Nja Təra na Banyami yi Masar
43
1 Kəl huɓə nda tsakətə ɗa 'ual'ualəu tə hə'i Kan'ana. 2 Manda nda səmnya sərsum nda nda shili nə hi Masar nda, ngə adan nda tə nar nda, <<Ɓəl ma hya yi ɗəlbiya mən sərsuma.>>3 Kəl ngə Yahuda tə nar nyi, <<Ndə nda tə təɗəhimi nə ea 'ual'ual ga nar ea, <Ma a da hya shili na zamən hi wa, a da hyo la'a huɗuma ya wa.> 4 Macha ko sə ea dəhə ea ka zamən ea, eo ma'i eo gwa ɗəlbiya hi sərsuma. 5 Kəl ja, ma cha a da ko ngya nyi ea ma'i dəhə ea wa, a da eo ma'i wa, aka ndə nda tə nar ea, <A da hyo la'a huɗuma ya səkə wa, kəl nda macha zamən hi tsa'a kə'i hi.> >>
6 Kəl ngə Isra'ila tə jawa, <<Mya gwa'atə hya shili na ɗa ɓwaɓwatə təwa nar nyi ndə ngə ənda vanya zamən hi da?>>
7 Ngə nda wum ga na, <<Ndə nda tə jau ea 'ual'ual təkəra kərnəea ana njir ki kəea. Cha jau ea, <Tsəu tanyi adan hi na pi ya? Vanya zamən hi da ya?> Naea nəkə ea jau nyi inda tanyi ngə ea wuma. Aman ea ɗa na zəndə ənda cho na, <Shili ma na zamən hi tangna>?>>
8 Kəl ngə Yahuda tə nar nyi nə ada nyi Isra'ila, <<Ngya ea na zər ngə ea ma'i, ea gwa shili na mən sərsuma, a tsa naea ana naka ana nguli kəmən da kuɗa. 9 Naya təkərɗa yo ɓəlatə nyi, ma sə tə uya nyi bikə ɗa nga. Ma a da ya ɓəl na cha shili ga shili na cha huɗə nghə wa, bikəbikənyi ngya təkəra ya ba'anawa. 10 Aka macha a ea nda shivi wa, ta'ir zhanda tə ea hya ea mətləu.>>
11 Kəl ngə adan nda Isra'ila tə nar nda, <<Macha a ɗa tə tuku, janə sə nda hyo məra. Hya pəu alenya sə nda ndiya na mənakə tə hə'i nə ku mbəl kəhi, hya yi na nyi nə ndə ngə ka ga'a, hya uya mal ana mwamwa chiɗi kushiu, kar yaji ana mur, ana pistachiyo, ana almon. 12 Hya hətə kwaba wi nda hya ɗaka ma'i nə nda zhaka mətləu, aka tuku hya ɓəlandə kwaba nda nja ɗaka ɓəlandə hi nə nda, aka kustanyi a da na ikur kənda ngə wa. 13 Ma'i ma ka zamən hi hya ɓəl yada ndə nda səkəu. 14 Ga təhuɗə Hyel Tlakə Ndər Gyalkur cha mərtə ndə ngə ngatə təhuɗə kəhi, tsa'aka cho ngyar alenya zamən hi ana Banyami nda ɓəl shili kə'ihi. Aka ma a ɗa tuku yo tar nguli ɗa, yo tar nda.>>
15 Kəl ngə nji inda tə fa'atə ga'a inda ana kwaba wi nda nda ɗaka ma'i nə nda zhaka mətləu, ba'a Banyami. Ngə nda təra na kusa gwa Masar, ga gwa char kərnənda nə Yusufu. 16 Manda Yusufu tə la'a Banyami kə'i nda, ngə cha nar nyi nə kadakaliya nə ki nyi, <<Ma'i na nji inə gu ki ɗa, ka gwa tlakər wulya təkəra sərshishi ka mərtə sərsuma, aka eo səm sərsum puchi kə'inda.>>
17 Kəl ngə ndə nda tə mərtə tang wi nda Yusufu tə na, ngə cha təra na nji inda gu ki Yusufu. 18 Kəl ja, ləvər tə səya nji inda nda nja təra na nda gu ki. Ndo jigadəma bəra, <<Nja shili na mən tangnə təkəra kwaba nda naja ɗaka ɓəlau mən gu mbəl kəmən nda na. Cho i cha uya mən na bikəu, cha səya mən ka mavi'i, cha dləuya kwara kəmən i'i.>>
19 Kəl ngə nda yi da kadakaliya Yusufu ku lakur gwa ku ki nda, ga ɓwanya nə nyi. 20 Ngə nda na, <<Matikuɗi, maləm, ea shili tangna tangərma ka ɗəl sərsuma. 21 Kəl ja, ku ɓəji nda ea ki ta'i vu'i, ngə ea mbəɗiya mbəl kəea, kəl ngə ea la'a kwaba kala ndə ku mbəl nyi tsatsa'a, wi nda ea kinda. Ya janə ea ɓəltə nə shili. 22 Ya shili tə ea na vanya kwaba səkəu ka ɗəl sərsuma. A da ea zəndə ndara wa tə pəu kwaba inda ku mbəl kə ea wa.>>
23 Ngə cha na, <<Ngwa hya ɗəngha wa, ngwa hya da ləvər wa, a dləutsə təya kwaba kəhi, Hyel kəhi, Hyel adan hi, nacha ngə tə nə hi gəna ku mbəl kəhi.>> Kəl ngə cha zəbiya na nda Simion. 24 Ngə kadakaliya nda tə təra na nda gu ki Yusufu, ngə cha nə nda ɓiti nda chinda hya nda, ga gwa'arə nyi sərsum nə kwara kənda i'i. 25 Ngə nda fa'abiya ga'a inda nda shili nə nə Yusufu nda, aka Yusufu kwa shili ku ki əpuchi, ya a ngatə tə nda bəra ndo shili səm sərsum kə'i cha. 26 Manda Yusufu tə shili ku ki, ngə nda nə nyi ga'a inda nda shili nda, ga uzhi səya hu'i huɗə nyi. 27 Ngə cha jau nda ga na, <<Aman adan hi nda halhal nda hya ɗaka dəkar ɗa nda? Tsəutanyi na pi ya?>>
28 Ngə nda wum ga na, <<Mava nghə tsəutanyi na pi ya yiying tanyi.>> Ngə nda uzhi ga hətə nyi səli. 29 Manda cha ndzamar ngə cha la'a zamə nyi Banyami, zər ama nyi, ngə cha jau nda, <<Nənnə ngə adahir kəhi nda hya ɗaka dəkar ɗa nda ya? Ga Hyel char nghə ɗanghali zər ɗa.>> 30 Manda Yusufu kwa ngatə wi cho gwa'a tiwi, ngə cha kusa təra ki gwa'a mbwa nda cho tiwi tə. Ngə cha təra gu vi nyi, ga gwa tiwi ku nda.
31 Ahir cha chinda ma cha, ngə cha mbiyahuɗə ga zəbiya, ga na, <<Təkəya nji sərsuma.>>
32 Ngə nja nə nyi nənyi na sərsum zhangtanyi, ka zamə nyi inda nanda səkənda, aka a njir Masar da kwa səm kə'i njir Ibrani wa, aka sər həɗə cha nə njir Masar. 33 Ngə nji inda tə ngya biyama nyi ka dəgal ka dəgal, ghəya tə zə'uala səya tsa'a tə adahir, ndo ndzam kərnənda ndo mər məngəl. 34 Ku saka nda nja kwa nənda sərsum hya'atə tə tyaɓər Yusufu, mbaɗə Banyami tə ɗa zhaka tufəu matsa nə kala ndəu. Ngə nda səma, ga sa na hirgyaɗi kə'i cha.