Ndə tə Dla
3
1 Pwabu ngə tə ndiya na kwakunakur ku dəhə sərshishi takə nda Hyel Tlakə tə ɓatla. Kəl ngə cha jau mala nda, <<Vəlvəl ngə Hyel tə na <Ngwa hya da səm yayar wu nda ku fa nə wa ya>?>>2 Ngə mala nda tə ɓəlakə nyi, <<Kwa nau ea səm yayar wu nda ku fa na, 3 kəl ja, Hyel tə na, <Ngwa hya da səm ndara hya tsəkar yayar wu ngə tə ghadar fa ngə wa, ma əngə wa, hyo kuɗa.> >>
4 Ngə pwabu nda tə ɓəlakə nyi nə mala nda, <<A da vəlvəl hyo kuɗə wa! 5 Hyel zəndətə ənda lya hyo mbəɗa ma hya səma, ya hyo ɗa wi ngə tə cha, hyo zəndəbiya sə mənakə ana səɗimi.>>
6 Nda mala nda tə la'a yayar wu nda mənakə tə li ya məsəɗakə ka səma, ya mənakə cha ka sər nənyi dəma nə ndəu. Ngə cha gwa'ar yayar wu nda ga səma. Ngə cha nənyi alenyi nə sal nyi, nda tangnda nacha, nacha ma'a tsə'u cha səmənya. 7 Kəl lya nda tə mbəɗa, ngə nda ngabiya ənda dura'a nda. Ngə nda ɓəliya hyali kanda, ga mbətə ga mbunda bama kərnənda ni.
8 Ku sakanda vi tə ɗa shishiu ba akəu, ngə ndə nda na mala nyi tə ngatə ənda Hyel Tlakə kwa zhuli ku fa nda. Ngə nda mbuta nda tsa Hyel Tlakə ku lya wua aku fa nda. 9 Kəl ngə Hyel Tlakə tə nga ndə nda, <<Aman naka?>>
10 Ngə cha ɓəlakə nyi, <<Ya ngatə ko ma'i ku fa na, ngə ya mbuta ɗa. Ləvər tə səya ɗa aka dura'a ya.>>
11 Ngə Hyel Tlakə tə jau nyi, <<Wa nar nghə dura'a ka?>> <<Aa ka səm yayar wu nda ya nar nghə ngwa ka səm nda wa ya?>>
12 Ngə ndə nda tə ɓəlakə nyi, <<Mala nda ka na'a ka ea ngya nda, nacha ngə tə na'a yayar wu nda, ngə ya səma.>>
13 Kəl ngə Hyel Tlakə tə jau mala nda, <<Mi ngə mər kə ja?>>
Ngə mala nda tə ɓəlakə nyi, <<Pwabu ngə tə shandə ɗa kərəu, nacha gwa'atə ya səma.>>
14 Kəl ngə Hyel Tlakə tə nar nyi nə pwabu nda, <<Aka ka mər chul nawa səu,
a shu'unda nghə tə nji matsa dəhə sərshishi, nə ki
ana nə takəu.
Ko təɗə na ta ka,
ya hə'i ko səma ku
dəhə ngya ngha.
15 Yo fəu dawa
ku pama hi na mala nga,
ana ku pama nyandəla ka ana nyandəla cha.
Cho chatliya kəra ka,
nakə tsə'u ko ngaliya nyi tə mətətəka cha.>>
16 Kəl ngə cha nar nyi nə mala nda,
<<Yo tsakətə nghə ɓwaɓwatə 'ual'ual ku sakanda ko yah,
ana ɓwaɓwatə ko yah ngulisha'a.
Ku ngya ngha, ko chim ka ɗa ləhə dza sal ngha,
dəhə ka ənga, cho ɗa na gyalkur təkəra ka.>>
17 Anə ndə nda tsə'u cha nar nyi, <<Mangə ka səhimi da mala nghə ka səm ku yayar wu nda ya tsau nghə bar tsa səma,
a shu'unda tə nji hə'i aka ka.
Dəhə ngya ngha ku ɓwaɓwatu
ko gwa'a sər kəta pi.
18 Hə'i kwa biyandə shikəɗi ana ndəka,
ya sə tsətsə ko səm ka sərsuma.
19 Kəl ka tlə vitəku
nda ka uya sərsuma,
kəl bəji nda ka ɓəl go hə'i,
aka akwa nja həbiya ngha.
Aka ana hə'i nja ɓatlə ngha,
ya go hə'i ko ɓələu.>>
20 Kəl ngə Adamu tə fəndzə nyi tləm nə Mala nyi Hawa'u, aka cho ɗa ka amanya dəhə nji nda na pi.
21 Ngə Hyel Tlakə tə ɓatlətə dzaki ana chi sərshishi a nə Adamu ana mala nyi ga handzə nda. 22 Kəl ngə Hyel Tlakə tə na, <<La'a, ndə wurta ɗa wi namən, kwa zəndə sə mənakə ana səɗimi. Ma nja ngya nda, ndo ha cha nda, ndo tlatsə yayar wur pi nga, ndo səma, ndo ɗa na pi nda ba'anawa!>> 23 Kəl ngə Hyel Tlakə tə gədləbiya nyi ku fa Edən nda, ga cha təra ki zwa hə'i nda nja mər nyi kwa. 24 Ahir nda cha gədləbiya ndə nda, ngə Hyel Tlakə tə fiya Cherubim təwa zədər pəchi nə fa Edən nda. Cha fiya katsakər hu'u, nda kwa sha mada abari, kwa ɓəla lakur gwa dzər wur pi nda.