Yusufu tə Dəkəbiya Ba'adar Shiuni Njir Jarum
40
1 Ahir ənga, ndər nə nyi sə sasa ana ndər tatən nə təl Masar tə mərtə nyi bəkə nə təl Masar tlakən nda. 2 Ngə huɗa Fir'auna tə tla tsa njirawawa'a nyi inda mətlə inda, gau njir ɓatlə sə sasa ana gau njir tatəm, 3 ngə cha tsau nda ku cha gau nə njir tsa kəra jarum, tangnda nja tsau Yusufu ti. 4 Ngə gau njir tsa kəra jarum nda tə tsau nda ku cha Yusufu, ngə Yusufu tə tsamartə nda.Ahir nda ngya nə bəji 'ual ku jarum nda, 5 ndər nə nyi sə sasa ana ndər tatəm nə təl Fir'auna, inda nja tsau ku jarum inda tə shi'uni ku vu'i zhang, ya kala ndə na ba'adar shi'uni nyi.
6 Nda Yusufu tə shili dzən nda mbudla, kəl cha la'a huɗəma nda ndalndalnyi. 7 Ngə cha jau njirawawa'a inda, <<Mi na ɗa huɗəma hi ndalndalnyi ənya?>>
8 Ngə nda wum ga na, <<Kya'a ea tə shi'uni, ya ndər dəkəbiya ea ba'ada kənda da wa.>> Kəl ngə Yusufu tə nar nda, <<A Hyel ngə na dəhə ba'adar shi'uni ma? Nar ɗa ma shi'uni kəhi.>>
9 Aka ənga ndər nə nyi sə sasa nə təl tə dəkar nyi nənyi na shi'uni nə Yusufu. Ngə cha na, <<Ku shi'uni ɗa ya la'a wur anap biyama ɗa, 10 wur anap nda cha cha makərəu. Nda cha ghəya dla'a, təma cha fəu mabəl ga yah anap ga nəa. 11 Ku ndana bəji ɗəɗika Fir'auna ku cha ya, ngə ya hətə yayar anap nda, ga ɓəchiu ku ɗəɗika Fir'auna, ga nə nyi ku cha cha.>>
12 Kəl ngə Yusufu tə na, <<Janə ba'ada nyi, cha wu makər nga, hanyi makər nga. 13 A ku hanyi makər Fir'auna kwa ɓəlandə nghə dəgalkur ngha, cho ɓəlandə nghə ya nya tlər ngha, ya ko yi fəu nyi ɗəɗika Fir'auna ku cha cha, tang wi nda ka ɗaka tsəlna mər ku bəji nda kə ndər nə nyi sə sasa nda. 14 Kəl ja, ma sə tə biya ɗa mənakə nə ngha, ka ɗənghatə naya ka char ɗa mənakur, ka ndər nə Fir'auna təkəra ya, ka cha həbiya ɗa ku jarum na. 15 Aka həltə ɗa nja həltə ɗa hya'atə tə hə'i njir Ibrani, ya mada tangnə ma'a a sə da mər nda njo kina tsau ɗa ku jarum wa.>>
16 Manda gau njir tatəm tə ngatə ba'adar shi'uni nda tə ɗa mənakəu, ngə cha nar nyi nə Yusufu, <<Naya ma'a ya shi'uni ənda, gwazhilakə tsəla makərə tə kəra ya. 17 A ku makərkunya tsəla nda da gi nda, dəhə chul sə səlsəl pampaməu kwa aka Fir'auna, kəl ja, eakə kwa tsakwa.>>
18 Ngə Yusufu tə na, <<Janə ba'adar shi'uni nga. Tsəla makər nga, hanyi makər nga. 19 Ku hanyi makər Fir'auna kwa tlanda kəra ka, ba'a hakəya kumur dzakə tə wua, kəl kwadəga kwa shili tsaku kumur dza ka.>>
20 Ahir hanyi makərəu, nda nacha ngə bəjir yah Fir'auna, ngə cha ɓatləya ladər nə dəhə njirawawa'a nyi. Ngə cha dəlabiya gau nə njir nə nyi sə sasa ana gau nə njir tatəm zəbiya mar njirawawa'a inda. 21 Ngə cha ɓəlandə gau nə njir nə nyi sə sasa nda ya nya tlər nyi, tsa'aka cho biyama na nə nyi sə sasa nə Fir'auna. 22 Kəl ja, cha tsəya gau njir tatəm nda təwa hakəya nyi, wi nda Yusufu tə dəkəbiya nda.
23 Gau njir nə nyi sə sasa nə təl nda da zhaka ɗənghatə na Yusufu wa, cha far na cha.