2
1 Əngə nja wurandə ɓatlə huɗamələm ana dunəya ana kala sə'inda kwa.2 Pəshir hanyi məɗəfəkunyi Hyel tə wurandə tlər nda cha məra, aka ənga cha ɓəliyasar tsa mər dəhə tləra. 3 Ngə Hyel tə səkə nyi papa'akur nə məɗəfəkunya pəchi ga mərtə nyi karti, aka pəshinda cha ɓəliyasar tsa dəhə tlər inda cha məra.
Adamu ana Hawa'u
4 Janə ənda nja mər dunəya na huɗamələm.
Aku bəji nda Hyel tə mər huɗamələm ana dunəya, 5 a vanya sə tsətsə da təkəra hə'i wa, ya a vanya hyali da tə tsə wa, aka a Hyel da shilandə par gwadagə wa, ya a ndər zwa hə'i da wa. 6 Kəl ɓiti kwa zədə kyo hə'i kwa ləɓə kəra hə'i. 7 Hyel Tlakə tə ɓatlə ndə ku bərbər nə hə'i. Ngə cha batəu nyi pi təwa chira cha, ngə ndə tə ɗa na pi.
8 Kəl ngə Hyel Tlakə tə ɓatlətə fa ku Edən təwa zədər pəchi, ga fəu ndə nda cha ɓatlətə nda kwa. 9 Ətsəu Hyel Tlakə tə tsandə dəhə jul wu ku hə'i ga mərtə nda, nda həa, wu inda mənakə tə li ya məsəɗakə ka səma. Kwatə ghadar fa nda, vanya wu da nə pi, ana wur zəndəbiya sə mənakə ana səɗimi.
10 Dəl hya'atə ku Edən tə təkəbiyadzə fwaɗəu, kwa nənyi ɓiti nə fa nda. 11 Tləmər dəl tangərma, Pishon, cha kwa hwi tahə dəhə hə'i Havila, mbwa nda njo uya bəjingha ti. 12 (Chul bəjingha nda njo uya tangnda, bəjingha tsa'amunyi, ana tsəu, sə'inda kwa shi'uni kwitkwitəu ana hangwu daɗədaɗa.) 13 Tləmər mətləkunya dəl nda njo nga, Gihon, kwa hwi tahə dəhə hə'i Kush. 14 Tləmər məkərkunya dəl nda njo nga, Tigris, kwa hwi təwa zədər pəchi nə Ashur. Fwaɗəkunya dəl nda tsə'u njo nga Yufəretis.
15 Ngə Hyel Tlakə tə fəu ndə nda ku fa Edən nda ka cha zwa ana cha tsamarti. 16 Kəl ja, Hyel Tlakə tə tsau nyi bar, <<Kwa nau ka səm kala chul wu ku fa na 17 kəl nda wur zəndəbiya sə mənakə ana səɗimi, ma ngə ka səm yayah nyi vəlvəl ko tah.>>
18 Hyel Tlakə tə na, <<a da ɗa mənakə sal ngya zhang tanyi wa, yo mərtə nyi ndər vala nda kwa ɗa tsa'atsa'a na cha.>> 19 Aka ənga Hyel Tlakəu, aku hə'i cha ɓatlətə dəhə kum takəu ana dəhə jul eakə nda biya huɗamələm. Ngə cha shili na nda nə ndə ka cha la'a nda aman cho nga nda, ya kala ənda cha nga kala sərshishi, a ngya tə ka tləm nyi. 20 Cha fəndzə nyi tləm nə dəhə sərshishi inda njo gəzə ku ki, ana dəhə eakəu inda biya huɗamələm, ana dəhə kum takəu.
Kəl ja ba'a saka nga a da nja ta uya nyi ndər vala nda tsatsa'a na cha wa. 21 Aka ənga, Hyel Tlakə tə gwa'atə sal nda tə gwa ku hanyi tlaɓtlaɓəu. Ku sakanda cha ku hanyi, ngə Hyel Tlakə tə həbiya ɗihir yimbilya sal nda zhang, ga nyunda mbwa fwang nda na kum. 22 Kəl ngə Hyel Tlakə tə ɓatlətə malakə na ɗihir yimbili nda cha həbiya ku ndə nda, ngə cha shili na nyi nə ndə nda.
23 Sal nda tə na.
<<Nənnə ja, ɗəhi na hya'atə ku ɗəhi ɗa,
kum tsə'u hya'atə ku kumər dza ya,
njo nga nyi <malakəu,>
aka ku dza sal nja həbiya nyi.>>
24 Nacha ngə sənda tə gwa'atə sal kwa ngyar ada nyi ana ama nyi cho daɓətə dzə na mala nyi, ndo ɗa ka zhang.
25 Sal nda ana mala nyi dura'a nda, ya a da ndo ngatə kuzhi wa.