Ka Zamənya Yusufu tə Dzəva Masar
42
1 Manda Jakop tə ngabiya sərsum da vu Masar, ngə cha nar nyi nə nguli shili nyi, <<Mya gwa'atə hyo ngya ka ndzam lya kərnəhya?>> 2 Ngə cha biyama na na, <<Ya ngatə ənda uhi ɗa vu Masar. Ma'i ma hya gwa ɗəlbiya mən, tsaka məna ngya tsa mən ɗa kuɗa.>>3 Kəl ngə kə'i zamənya Yusufu kuma tə təra gwa Masar ka ɗəl sərsuma. 4 Kəl ja, a Jakop da ngyar Banyami zamənya Yusufu cha ma'i kə'i alenya zamə nyi wa, aka cho ləvər tsa vanya sə da ɗa na cha. 5 Aka ənga, nguli shili Isra'ila tə ma'i gwa Masar ka ɗəl sərsum nanda kə'i alenya nji, aka huɓə tlətə tə hə'i Kan'ana tsəu.
6 Aka ku bəji nga Yusufu ngə ngwamna nə hə'i Masar, nacha ngə ndər ɗəlnda sərsum nə dəhə njir hə'i nda. Aka ənga nda ka zamənya Yusufu tə dzəva, ngə nda uzhi səya huɗə nyi ana huɗəma nda səya hu'i. 7 Nda Yusufu tə la'a ka zamə nyi, ngə cha ngabiya nda, kəl ja, cha mərtə kərnyi wi mihiɓi ga ɓwanya nənda na zandəra. Cha jau nda, <<Hya'atə man hya?>>
Ngə nda wuma, <<Hya'atə vu Kan'ana, ea shili ka ɗəl sərsum na.>>
8 Madangə Yusufu ngabiya tə ka zamə nyi, kəl ja, a da nda ngabiya nyi wa. 9 Kəl ngə cha ɗənghatə na shi'uni nyi inda, ngə cha nar nda, <<Nahi njir gwa'a hya mələm na! Hya shili ga hya la'a təutətəutəkur hə'i kəea na.>>
10 Ngə nda wum ga na, <<A'a, tlakən ea, mavi'i nghə tə shili ka ɗəl sərsum na. 11 Na ea nguli ndə zhang ea. Mavi'i nghə nda na jiri ea, a da ea njir gwa'a hya mələm wa.>>
12 Ngə Yusufu tə ɓəlakə nda, <<A'a! Hya shili ga hya la'a təutətəutəkur hə'i kəea na.>> 13 Kəl ja, nda wum ga na, <<A'a, a da əngə wa, ɗakaɗa kwabəmətlə ea, nguli ada zhang. Adahir kəea sakana ku ki cha nanda na adan ea, vanya zər kushi kəea tsə'u a tə ti.>>
14 Kəl ngə Yusufu tə ɓəlakə nda, <<Wi ngə ya nar hi nga, nahi njir gwa'a hya mələm hi! 15 A səmnda tə ya fəla na gyalkur Fir'auna, kəl hya shili na zamə nyi ngə kushi ngha ma əngəwa a da hyo ngyar mbwa nə wa. Nacha ngə laku nda yo dzətə hi ti 16 Hya sə ndə zhang ku pama hi cha ki shili na zamən hi, nahi nda tə həyadzə tangnə tsə'u njo pəu hi ku jarum, aka nja dzətə ɓwanya kəhi ndara jiri ngə hyo pəa, ma a da əngə wa, səmnda tə ya fəla na tləmər Fir'auna, njir gwa'a hya mələm hi!>> 17 Ngə cha pəu nda ku jarum nə hanyi makərəu.
18 Pishir hanyi makərkunyi, ngə Yusufu tə nar nda, <<Janə sə nda hyo mər ga ya ngya hi na pi, aka ndər ləvər Hyel ya. 19 Macha njir jiri hi, sər hya ngyar zamən hi zhang ku jarum, alenya nji ma'i na sərsum nə njir ki kəhi inda ku ɓwaɓwatər huɓa. 20 Kəl ja, tuku hya shili na ɗa adahir kəhi, təwa ənga njo zəndəbiya təkəɗəkura ɓwanya ngə hya pə nga, ənda vəlvəl hi, ga nja ngya hi na pi.>> Aka ənga nda dləukər nda mər ənda.
21 Kəl ngə nda nar nyi nə kərnənda, <<Vəlvəl shafa zamən mən na səya mən. La'a tə mən chul ɓwaɓwatə nda cha kwa ana butəbutəkura cha ku bəji nda cha gədi mən məna ngya nyi na pi nda, kəl ja, a da məna səhimi da cha wa, nacha na gwa'atə ɓwaɓwatə nə tə shili təkəra mən.>>
22 Ngə Roben tə ɓəlakə nda, <<A da ya nar hi ndan ənda ngwa hya fəndzə nyi chi nə zər nda wa ma? Ngə hya ngyar səhimi da ya! Sakan ja, janə məno sa ɓwaɓwatər bikər pənda mashi nyi.>> 23 A da nda zəndə ənda Yusufu kwa ngatə nda cha wa, manda ma ndo ɓwanya ndər shabiya ɓwanya kwa shabiya yo nya njir Masar.
24 Kəl cha shanda macha ngə cha ghəya tiwi, dəhə ka ənga ngə cha ɓəla sha ga ndər na nda. Ngə cha hətə Simion ngə cha tsau nyi ku jarum tə lya nda.
25 Ngə Yusufu tə na nja nyandə nda mbəl kənda na sərsuma, nja ɓəlau nyi kwaba kala ndə go mbəl nyi, nja nə nda sərsum ka nda har laku ni. Ya əngə nja mərtə nda, 26 ngə nda mbatə tə ya kwara kənda ga təra.
27 Nda nda yi tə mbwa nda ndo ta'i tə ka nda hənda hanyi, ngə zhang ku huɗa nda tə pəliya mbəl nyi ka cha nə nyi sərsum nə kwara nyi, kəl cha la'a kwaba nyi ku nya mbəl nyi. 28 Ngə cha nar nyi nə ka zamə nyi, <<Janə nja ɓəlandə ɗa tə kwaba ɗa, janə ku mbəl ɗa.>>
Kəl ngə ləmba nda tləa ndo ndzamə kərnənda, dza ndo tsamətlaɗəu, ngə nda na, <<Wa tləmər sən Hyela mərtə mən na?>>
29 Manda nda shili da adan nda Jakop tə hə'i Kan'ana, ngə nda dəkar nyi dəhə sə nda ɗa na nda, ngə nda na, 30 <<Ngwamna hə'i nda tə ɓwanya nə ea na zandəra, ga nar ea, ənda njir gwa'a hya mələm ea. 31 Kəl ja, ea nar nyi ənda, <Na ea njir jiri ea, a da njir gwa'a hya mələm wa. 32 Na ea nguli shili kumaɓəmətlə ea tə adan ea, zhang tə ti, ya adahir kəea tsə'u a hyo ki ana adan ea vu Kan'ana.>
33 <<Kəl ngə ngwamna hə'i nda tə nar ea, <Janə ənda yo ɗa na zəndə ənda njir jiri hi, hya ngyar zamən hi zhang tangnə, hya hətə na sərsum nə njir ki kəhi inda ku ɓwaɓwatər huɓə hya təra. 34 Kəl ja, hya ki shili na adahir kəhi, ga ya zəndə ənda a da hi njir gwa'a hya mələm wa, njir jiri hi. Kəl ba'a ya ɓəlandə hi zamən hi, ya hyo nau biyama na shafəli ku hə'i na.> >>
35 Manda nda shabiya sə ku mbəl kənda, kəl kala ndə tə həya kwaba nyi pəɗəpəɗənyi ku mbəl nyi! Nda nda la'a kwaba nda dəhə nda ka adan nda, ngə ləvər tə səya nda. 36 Kəl ngə adan nda Jakop tə nar nda, <<Təkəbiya ɗa tə hi ka nguli ɗa. Yusufu tsə'u da wa, Simion tsə'u da wa, ya sakan tsə'u hyo gwa'a hya hətə Banyami. Dəhə sə inga, naya zhangta ɗa ngə na ɓwaɓwatəu!>>
37 Kəl ngə Roben tə nar nyi nə ada nyi, <<Ma a ya ɓəl na cha shili wa, ko nau kuɗənda nguli shili ɗa ingə mətlə inga. Tsau ɗa nyi ku cha ya, yo ɓəl na cha shili.>>
38 Kəl ja, Jakop tə na, <<A zər ɗa da kwa ma'i kə'i hi wa, zamə nyi təti, kəl nacha nga həyadza. Ma sə tə uya nyi ku lakur ma'i ngə hyo ma'i nga, hyo gwa'atə naya ndə halhal twal na shishi pərtə kwa go hu na huɗətla.>>