ndə wi naya kwa gwa'abiya sə təwa tsakəzə wa ya?>>
16 Yahuda tə wum ga na, <<Mi sənda eo nau nar nyi nə tlakə ɗa? Ya mi eo nau na? Aman eo ɗa na chaɗənda hu'u dza kərnəea? Hyella chabiya tə bikə mavi'i ngha. Sakana mavi'i tlakə ɗa ea, na ea na kərnəea ana ndə nda nja uya ɗəɗika tsa cha.>>
17 Kəl ngə Yusufu tə na, <<Ga Hyella kanda ya mər sə wi nga! Kəl nda ndə nda nja uya ɗəɗika tsa cha nacha ngə kwa ɗa ka mava ɗa. Ba nahi nda tə həyadza, ma'i ma yada adan hi ku piyarɗufəu.>>
18 Ngə Yahuda tə yada Yusufu ga na, <<Maki, tlakə ɗa, ngyar mava nghə ɓwanya nə tlakə ɗa. Ngwa huɗa ka da tla tsa mava nghə wa, madangə sə zhang hi na Fir'auna na kərnyi. 19 Tlakə ɗa, ka ɗaka jau ea bəra, <Tsəu tanyi adan hi na pi ya? Vanya zamən hi da ya?> 20 Ya ngə ea wum ga na, <Adan ea halti, ya zərsal da nda nja yiyah nyi ku halhalkur nyi, nacha ngə adahir. Ya nacha ngə zərsal ama nyi zhang nda tə həyadza, ada nyi kwa nyida nyi, ya zamə nyi təti.>
21 <<Kəl ngə ka nar nyi nə mavi'i ngha, <Shili ma nacha tangnə ya la'a nyi na kərɗa.> 22 Ngə ea nar nyi nə tlakən ea, <A zər nda da kwa nau ngyar ada nyi wa, macha ngya nyi, ada nyi kwa tah.> 23 Kəl ngə ka nar nyi nə mavi'i ngha, <Ma a adahir kəhi da shili wa, a da hyo shili la'a huɗəma ya səkə wa.> 24 Manda ea ɓəl yada mava nghə adan ea, ga yi nar nyi sənda tlakən ea tə na.
25 <<Kəl ngə adan ea tə na, <Ɓəl ma hya ki ɗəlbiya mən sərsum səkəu.> 26 Kəl ngə ea na, <A ea kwa nau ɓəl wa. Kəl nda macha dəhə ea ka zamən ea ngə kushi nga. A da eo yi la'a huɗuma ndə nda wa, kəl nda macha zamən ea ngə kushi ngə tsa'a kə'i ea.>
27 <<Ngə mava nghə adan ea tə na, <Kwa zəndə hi ənda mala ɗa tə yiyah ɗa nguli shili mətləu. 28 Zhang təra tanyi tə tsaya, ngə ya har ənda, <<Vəlvəl tətau nyi tə nji kuchiɗə kuchiɗəu.>> Aka a ya ɓəla la'a nyi wa. 29 Maka ɓəla hənda nənnə tsa ya, ya ngə sa ki uya nyi, hyo gwa'atə naya ndə halhal twal na shishi pərtə kwa go hu na huɗətla.>
30 <<Aka ənga, ma ya ɓəl kəla zər nə yada mava nghə ada ɗa, cho tah, aka zər ngə ngə pya ada ɗa. 31 Ma cha la'a a zər ngə da tsa'a na ea wa, cho tah. Mavi'i nghə kwa gwa'atə adan ea ndə halhal twal na shishi pərtə kwa go hu na huɗətla. 32 Aka naya mava nghə tə hətə salkur ɓəl na zər ngə yi. Ya na, <Ma a da ya ɓəl nacha shili wa, bikəbikənyi ngya təkəra ya ba'anawa!>