Ghəyarsəu
Ghəyar səu
1
1 Tangərma Hyel tə ɓatlətə huɗamələm ana dunəya. 2 Dunəya tə ɗa shiwamshiwam ya jwajwa'a, ana kutlə tə haɗiya kəra ɓiti, ba'a Shanguɗə Hyel kwa zhuli kikər ɓiti.3 Kəl ngə Hyel tə na, <<Ngwa vimbəlmbəl ɗa,>> ya kəl jan vimbəlmbəla. 4 Ngə Hyel tə la'a ənda vimbəlmbəl nda mənakəu. Kəl ngə cha təkəbiya pama vimbəlmbəl ana kutla. 5 Hyel tə nga vimbəlmbəl nda <<puchi,>> cha nga kutla <<vu'i.>> Akəu tə tərabiya ana mbudla tə ɗa, nacha ngə tangərmər puchi.
6 Kəl ngə Hyel tə na, <<Ngwa babal ɗa ku pama ɓiti ana biti, ga cha təkəbiya pama nda.>> 7 Ya əngə sənda tə ɗa. Hyel tə ɓatlətə babal ga təkəbiya pama ɓiti nda da gi ana nda da səya. 8 Hyel tə nga babal nda gi nda <<ɗihir huɗamələm.>> Akəu tə tərabiya, ana mbudla tə ɗa, nacha ngə mətləkunya puchi.
9 Kəl ngə Hyel tə na, <<Ngwa ɓiti inda da kida ɗihir huɗamələm hwi yatə mbwar zhang, ana ngwa vi ul'ul tsə'u cha ɗa.>> Ya əngə tə ɗa. 10 Ngə Hyel tə nga vi ul'ul nda <<hə'i,>> ɓiti inda tsə'u <<fa'a.>> Ngə Hyel tə la'a ɗatə mənakəu. 11 Kəl ngə Hyel tə na, <<Ngwa hə'i cha biyandə sə tsətsəa: kala chuli sə tsətsə nda kwa ya miyya, ana tsə'u wu nda kwa həa kwa ya nguli ana miyya kwa. Miyamiya nyi tsə'u kwa tsandə kala sə tsətsə ana wu nda nda biya kwa.>> Ya əngə tə ɗa. 12 Ngə hə'i tə biyandə sə tsətsə, dəhə chulkə wu nda kwa ya miyya, ana wu nda kwa ya nguli ana miyya kwa. Miyya kənda tə biyandə sə tsətsəa ana wu kala na chuli nyi. Ngə Hyel tə la'a ɗatə mənakəu. 13 Akəu tə tərabiya ana mbudla tə ɗa, nacha ngə makərkunya puchi.
14 Kəl ngə Hyel tə na, <<Ngwa sə mbəlmbəl i'i biyandə dzə kyatə ɗihir huɗamələm ka cha təkəbiya puchi ana vu'i, ga nda ɗa ka sə'inda kwa char bəjir sə i'i, hanyi i'i ana fa i'i. 15 Ngwa sə mbəlmbəl ingə kya huɗamələm nga, nda mbəl səya tə dunəya.>> Ya əngə tə ɗa. 16 Hyel tə ɓatlətə wawa'ar sə mbəlmbəl tsa'a mətləu, nda dəgal nda, cha nəuna puchi, vanyi nda təwara kushu cha nəuna vu'i. Ətsəu ngə cha ɓatlətə sasəlga i'i. 17 Hyel tə ta'ində sə mbəlmbəl ingə kyatə ɗihir huɗamələm ga cha mbəl təkəra dunəya, 18 tsa'aka cha nəuna puchi ana vu'i, ana cha təkəbiya vimbəlmbəl ana kutla. Hyel tə la'a a ɗatə mənakəu. 19 Akəu tə tərabiya ngə mbudlə tə ɗa, nacha ngə fwaɗəkunya puchi.
20 Ngə Hyel tə na, <<Ngwa ɓiti cha nyi na sə pipi ana kala jul eakə tsə'u nda fəl biya huɗamələm.>> 21 Ngə Hyel tə ɓatlətə wawa'ar sə pipi ana kala chulkə sə'inda kwa ma'i ana kwa ngya ku ɓiti tsatsa'a na chuli kənda, ana dəhə chulkə eakəu, tsatsa'a na chuli kənda. Ngə Hyel tə la'a sənda cha mər nda ɗa tə mənakəu. 22 Hyel tə səkə nda papa'akur ga na, <<Hya yatəkər, hya tsaka hya nyandə ɓiti inda ku fa'a, eakə tsə'u nda tsakə tə dunəya.>> 23 Akə tə tərabiya ngə mbudla tə ɗa. Nacha ngə tufukunya puchi.
24 Ngə Hyel tə na, <<Ngwa hə'i biyandə sərshishi tsatsa'a na chuli kənda, sərshishi ki, sər təɗə na ta, sərshishi takə pampaməu.>> Ya əngə tə ɗa. 25 Hyel tə mərtə sərshishi takəu ana chuli kənda, sərshishi ki ana chuli kənda, ana dəhə sər təɗə na ta ana chuli kənda. Ngə Hyel tə la'a ɗatə mənakəu. 26 Ngə Hyel tə na, <<A mən ɓatlətə ndə pabiya da mən, wi namən, nda səm təlkur təkəra kalfi inda ku fa'a ana eakə inda biya huɗamələm, ana təkəra sərshishi inda ku ki ana inda ku dəhə dunəya, ana təkəra sərshishi inda kwa dzaba'a tə kəra hə'i.>>
27 Ngə Hyel tə ɓatlətə ndə pabiya da kərnyi,
pabiya da kərnyi Hyel tə ɓatlətə ndəu,
cha ɓatlətə nda sal ana mala.
28 Hyel tə səkə nda papa'akur ga na, <<Hya yatəkər hya tsaka, hya nyandə dunəya hya gəla nyi. Səm ma təlkur təkəra kalfi inda ku fa'a ana eakə inda biya huɗamələm, ana kala səpipi nda kwa ma'i tə kəra hə'i.>>
29 Ngə Hyel tə na, <<A nə hi təya kala sə tsətsə ku dəhə dunəya ana kala wu nda kwa ya. Nda ɗa ka sərsum kəhi. 30 Ətsəu, a nənyi təya kala sə hyalihyali nə dəhə sərshishi dunəya, dəhə eakə nda biya huɗamələm ana dəhə sə pipi nda kwa dzaba'a, a ɗa ka sərsum kənda.>> Ya əngə sənda tə ɗa.
31 Hyel tə ndzamar dəhə sənda cha məra, ga la'a ənda ɗatə mənakə gagaɗa! Akəu tə tərabiya ngə mbudla tə ɗa, nacha ngə kwakunya puchi.