Shi'uni Yusufu
37
1 Jakop tə ngya tə hə'i Kan'ana hə'i nda ada nyi tə ɗaka ngya kwa.2 Janə labar nyandəla Jakop.
Yusufu zər fa kwabəməɗəfa cha, cho ɓəla sərshishi nanda kə'i zamə nyi, nguli shili Bilha ana nguli shili Zilpa, mahi'i ada nyi, ngə Yusufu tə chuɗəbiya sə ɗimi inda kə'i zamə nyi kwa maka mər nə adan nda.
3 Isra'ila kwa nyida Yusufu ndiya matsa dəhə alenya nguli shili nyi, aka nja ya Yusufu ku halhalkur Isra'ila. Vanya pəchi Isra'ila tə tsatə nyi ləkutəu gaɗagaɗa nə Yusufu. 4 Kəl ja, nda ka zamənya Yusufu tə ngabiya ənda adan nda kwa nyida nyi ndiya matsa nda, ngə nda ghəya ngatə shishi nyi, aka a tsə'u nda kwa ɓwanya mənakə nənyi wa, kəl zandəra
5 Vanya vu'i Yusufu tə shi'uni, manda cha dəkar nyi nə ka zamə nyi, ngə nda tsakətə ngatə shishi nyi 'ual'ual matsa nda haaɗa. 6 Yusufu tə na, <<səya ma himi da shi'uni na.>> 7 <<Aku fa mən, məno mba dəmadəma, gəɗə tanyi ngə dəmadəma ɗa tə hya'atə tandarəu, ya ngə dəmadəma kəhi tə ɓandi, ga uzhi səya huɗə na'a!>>
8 Ka zamə nyi tə ɓəlakə nyi, <<Jigadəma nghə kwa har ənda ko ɗa ka təl kəea wa? Ko har wi ko səm təlkur təkəra ea wa?>> Ngə nda tsakətə ngya nyi gagaɗa aka shi'uni nyi nda, ana sənda cha na.
9 Kəl ngə Yusufu tə ɓəla shi'uni, ngə cha dəkar nyi nə ka zamə nyi cha na, <<Səya ma himi, ya ɓəla shi'uni səkəu.>> <<Ku shi'uni nənna, ya la'a Pəchi, hya, ana sasəlga kwabəzhang tə uzhi huɗə ɗa!>>
10 Əsakangə ja, cha dəkar nyi nə ada nyi ana ka zamə nyi, ngə ada nyi tə tsətə nyi, <<Chul shi'uni mi ngə ənga?>> <<Ama ngha, ka zamə ngha, ana ma'a naya kwa shili uzhi hu'i huɗə nghə vəlvəl ya?>> 11 Kəl ja ku sakanda ka zamənya Yusufu kwa hashi nyi gagaɗa, ada nyi da tə far wa, cha kwa jigadəma təkəra shi'uni Yusufu inda.
12 Vanya pəchi, Ka zamənya Yusufu tə təra ki ɓəla sərshishi adan nda vu Shekem. 13 Ngə Isra'ila tə nar nyi nə Yusufu, <<A zəndətə kə ka zamə nghə kwa ɓəla kətəng vu Shekəm, anda yo sə nghə gwa da nda.>>
Ngə Yusufu tə na, <<Jan ya.>>
14 Kəl ngə Isra'ila tə nar nyi nə Yusufu, <<Ma'i ka gwa la'a kə'i zamə ngha ana səshishi ka shi na ɗa labar kənda.>> Ngə cha səu nyi ku laku hya'atə vu dakə Hebron.
Manda Yusufu tə dzəva vu Shekem, 15 ngə vanya ndə tə həya nyi cho zhuli babal ngə cha jau nyi, <<Mi nə ko gwa'a?>>
16 Ngə Yusufu tə wum ga na, <<Yo gwa'a ka zamə ɗa. Kwa nau ka dəkar ɗa mbwa na ndo ɓəla tə ya?>>
17 Ngə ndə nda tə wum ga na, <<A təra tə nda tang na,>> <<Ya ngatə nda na, <A mən gwa Dotan.> >>
Kəl ngə Yusufu tə nəu hir ka zamə nyi ngə cha həya nda ləhə dza Dotan. 18 Kəl ja, nda ka zamənya Yusufu tə la'a nyi cho shili naɗəu, təvi cha ləhətə nda, ngə nda mbatə nya ka nda tsəya nyi.
19 Nda na, <<Janə ndər shi'uni nda kwa shili!>> 20 <<Mən yi tsəya nyi mən vakəu nyi go zhang ku huɗa ka'ur ɓiti inga, ba'a mən na, <Kum takə ɗənya nyi ti,> ga mən la'a sənda shi'uni nyi ngə kwa ɗa kari!>>
21 Kəl ja, sakanda Roben tə ngatə ənga, ngə cha gwa'a cha mbəɗandə Yusufu, cha na, <<Ngwa mən tsa nyi wa.>> 22 <<Ngwa mən pənda mashi wa, mən vakəu nyi go zhang ku huɗa ka'u inə tə dadəl takə na. Tsa'aka cho tə sənyi a da cha mən da kwa wa.>> Roben tə na ənga, aka cho gwa'a cha mbəɗandə Yusufu cha ɓəlandə nyi shi da ada nyi.
23 Manda Yusufu tə yi, ngə ka zamə nyi tə səɗənda ləkutəu gaɗagɗa nda cha handzə nda. 24 Kəl ngə nda səya nyi ga vakəu nyi go ka'u nda a ɓiti da kwa wa.
25 Manda nda ngya ka səm sərsuma, ngə nda har lya nda ngə nda la'a charkaina dləgwam nə njir Isma'ila kwa hya'atə vu Giled. Dləgwam kənda kwa hə sə'inda kwa shi'uni kwitkwitəu, dəmal ana mur a yi Masar.
26 Ngə Yahuda tə nar nyi nə ka zamə nyi inda, <<Mi məno həbiya kwa ma məna tsəya zamən mən ga ɗəwanda bikər pənda mashinya? 27 Mən yi ɗəlnda Yusufu nə njir Isma'ila, njir shafəli inga. Ngwa mən ɗa ka njir tsa nyi wa; matsa ngə ma'a, zamən mən nga, ya mashi kəmən nga!>> Ngə ka zamə nyi inda tə dləukəri.
28 Manda njir shafəli inda kwa tərabiya, kəl ngə ka zamənya Yusufu inda tə həbiya nyi ku ka'u nda ga ɗəlnda nyi təkəra azurfa mətləkumənyi, ngə njir Isma'ila njir shafəli inda tə təra na cha yi Masar.
29 Manda Roben tə ɓəl shili dza ka'u nda, ngə cha la'a a tsə'u Yusufu da ku ka'u nda wa, kəl cha tanda ləkutəu dzə nyi. 30 Ngə cha ɓəl yada ka zamə nyi ga na, <<A tsə'u zər nda da hinda wa, abar yo shi ja sakana?>>
31 Kəl ngə nda hətə ləkutəu Yusufu, nda tlakər wulya təkəra kua, ga gubuləu ləkutə nda ku mashi ku nda. 32 Ngə nda hətə ləkutəu nda ka shi na nyi nə adan nda ngə nda na, <<Ea uya na, ndzamari mənakə ndara ləkutəu zər nghə na.>>
33 Ngə cha ngabiya ləkutə nda ga na, <<Ləkutə zər ɗa na! Ufa ɗimi tə tsəya nyi ga ɗənya nyi. Kəpal da wa, sa tətanda tə Yusufu.>>
34 Kəl ngə Jakop tə tanda ləkutəu dzənyi, ga pəndzə guzhalguzhal sə'ingu ga sə'ingu zər nyi nə hanyi ɗanghəu. 35 Ngə dəhə nguli shili nyi ana ku'i nyi tə shili da cha ka nda fətə nyi ɗufəu, kəl ja, a cha nau mbiya huɗə wa. Ngə cha na, <<A'a, ku sə'ingu nə yo nəu zər ɗa go hwa.>> Əngə ngə Isra'ila tə tiwi zər nyi.
36 Aku ɓəji nda, njir Midiyan wurta dəlnda Yusufu a vu Masar nə Potifa, zhang ku huda njirawawa'a Fir'auna, gavərma nə njir ɓəla patla.