Yusufu ana Mala Potifa
39
1 Manda nja təra na Yusufu yi Masar. Potifa ndər Masar tə ɗəlbiya nyi tsa njir Isma'ila, Potifa nacha ngə ndəradəgal nə njir ɓəla patla Fir'auna təl Masar.2 Tlakə tsa'a na Yusufu, aka ənga kala sənda cho mər ku ki tlakə nyi ndər Masar nda, kwa biyama. 3 Potifa tə la'a ga ngabiya ənda Tlakə tsa'a na Yusufu, Tlakə kwa gwa'atə kala sənda Yusufu kwa məra kwa biyama. 4 Ngə Yusufu tə uya kwambiyakur tsa tlakə nyi, ngə cha fiya Yusufu ka kadakaliya nyi. Potifa tə fəkənyi dəgal təkəra dəhə njir ki nyi ana dəhə sənyi. 5 Ghəya tə bəji nda Yusufu tə ɗa dəgal təkəra njir ki tlakə nyi ana dəhə sər cha cha, ghəya tə bəji nda Potifa tə fiya Yusufu dəgal təkəra ki nyi ana dəhə sə nyi, Ngə Tlakə tə səkər papa'akur təkəra njir ki ndər Masar nda tə dəbar Yusufu. Papa'akur Tlakə tə ɗa təkəra dəhə sər Potifa nə ki ana nə fa. 6 Aka ənga Potifa tə nənyi gyalkur nəu na kala sənda tsa cha nə Yusufu. Mangə dəhə sə ku cha Yusufu, tsə'u Potifa da kwa ɗəngha na kala sə wa, kəl nda sərsum nda cho səma.
Dza Yusufu tə ɗa durdur ya jan cha gumaguma. 7 Səkar dzə kushiu mala tlakə nyi tə la'a Yusufu ngə cha na, <<Shili ka piya na ya!>>
8 Kəl ja, Yusufu tə ngyari. Ngə cha nar nyi, <<Naya ngə təkəra dəhə sə ku ki na, a tlakə ɗa tsə'u do ɗəngha təkəra dəhə sə inda ku ki nə wa, aka dəhə sə nda tsa cha a tsau tə cha ku cha ya. 9 A vanya ndə da dəgal matsa ya ku ki nə wa. Tlakə ɗa da katə ɗa dəhə sə nyi wa, kəl nda naka, aka mala nyi ka. Aman yo ɗa na mər sə ɗimi ya mar səpəla'a nə Hyela?>> 10 Madangə kala pəchi cho pətə Yusufu, Yusufu tə ngyar piya na cha, ndara cha ɗa ləhə dzə nyi.
11 Vanya pəchi ngə cha gu ki ka cha gwa mər tlər nyi, ya a vanya mava ki nda da ku ki mada zhang wa. 12 Ngə cha səya nyi tə ləkutə nyi ga na, <<Anda ka piya na ya!>> Kəl ngə cha səɗəbiya kərnyi ku ləkutə ga ngya nyi nə ku cha cha, ga hwi tanyi biya.
13 Manda cha la'a Yusufu ngya nyi tə na ləkutə nyi ku cha cha ga hwi tanyi biya, 14 ngə cha nga mavi'i ki nda ga na, <<La'a ma, ndər Ibrani nə sal ɗa tə shili nə na, kwa gwa'a shili na mən sər kuzhi! Cha səgwa tangnə ka cha piya na ya, kəl ja, ya ləla. 15 Manda cha ngatə ya satəya lələ ka gwa'a vala, ngə cha hwi tanyi biya, ga ngyar ləkutəu nyi.>>
16 Kəl ngə cha gəziya ləkutə nda tsa cha, kəl nda sal nyi, tlakənya Yusufu tə shili ku ki. 17 Ngə cha nə nyi labar sənda tə ɗa hi nyi, cha na <<Mava nənna, ndər Ibrani nə ka shili nə na, tə shili da ya ka cha mərtə ɗa sər kuzhi. 18 Kəl ja, nda ya satəya lələ ka gwa'a vala, ngə cha ngyar ləkutə nyi ku cha ya ga hwi tanyi.>>
19 Nda tlakənya Yusufu tə ngatə labar nda mala nyi tə dəkar nyi bəra, <<Nacha ngə sə nda mava nghə tə mərtə ɗa.>> Kəl ngə huɗa cha tla 'ual'ualəu. 20 Kəl ngə tlakənya Yusufu tə hətə nyi ga fəu nyi ku jarum nda njo fə nji təl təl kwa.
Kəl ngə Yusufu tə ngya ku jarum nda. 21 Dəhə ka ənga, tlakə tsa'a nacha, cha char nyi mənakəkur ngə cha uya kwambiyakur tə lya ndər ɓəla jarum nda. 22 Ngə ndər ɓəla jarum nda tə fiya Yusufu ka gavərma dəhə nji inda nja fəu ku jarum, ana tsə'u ngə nja fəkə nyi dəgal təkəra tlər nda ku jarum nda. 23 Ndər ɓəla jarum nda da kwa ɗəngha na dəhə sə inda nja tsau ku cha Yusufu wa, aka Tlakə tsa'a na Yusufu, ya cho nə nyi biyama ku dəhə sənda cho məra.