Yahuda ana Tamar
38
1 Aku ɓəji nda, Yahuda tə ngyar ka zamə nyi ga təra ga yi ngya dzər vanya ndər Adullam ana tləm nyi Hira. 2 A hinda ngə Yahuda tə ɓə na kwar ndər Kan'ana ana tləm nyi Shuwa. Ngə cha həbiya ka mala nyi ga piya na cha, 3 ngə cha hətə huɗə ga yiyah zərsal, ngə cha fəndzə nyi tləm Er. 4 Ngə cha ɓəla hətə huɗə yiyah zərsal, ga fəndzə nyi tləm Onan. 5 Ngə cha ɓəla yiyah vanya zərsal səkəu ga fəndzə nyi tləm Shela. Cha yah nyi a vu Kezib.6 Yahuda tə həbiya nyi mala nə Er zər tangərma nyi, ana tləm nyi Tamar. 7 Kəl ja, Er zər tangərma Yahuda, ndə pəla'a cha tə lya Tlakəu, Ngə Tlakə tə tsəya nyi.
8 Ngə Yahuda tə nar nyi nə Onan, <<Ma'i gwa piya na mala zamə nghə nga, ga ka nyabiya sə nda zamənya sal kwa kina məra, a hir tər zamə nyi, ndara ba'a ka tlabiya nyi chuli nə zamə ngha.>> 9 Kəl ja, Onan zəndə tə ənda ngulisha'a inda da kwa ɗa ka nənyi wa, aka ənga ma dəhə bəji nda cho piya na mala zamə nyi nda ti, kəl cho pənda pə nyi səya hu'i, tsa cha da yiyah nyi ngulisha'a nə zamə nyi. 10 Onan tə mər pəla'akur tə lya Tlakə, ngə cha tsəya nyi.
11 Ngə Yahuda tə nar nyi nə Tamar mala zər nyi, <<Sakan ja, ngya ku ki ada ngha wi mala təsal kəl sakanda Shela zər ɗa tə həa.>> Aka cho jigadəma, <<Ndara Shela kwa tah tang wi nda ka zamə nyi inda tə kuɗə nda.>> Aka ənga Tamar tə ɗəu na ngya yo ki ada nyi.
12 Ahir ɓəji 'ualəu mala Yahuda kwar Shuwa tə tah. Manda Yahuda tə wur na sə'ingu, ngə cha təra yi Timna, yada njir tsəɗə shishi dzər kətəng nyi, bazhi nyi Hira ndər Adullam tsə'u tə ma'i tsa'a na cha.
13 Manda nja nar nyi nə Tamar ənda, <<Wula sələkə nghə ku lakur təra yi Timna ka ga cha yi tsəɗə shishi dzər kətəng nyi,>> 14 Kəl ngə Tamar tə səɗənda ndzaki sə'ingu ga tuləu pa'ua ku kəra cha, ka cha ɗəwanda kərnyi, ga biya ngya ta nyi tə lakur gwa Enayim, nda nacha ngə lakur gwa Timna. Aka cha la'a saka nga wi Shela hə ti, ya a nja taa nə nyi nyi ka mala nyi wa.
15 Manda Yahuda tə la'a Tamar, cha har ənda zawar cha, aka cha mbuya huɗəma cha. 16 A Yahuda da zəndə ənda səlkə nyi nda wa, ngə cha biya həya nyi nya laku ga na, <<Shili sakana, ya piya naka.>>
Ngə Tamar tə jau Yahuda ga na, <<Mi ko na'a ma ya piya naka?>>
17 Ngə Yahuda tə na, <<Yo nə nghə zər kua ku huɗa sərshishi ɗa,>>
Ngə Tamar tə jawa, <<Kwa nau ka na'a vanya sə nda kwa char ənda ko lətə ɗa ku ngə ya?>>
18 Ngə cha jau nyi, <<Mi yo nə nghə nda kwa char ənda alkawal ngə ya mər ngə vəlvəla?>>
Ngə Tamar tə wum ga na, <<Ka na'a hatimi ngha ana tamba ngə ku cha kə nga.>> Aka ənga ngə cha nə nyi sə inda nə Tamar ga piya nacha, ngə cha hətə huɗə ana Yahuda səlkə nyi. 19 Ahir Tamar tə ɓəl gu ki ngə cha gwa tulnda pa'ua nda cha mbuya kəra cha nə nda, ga pəndzə dzaki sə'ingu səkəu.
20 Aku bəji nda ngə Yahuda tə sə bazhi nyi ndər Adullam nda na zər ku nda cha mər alkawal nə mala nda nda, kəl ja, a da cha həya mala nda wa. 21 Ngə cha jau shili inda na ngya tangnda, <<Aman kwapatə zawar nda na ngya nya laku Enayim nda?>>
Ngə shili inda tə nar nyi, <<A vanya kwapatə nə zawar nda tangnə wa.>>
22 Ngə cha ɓəl yada Yahuda ga nar nyi, <<A da ya la'a mala nda wa. Matsa ngə ma'a, shili inda na ngya tangnda nda tə na, <A vanya kwapatə nə zawar nda tangnə wa.> >>
23 Kəl ngə Yahuda tə na, <<Sər cha fiya sənda tsa cha, ndara eo ɗa ka sər gwa'a gyaɗi. Ahir ngə dəhəu, ya sə nghə na kua, ya aka həya nyi wa.>>
24 Ahir hya makərəu ngə nja nar nyi nə Yahuda, <<Janə Sələkə nghə Tamar ɗa tə ka zawar, janə ma'a huɗə ku ta cha.>>
Kəl ngə Yahuda tə na, <<Zəbiya ma nacha, nja zəbiya nginda nyi!>>
25 Manda nja kwa zəbiya nacha, ngə cha sətə nyi mafakə nə səlkə nyi. Cha na, <<Na ea na ndər sə inənnə na hətə huɗə na,>> ngə cha tsakətə na, <<Ndzamar ndara kwa zəndə kə tlakər hatimi na ana tamba na.>>
26 Kəl ngə Yahuda tə ɗənghatə ngə cha, <<Ndiya ɗa tə cha tsa'atsa'akur, mangə a ya nar nyi nə zər ɗa Shela cha hə nyi wi nda ya mər alkawal wa.>> Ya a Yahuda da ɓəla tsakətə piya nacha səkə wa.
27 Nda bəji ɗa ka Tamar kwa yah, ngə cha yiyah ɓəli, nguli shili kya'a. 28 Aku bəji nda cha kwa yah ti, zhang tə habiya cha cha, kəl ngə mala yah nyi nda tə hətə bəratsən dəzə ga mbatə nyi tə wulyar cha cha, ngə cha na, <<Nənnə ngə tə səya tangərma.>> 29 Manda cha ɓəlau cha cha, ngə zamə nda tə biya, kəl ngə cha na, <<Ənnə nə ka uya ga zəbiya tangərma ya!>> Aka ngə nja fəndzə nyi tləm Perez. 30 Kəl ngə zamə nyi nda na bəratsən dəzə tə wulyar cha cha nda tə zibiya, ngə nja fənzdə nyi tləm Zera.