Shi'uni Fir'auna
41
1 Ahir fa mətlə tsa'atsa'a, Fir'auna tə shi'uni ənda, tə ta'i cha nya dəl Nilu, 2 kəl janə tla ngətləngətlə ya gumaguma məɗəfə tə zəbiya ku dəl Nilu nda, ndo ɓəla ku sar walang. 3 Ətsəu kəl janə alenya tla ɗimiɗimi ya nguvinguvinyi mədəfa, tə zəbiya ku dəl Nilu nda, ga zəbiya ta'i ta nda dza inda nya dəl nda. 4 Kəl ngə tla mədəfə ɗimiɗimi ya nguvinguvinyi inda tə ɗənya tla məɗəfə ngətləngətlə ya gumaguma inda. Kəl ngə Fir'auna tə hya'ati.5 Ngə cha ɓəla gu hanyi ga ɓəla shi'uni mətləkunyi, abəra zangam uhi məɗəfə inda tə pəli mənakəu, kwa hə tə chiva zhang. 6 Ətsəu kəl janə alenya zangam uhi məɗəfə inda shiwarshiwar nda gyang fwakə tə kəunda tə hya'ati. 7 Zangam uhi shiwarshiwar inda tə ndasənya inda tə pəli mənakə məɗəfə inda. Kəl ngə Fir'auna tə hya'ati, macha wulə shi'uni nda.
8 Nda Fir'auna tə hya'atə mbudla kəl jigadəma tə wendə nyi kəbanghəu, ngə cha sə nja tsəmiya nyi dəhə njir bushin ana njir zəndə nə Masar. Ngə Fir'auna tə par nda shi'uni nyi inda, kəl ja, a ndər nau dəkəbiya nyi ba'adar shi'uni inda da wa.
9 Kəl ngə gau njir nə nyi sə sasa nə Fir'auna nda tə na, <<Ənya a ɗəngatə ɗa tə nji təutətəutəkur ɗa. 10 Ku bəji nda huɗa kə tə tla tsa mavi'i nghə nda, ka tsau ea ku jarum na ea na gau njir tatəm, ku cha gavərma njir tsakəra jarum. 11 Kya'a ea tə shi'uni ku vu'i zhang, ya kala shi'uni na ba'ada nyi. 12 Vanya tlakala zər Ibrani da ea kə'iri ku jarum nda, mava gavərma njir tsakəra jarum. Ngə ea dəkar nyi shi'uni kəea, ngə cha dəkəbiya ea ba'ada kənda, kala ndə na ba'adar shi'uni nyi. 13 Ya dəhə sə tə ɗa wi nda cha dəkar ea, nja ɓəlandə ɗa ya nya tlər ɗa, vanya ndə nda tsə'u nja tsəya nyi təwa hakəya nyi.>>
14 Kəl ngə Fir'auna tə sə nja nga Yusufu, ngə nja kusa zəbiya na cha ku jarum nda. Nda cha sənda kəra cha ga bəlatə ləkutə nyi, ngə cha shili huɗə Fir'auna.
15 Ngə Fir'auna tə nar nyi nə Yusufu, <<Ya shi'uni, ya a ndər nau dəkəbiya ba'ada nyi da wa. Kəl ja, a ngatə tə ya ənda maka wur ngatə shi'uni ko nau dəkəbiya ba'ada nyi.>>
16 Kəl ngə Yusufu tə wum ga nar nyi nə Fir'auna, <<A ya kwa nau wa, Kəl ja, Hyel ngə kwa nə nyi wum nda tsa'atsa'a nə Fir'auna.>>
17 Kəl ngə Fir'auna tə nar nyi nə Yusufu, <<Ku shi'uni ɗa, ta'i ya nya dəl Nilu, 18 kəl janə tla ngətləngətlə ya gumaguma məɗəfə tə zəbiya ku dəl Nilu nda, ndo ɓəla ku sar walang. 19 Ətsəu kəl janə alenya tla ɗimiɗimi ya nguvinguvinyi kyangyang kyangyang mədəfa tə zəbiya, nda a ya taa la'a ku dəhə hə'i Masar wa. 20 Kəl ngə tla mədəfə ɗimiɗimi nguvinguvinyi kyangyang kyangyang inda tə ɗənya tla məɗəfə inda tangərma inda. 21 Kəl ja, madangə a ɗənya tə nda tla inda, a ndə do nau zəndə ənda a səm tə nda sə wa, aka a sə da sha dzən nda wa. Ngə ya hya'ati.
22 <<A ku shi'uni nda ya shi'uni tsəu, ya la'a zangam uhi məɗəfa inda tə pəli mənakə gumaguma kwa hə tə chiva zhang. 23 Ətsəu kəl alenya zangam uhi məɗəfə inda titi'uatiti'uanyi, shiwarshiwar nda gyang fwakə tə kəunda, tə hya'ati. 24 Kəl ngə zangam uhi shiwarshiwar inda tə ndasənya zangam mənakə məɗəfə inda. Ya dəkar nyi nə njir bushin, ya a da nda nau dəkəbiya ɗa wa.>>
25 Kəl ngə Yusufu tə nar nyi nə Fir'auna, <<Shi'uni Fir'auna ingə sə zhang, ya məlməl nda. Hyel tə chabiya nyi nə Fir'rauna sənda cho gwa'a məra. 26 Tla mənakə məɗəfə inga fa məɗəfə inga, ya zangam uhi məɗəfə ingə tsəu, fa məɗəfə inga, sə zhang inga ya shi'uni zhang inga. 27 Tla nguvinguvi ɗimiɗimi məɗəfə ingə tə zəbiya hi nga, fa məɗəfə inga, ya əngə ma'a zangam uhi məɗəfə ɓwa'aɓwa'a ingə gyang fwakə tə kəunda inga, fa məɗəfə nə huɓu inga.
28 <<Tang wi nda ya nar nyi nə Fir'auna, Hyel tə chabiya nyi nə Fir'rauna sənda cho gwa'a məra. 29 Fa məɗəfə njo uya sərsum nyaɓə tə hə'i Masar, 30 kəl ja, ahir ngə huɓu kwa tlə nə fa məɗəfa. Kəl njo far na dəhə nyaɓəkura sərsum nda nja uya vu Masar nda, ya huɓə kwa zhaliya hə'i nda. 31 A tsə'u njo ɗənghatə na nyaɓəkura sərsum nda nja uya nda wa, aka huɓu ndo tlə tə hə'i nda kwa ɗa 'ual'ual gagaɗa. 32 Sə nda gwa'atə shi'uni ngə tə shili nə Fir'auna ku laku mətlə nacha ngə, Hyel ngə tə ɓatliya na kərnyi, ya Hyel kwa mərtə kacha'ana.
33 <<Sakan ja, əngwa Fir'auna gwa'arə ndə nda na himi ya ndər dəma, ka cha fəkə nyi təkəra hə'i Masar. 34 Əngwa Fir'auna ɗəmtsə gau təkəra hə'i, ga nda tsəmtə zhang ku tufəu nə sə zwazwa nə hə'i Masar, ku fa məɗəfə ingə njo uya sərsum nyaɓə nga. 35 Nda tsəmtə sərsum nə fa mənakə ingə kwa shili inga, nda pəu ku məɗəwa kala mələm ka sərsuma, da kiɗa gyalkur Fir'auna. 36 Sərsum ingə njo ɗəwanda ka njir hə'i na, ka ga nja mər tlər nə ku fa məɗəfə nə huɓə nda kwa da shili təkəra Masar, tsa njir hə'i da ba'a kuɗə na huɓa.>>
37 Kəl ngə chul nda na jigadəma tə ɗa mənakə nə Fir'auna ana njirawawa'a nyi. 38 Ngə Fir'auna tə jau nda, <<Kwa uya mən vanya ndə wi ndə nənna, ndə nda na Shanguɗə Hyel ku cha ya?>> 39 Kəl ngə Fir'auna tə nar nyi nə Yusufu, <<Mangə Hyel wurta mərtə ka zəndə sə ingə dəhəu, a vanya ndə da na himi ana dəma wi nakə wa. 40 Ko ɗa ka gau təvira naya, ya dəhə nji ɗa kwa ɗa tə kiɗa gyalkur ngha. Kəl nda ana səli dzəga təlkur ngə yo ɗa dəgal matsa ka.>>
41 Ngə Fir'auna tə nar nyi Yusufu, <<A fiya nghə tə ya gau təkəra dəhəkura hə'i Masar.>> 42 Kəl ngə Fir'auna tə səɗənda tsəshiu hatimi nda tə cha cha ga hatə nyi tə cha Yusufu. Ngə cha handzə nyi dzaki linen gumaguma ga hatə nyi sər ha tə wulya nə bəjingha tə wulya cha. 43 Ngə cha fiya nyi ka ndə nda ta'a dzə nyi na gyalkur, cha nar nyi cha gi ngya ku charkaina taku, kəl nji kwa pə kurakə ma nyi ndo na, <<Təgwa ma ku laku!>> Təwa əngə ngə nja fiya nyi ka gau təkəra dəhə hə'i Masar.
44 Ngə Fir'auna tə nar nyi nə Yusufu, <<Naya ngə Fir'auna, kəl ja, ma'a a da na gyalkur nghə wa, a vanya ndə da kwa nau mər vanya sə tə hə'i Masar wa.>> 45 Kəl ngə Fir'auna tə fəndzə nyi tləm nə Yusufu Zafenatpaniya, ga nənyi Asenat kwar Potifera fərist njir On, ka mala nyi. Ngə Yusufu tə zhulitə hə'i Masar. 46 Fa Yusufu makərkumənyi macha go mər tlər nə Fir'auna təl Masar. Ngə Yusufu tə hya'atə huɗə Fir'auna ga biya zhulitə dəhə hə'i Masar. 47 Kəl ja, ku fa məɗəfə nə nyaɓəkura sərsum nda, hə'i tə mər sakədar sərsum 'ual'ualə gagaɗa. 48 Yusufu tsə'u tə tsəmtə sərsum ku fa məɗəfə nə nyaɓəkura sərsum nda ku Masar nda, ga piya ku məɗəwa nə kala mələm. Cha tsəmiya dəhə sərsum nda nji tə zuya ku fa kənda, ga piya ku məɗəwa mələm kənda. 49 Təwa ənga Yusufu tə tsəmtə sə uhiuhi nyaɓə gagaɗə wi ngə tə mishishi'ua nya fa'a, tə nda ɗa cha ngyar dəka aka a tsə'u njo nau dəkətə wa.
50 Təvi ɓəjir huɓə shili, Asenat kwar Potifera fərist nə njir On, yiyah nyi tə nguli shili mətlə nə Yusufu. 51 Ngə Yusufu tə fəndzə nyi tləm nə zər tangərma nyi nda Manassa ga na, <<Aka Hyel ngə tə mər ya far na dəhə ɓwaɓwatə ana dəhə njir ki ada ɗa.>> 52 Ngə cha fəndzə nyi tləm nə mətləkunya zər nyi nda Ifərem, cha na, <<Aka Hyel tə na'a ngulisha' tə hə'i nda ya sa ɓwaɓwatə kwa.>> 53 Kəl ngə fa məɗəfə nə nyaɓəkura sərsum inda tə hə'i Masar tə shili tərabiya, 54 ngə fa məɗəfə nə huɓə tə ghəya, tang wi nda Yusufu tə na. Huɓə tə tlə ku dəhə alenya hə'i, kəl ja, ku dəhə hə'i Masar sərsum da. 55 Sakanda njir Masar tə ghəya ngatə huɓa, ngə nda tiwi nə Fir'auna ka sərsuma. Kəl ngə Fir'auna tə nar nyi nə dəhə njir Masar, <<Ma'i ma yada Yusufu, kala sə nda cha nar hi hya məra.>>